'ފަލާހު ވެހި' ގޯތި ނެގުމަށް ކައުންސިލުން ނިންމުމުން ޖަމިއްޔަތުލް ފަލާހުން އެކަން ކުށްވެރިކޮށްފި

އއ. މާޅޮހު ޖަމިއްޔަތުލް ފަލާހަށް ރަޖިސްޓްރީކޮށްފައިވާ 'ފަލާހު ވެހި' ގޯތީގެ ބޮޑުބައެއް ނެގުމަށް ނިންމުމާއެކު އެޖަމިއްޔާއިން ނުރުހުން ފާޅުކޮށްފިއެވެ.

ޖަމިއްޔަތުލް ފަލާހުން ނެރުނު ބަޔާނެއްގައި ބުނެފައިވަނީ އެބިމަކީ އެޖަމިއްޔާގެ އިހްތިސާސް ހިނގާ ބިމަކަށް ވާއިރު ބިމުގެ ބޮޑުބައެއް ނެގުމަށް މާޅޮހުގެ ކައުންސިލުން ފޮނުވާފައިވާ ސިޓީ އެޖަމިއްޔާއިން ގަބޫލު ނުކުރާ ކަމަށެވެ. އަދި މިއީ ޣައިރު ގާނޫނީ އަމަލެއްގެ ގޮތުގައި ސިފަކޮށް، އެޖަމިއްޔާއިން ވަނީ އެއަމަލު ކުށްވެރިކޮށްފައެވެ.

Advertisement

ޖަމިއްޔަތުލް ފަލާހުން ބުނީ މިފަދަ އަމަލުތަކަކީ، ލާމަރުކަޒީ ނިޒާމަށް ރާއްޖެ ފަށާފައިވާ ދަތުރުގައި، ކައުންސިލުތަކަށާއި، ދައުލަތާއި ސަރުކާރުގެ ނިޒާމުތަކަށް ރައްޔިތުން ކުރާ އިތުބާރު ގެއްލި، ހައްގުތައް ރައްކާތެރި ކުރެވޭނެކަން ޔަގީން ނުވާހާލަތަށް ގޮސްދާނެކަމެއްކަން އެ ޖަމިއްޔާއިން ގަބޫލުކުރާ ކަމަށެވެ. އަދި މިގޮތަށް ކަންތައްތައް ވަމުން އަންނާތީ، ކައުންސިލްތަކަށް ލާމަރުކަޒީ ނިޒާމުގެ ތެރެއިން އިތުރު ބާރުތައް ދިނުމާ ގުޅިގެން، ކައުންސިލުތަށް ހޭލުންތެރިކޮށް، ގާބިލުކަން އިތުރުކުރުމަށާއި، ކައުންސިލުން ކުރާ ކަންކަން މޮނިޓަރކޮށް ބެލޭނެ ނިޒާމުތައް ވަރުގަދަކުރުމަށް ދައުލަތާއި ސަރުކާރުގެ ގުޅުންހުރި އިދާރާތަކަށް އެޖަމިއްޔާއިން ވަނީ ގޮވާލާފައެވެ.

ފަލާހު ވެހި ބިމުގައި، ސަރުކާރުގެ ހިލޭއެހީގެ ދަށުން ހިނގަމުންދާ ޕްރޮޖެކްޓެއްގެ މަސައްކަތްތައް މިވަގުތުވެސް އަންނަނީ ކުރަމުންނެވެ. ޖަމިއްޔަތުލް ފަލާހަކީ މިވަގުތު މާޅޮހުގައި ހަރަކާތްތެރިވާ ހަމައެކަނި ޖަމިއްޔާއެވެ.

ސަރުކާރުގެ "ސްޓްރެޓީޖިކް އެކްޝަން ޕްލޭން 2015-2023" ގައި ވަރަށް ބޮޑު އިސްކަމެއް ޖަމިައްޔާތަކަށް ދީފައިވާއިރު، ޕޮލިސީ ތިނެއްގެ ދަށުން ހާސިލްކުރަން ކަނޑައަޅާފައިވާ ޓާރގެޓް 3.3ގައި 2023ގެ ނިޔަލަށް ލޯކަލް ކައުންސިލްތަކުގެ ފަސްދޮޅަސް އިންސައްތަ، ކައުންސިލުން މަދަނީ ޖަމިއްޔާތަކާއެކު ޕާރޓްނަރޝިޕް އެއްބަސްވުމުގައި ސޮއިކުރުމަށް ވަނީ ކަނޑައަޅާފައެވެ.

ޖަމިއްޔަތުލް ފަލާހުން ބުނީ މާޅޮހު ކައުންސިލުގެ މި އަމަލުންވެސް މިއަދުގެ ސަރުކާރުގެ ސިޔާސަތުތަކާއި ޕްލޭންތަކާ ދެކޮޅުކަން ހާމަވާ ކަމަށެވެ. މީގެ އިތުރުން އިޖްތިމާއީ މަރުކަޒު ފަދަ ރައްޔިތުންނާ ގުޅުންހުރި ކަންކަމުގައި އެކަށީގެންވާ މިންވަރަށް ރައްޔިތުންނާއި މަޝްވަރާކޮށްފައި ނުވާކަން ފާހަގަކޮށްފައިވެއެވެ.

ކަންމިހެން ހުރުމާއެކު، މިވަގުތުން ފެށިގެން، އެޖަމިއްޔާގެ ހިންގާކޮމިޓީގެ މެންބަރުން ފިޔަވާ އެއްވެސް މީހަކަށް، ޖަމިއްޔާގެ ރައީސްގެ ހުއްދަނެތި ޖަމިއްޔާގެ ގޯތިކަމުގައިވާ ފަލާހު ވެއްސަށް ވަނުމަކީ މަނާކަމެއްކަން އެޖަމިއްޔާއިން ވަނީ ކަނޑައަޅާފައެވެ. އަދި މާޅޮހު ކައުންސިލުގެ ނިންމުމަކީ ބަލައިނުގަނެވޭނެ ނިންމުމެއްކަމަށާ، އެނިންމުން އަނބުރާ ގެންދިއުމަށް އެޖަމިއްޔާއިން ވަނީ ގޮވާލާފައެވެ.