ރައީސުލްޖުމްހޫރިއްޔާ، ޝެއިޚް ހަސީނާއާ ބައްދަލުކުރައްވައިފި
23 ޑިސެމްބަރު 2021 | ބުރާސްފަތި 06:29ޝެއިޚް ހަސީނާގެ ޝަރަފުގައި 21 ބަޑީގެ ސަލާމެއް އެރުވި
ރައީސުލްޖުމްހޫރިއްޔާ ޝެއިޚް ހަސީނާއާ ބައްދަލު ކުރެއްވުން
ބަންގްލަދޭޝްގެ ބޮޑުވަޒީރު ޝޭޚު ހަސީނާއާ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ބައްދަލުކުރައްވައިފިއެވެ.
އެކަމަނާ ރާއްޖެއަށް ކުރައްވާ ދެ ދުވަހުގެ ފުރަމާނަ ދަތުރުފުޅުގައި މާލެއަށް ވަޑައިގަތުމުން ރައީސް އިބްރާހީމް މުހައްްމަދު ޞާލިޙާއި، ދައުލަތުގެ އިސްވެރިން ވަނީ އެކަމަނާއަށް ހޫނު މަރުހަބާއެއް ދަންނަވާފައެވެ. ރައީސް އޮފީހުގައި ކުރިއަށްދިޔަ މިބައްދަލުވުމަށްފަހު ވަޒީރުންގެ މަޖިލިސް ވެސް ހިމެނޭ ގޮތަށް ދެގައުމުގެ ދެމެދުގައި ރަސްމީ މަޝްވަރާތައް ވަނީ ބާއްވާފައެވެ. ބަންގްލަދޭޝާއި ރާއްޖޭގެ މަޝްވަރާތަކަށް ފަހު، ދެބޭޭފުޅުން ޖޮއިންޓް ޕްރެސް ބްރީފިންއެއް ދެއްވާނެއެވެ. މަޝްވަރާތަކާ ބެހޭ ތަފްސީލު އެ ބްރީފިންގައި ދެއްވާނެއެވެ.
ޝެއިޚް ހަސީނާގެ ޝަރަފުގައި 21 ބަޑީގެ ސަލާމެއް އެރުވިއެވެ. އެއަށް ފަަހު އެމްއެންޑީއެފްގެ ބޭންޑުން، ބަންގްލަދޭޝާއި ރާއްޖޭގެ ގައުމީ ސަލާމް ކުޅުނެވެ. އެމްއެންޑީއެފުން ވަނީ އެކަމަނާއަށް އޮނަރ ގާރޑެއް ވެސް އަރުވާފައެވެ.
ރައްޔިތުންގެ މަޖިލީހުގައި އެކަމަނާ ތަގުރީރު ކުރައްވާނީ، ބުރާސްފަތި ދުވަހުގެ ހަވީރުއެވެ.
ރާއްޖެއާއި ބަންގްލަދޭޝާ ދެމެދު ސޮއިކުރެއްވުމަށް ހަމަޖެހިފައިވާ އެއްބަސްވުންތަކުގެ ތެރޭގައި އެވޮއިޑެންސް އޮފް ޑަބަލް ޓެކްސޭޝަން، ގައިދީން ބަދަލުކުރުމުގެ އެއްބަސްވުމަކާއި ޒުވާނުންނާއި ކުޅިވަރާ ގުޅޭދާއިރާގެ އެއްބަސްވުމެއް ހިމެނެއެވެ. އަދި ސިއްޙީ ދާއިރާއިން މީހުން ތަމްރީނުކުރުމަށް ރާއްޖެއާއި ބަންގްލަދޭޝްއާދެމެދު ވެފައިވާ އެއްބަސްވުން އައުކުރުމަށް ވެސް ވަނީ ހަމަޖެހިފައެވެ.
