ކައުންސިލް އިންތިހާބުގައި ވާދަކުރާ ކެންޑިޑޭޓުންގެ މަންދޫބަކަށް ވުމުގެ މުއްދަތު އިތުރުކޮށްފި

އަންނަ މެއި މަހުގެ ހަ ވަނަ ދުވަހު ބޭއްވުމަށް ނިންމާފައިވާ ލޯކަލް ކައުންސިލްގެ އިންތިހާބުގައި ވާދަކުރާ ކެންޑިޑޭޓުންގެ މަންދޫބަކަށް ވުމުގެ ފުރުސަތު އިލެކްޝަންސް ކޮމިޝަނުން އިތުރުކޮށްފި އެވެ.

އިލެކްޝަންސް ކޮމިޝަނުން ކޮށްފައިވާ އިއުލާނެއްގައި ވަނީ މެއި މަހުގެ ހަ ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިހާބުގެ ވޯޓުނެގުން އޮންނަ ދުވަހު، ވޯޓުނެގުމާއި ވޯޓު ގުނުމުގެ ކަންތައްތައް ހިނގާ ނުހިނގާ ގޮތް ބެލުމަށް، ކެންޑިޑޭޓުންގެ ފަރާތުން މަންދޫބަކަށް ވުމުގެ ފުރުސަތު އޭޕްރީލް މަހުގެ 8 ވަނަ ދުވަހުގެ 16:00 އާއި ހަމައަށް އިތުރުކޮށްފައިވާ ކަމަށެވެ.

މަންދޫބަކަށް ވުމުގެ މުއްދަތު އިލެކްޝަންސް ކޮމިޝަނުން އިތުރުކޮށްފައި މިވަނީ އެކި ފަހަރުމަތިން އިންތިހާބު ފަސްކުރަމުންދާ ދިއުމާއި ގުޅިގެންނެވެ.

ލާމަރުކަޒީ އުސޫލުން ރާއްޖެ ހިންގުމުގެ ގާނޫނުގައި ބުނެފައިވާ ތާރީހަށް ކައުންސިލްތަކުގެ އިއްތިހާބު ނުބޭއްވި މިހާރު މިވަނީ ދެ މަސް ފާއިތުވެ ގޮސްފަ އެވެ. އަދި އިންތިޚާބު ވަނީ ތިން ފަހަރެއްގެ މަތިން ފަސްކޮށްފައެވެ.

އިލެކްޝަންސް ކޮމިޝަނުން ބުނީ މަންދޫބުންނަށް ވާންއެދޭ ފަރާތްތަކުން، މާލޭގައި ނަމަ، އިންތިހާބީ މަރުކަޒު (ބައު ޖަމާލުއްދީން) ގެ ރިޝެޕްޝަނަށް އެކަމަށް އެދޭ ފޯމު ހުށަހެޅުމަށާއި، ރަށެއްގައި ނަމަ އެރަށެއްގެ އިލެކްޝަންސް ކޮމިޝަންގެ ފޯކަލް ޕޮއިންޓަށް ފޯމް ހުށަހެޅުމަށް އެދޭ ކަމަށެވެ.