ރާއްޖޭގައި މިވަގުތު ބޭނުންކުރަމުންދާ ފައިޒަރ ވެކްސިންގެ މުއްދަތު ހަމަވާ ތާރީޚަކީ ފެބްރުއަރީ 2022 ކަމަށް ވޯލްޑް ހެލްތު އޯގަނައިޒޭޝަނުން އަންގައިފިއެވެ.
ހެލްތު ޕްރޮތެކްޝަން އެޖެންސީ (އެޗްޕީއޭ)ން ބުނީ، މިވަގުތު ރާއްޖޭގައި ބޭނުންކުރަމުންދާ ފައިޒާ ވެކްސިން (ބެޗް ނަންބަރ: FD7720)ގެ މުއްދަތު ހަމަވާ ތާރީޚަކީ ފެބްރުއަރީ 2022 ކަމަށް ވޯލްޑް ހެލްތު އޯގަނައިޒޭޝަނުން އަންގައިފައިވާ ކަމަށެވެ. މިގޮތުން ފެބްރުއަރީ 2022އާ ހަމައަށް ބޭނުންކުރެވޭނީ 'ތޯ' ނުކޮށް ހުންނަ، އަދި ފިނިހޫނުމިން 60- ޑިގްރީގައި ރައްކާކުރެވިފައިވާ ފައިޒާ ވެކްސިން ކަމަށެވެ.
މިހާރު ރާއްޖޭގެ އަތޮޅުތަކަށް ވެކްސިން ފޮނުވަނީ 'ތޯ' ކުރުމަށްފަހު 8-2 ޑިގްރީގެ ފިނިހޫނުމިނުގައި ރައްކާކުރާ ގޮތަށެވެ. 'ތޯ' ކޮށްފައިވާ ފައިޒާ ވެކްސިން ބޭނުންކުރެވޭނީ 'ތޯ' ކުރި ތާރީޚުން ފެށިގެން 30 ދުވަހުގެ މުއްދަތަކަށެވެ. އެހެންކަމުން އަތޮޅުތަކަށް ފޮނުވާފައިވާ ވެކްސިން ފެބްރުއަރީ 2022ގެ ކުރިން މުއްދަތު ހަމަވާނެއެވެ.
