އެއްވެސް ގައުމަކަށް އެކަނި ނޯވެވޭނެކަން އެނގި ހާމަވެއްޖެ: ޝެއިޚް ހަސީނާ
2021 ވަނަ އަހަރަކީ ރާއްޖެއާ ބަންގްލަދޭޝްގެ ގުޅުމަށް ތާރީޚީ އަހަރެއް
ޝެއިޚް ހަސީނާ ރައްޔިތުންގެ މަޖިލީހުގައި ތަގުރީރުކުރެއްވުން
އެއްވެސް ގައުމަކަށް އެކަނި އޮވެގެން ކުރިއެރޭނެ ކަމަށް ގަބޫލުފުޅުނުކުރައްވާކަމަށް ބަންގްލަދޭޝްގެ ބޮޑުވަޒީރު ޝެއިޚް ހަސީނާ ވިދާޅުވެއްޖެއެވެ.
ރައްޔިތުންގެ މަޖިލީހުގެ ދައުރުން ބޭރުގައި ބޭއްވި ޚާއްސަ ޖަލްސާގައި ޝެއިޚް ހަސީނާ ބައިވެރިވެވަޑައިގެން ވަނީ ތަގުރީރުކުރައްވާފައެވެ.
އެކަމަނާގެ ތަގުރީރުގައި ވަނީ، އެއްވެސް ގައުމަކަށް އެކަނި އޮވެވެގެން ކުރިއެރޭނެ ކަމަށް ގަބޫލުފުޅު ނުކުރައްވާކަމަށް ވިދާޅުވެފައެވެ. މުޅި ދުނިޔެއާ ކުރިމަތިލާންޖެހިފައިވާ ކޮވިޑް-19ގެ ވަބާއިންވެސް ލިބިފައިވާ ފިލާވަޅަކީ ގައުމުތައް ގުޅިގެން މަސައްކަތްކުރަންޖެހޭކަން ކަމުގައި ޝެއިޚް ހަސީނާ ވިދާޅުވިއެވެ.
އެކަމަނާ ވަނީ ރާއްޖެއާ ބަންގްލަދޭޝްއާ ދެމެދު އޮތް ޒަމާންވީ ގުޅުމުގެ މައްޗަށް އަލިއަޅުވާލައްވާފައެވެ. މިގޮތުން 2021 ވަނަ އަހަރަކީ ރާއްޖެއާ ބަންގްލަދޭޝްއާ ދެމެދު އޮތް ޒަމާންވީ ގުޅުމަށް ފާހަގަކޮށްލެވޭ އަހަރެއް ކަމަށް އެކަމަނާ ވިދާޅުވިއެވެ. މިގޮތުން ދެގައުމުގެ އިސް ބޭބޭފުޅުން ކުރެއްވި ދަތުރުފުޅުތަކާއި، އެ ދަތުރުފުޅުތަކުގައި ދެގައުމުގެ މަސްލަހަތު ހިމެނޭ މުހިންމު ކަންކަމާ ގުޅޭގޮތުން މަޝްވަރާތައް ކޮށްފައިވާކަމަށާއި، އަދި ގިނަ ދާއިރާތަކާ ގުޅުންހުރި ކަންކަމުގައި އެހީތެރިކަން ފޯރުކޮށްދެވިފައިވާކަމަށެވެ.
އަދި އެކި ދާއިރަތަކުން މި ގުޅުން އިތުރަށް ބަދަހިކުރެވޭނެ ކަމަށް ގަބޫލުކުރައްވާކަމަށް އެކަމަނާ ވިދާޅުވިއެވެ. މިގޮތުން ވިޔަފާރީގެ ގޮތުންނާއި، އިންވެސްޓްމެންޓާއި، ދެގައުމުގެ ގުޅުމުގެ އިތުރުން، ފަތުރުވެރިކަމާއި، އަދި ދެގައުމުގެ ރައްޔިތުންގެ ދެމެދުގައި އޮތް ގުޅުން ބަދަހިކުރެވޭނެ ކަމަށް އުންމީދުކުރައްވާކަމަށް ޝެއިޚް ހަސީނާ ވިދާޅުވިއެވެ.
ޝެއިޚް ހަސީނާ ވިދާޅުވީ ކުރިއަށް އޮތް 50 އަހަރަކީ ރާއްޖެއާ ބަންގްލަދޭޝްއާ ދެމެދު އޮތް ގުޅުމަށް އިތުރު ކުރިއެރުންތަކެއް ގެނުވައި، ދެގައުމުގެ ރައްޔިތުންގެ ދިރިއުޅުމުގެ ހާލަތަށްވެސް ބޮޑު ބަދަލެއް އަންނާނެ އަހަރުތަކެއް ކަމަށް ގަބޫލުކުރައްވާކަމަށެވެ.
ޝެއިޚް ހަސީނާ ރާއްޖެއަށް ކުރައްވަމުންގެންދަވާ ދަތުރުފުޅަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ދައުވަތަކަށް ކުރައްވާ ފުރަމާނަ ދަތުރުފުޅެކެވެ. މި ދަތުރުފުޅުގައި އެކަމަނާ ވަނީ ދިވެހި ދައުލަތުގެ އިސްވެރިންނާ ބައްދަލުކުރައްވާފައެވެ. އަދި ދެ ގައުމުގެ ދެމެދުގައި ގުޅުން ބަދަހިކުރުމާބެހޭ 4 އެއްބަސްވުމެއްގައި ވަނީ ސޮއިކުރައްވާފައެވެ.
