ފިލިޕީންސްގައި ޙާލުގައި ޖެހިފައިތިބި ދަރިވަރުން ވަގުތީ ހިޔާއަށް ބަދަލުވުމަށް ސަރުކާރުން މާލީ އެހީތެރިކަން ފޯރުކޮށްދިނުމަށް ނިންމައިފި

ފިލިޕީންސްގެ ބައެއް ސަރަޙައްދުތަކަށް އެރި ބާރުގަދަ ތޫފާން "ރާއީ"ގެ ސަބަބުން އެ ޤައުމުގެ ސޭބޫ ސިޓީގައި ތަޢުލީމު ޙާޞިލުކުރަމުންދާ ދިވެހި ދަރިވަރުންތަކެއް ދިރިއުޅެމުން ދިޔަ ޑޯމިޓަރީއަށް ބޮޑެތި ގެއްލުންތަކެއް ވުމާގުޅިގެން، ޙާލުގައި ޖެހިފައިވާ ދަރިވަރުން އަސާސީ ޚިދުމަތްތައް ލިބެންހުރި ހިޔާވައްސަކަށް ވަގުތީގޮތުން ބަދަލުވުމަށްޓަކައި، އެންސްޕާއާއި ޒަކާތު ފަންޑު މެދުވެރިކޮށް ދިވެހި ސަރުކާރުން މާލީ އެހީތެރިކަން ފޯރުކޮށްދިނުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ނިންމަވައިފިއެވެ.

އެކަމާގުޅިގެން ފޮރިން މިނިސްޓްރީން ބުނީ، އެދަރިވަރުންނަށް ފެނާއި ކަރަންޓު ކެނޑި، މުވާޞަލާތީ އަދި އެހެނިހެން އަސާސީ ޚިދުމަތްތަކަށް ބުރޫއެރުމުގެ ސަބަބުން ދަރިވަރުން ދިރިއުޅެމުން ދިޔަ ސަރަޙައްދަށް ކަރަންޓުގެ ޚިދުމަތް އިޢާދަކޮށް، ފެނާއި އެހެނިހެން އަސާސީ ޚިދުމަތްތައް ދިނުމަށް ފިލިޕީންސްގެ ސަރުކާރުން މަސައްކަތްކުރަމުންދާ ކަމަށެވެ. އެކަމަށް މަހެއްހާ ދުވަސް ހޭދަވާނެކަމަށް ބެލެވޭކަމުގެ މަޢުލޫމާތު ފިލިޕީންސްގެ އެމްބަސީން ދެއްވާފައިވާތީ، މި އެހީ ދިނުމަށް ސަރުކާރުން ނިންމާފައިވަނީ އެއް މަސްދުވަހުގެ މުއްދަތަށް ކަމަށް ސަރުކާރުން ބުނެއެވެ.

މިގޮތަށް ނިންމެވުމާ ގުޅިގެން، އެ ދަރިވަރުންނަށް މާލީ އެހީތެރިކަން ފޯރުކޮށްދިނުމުގެ މަސައްކަތް މިނިސްޓްރީއިން ކަމާގުޅުން ހުރި އިދާރާތަކާއެކު ކުރަމުންގެންދާކަމަށްވެސް ފޮރިން މިނިސްޓްރީން ބުނެއެވެ.

ފޮރިން މިނިސްޓްރީން މީގެކުރިން ބުނީ، ތޫފާނާ ގުޅިގެން ބައެއް ސަރަޙައްދުތަކަށް ބޮޑެތި ގެއްލުންތަކެއް ލިބެމުންދާތީ، އެޤައުމުގައި ތިބި ދިވެހި ދަރިވަރުންގެ ހާލު ވަރަށް ގާތުން ބަލަމުންދާ ކަމަށެވެ. އަދި ހުރިހާ ދަރިވަރުންގެ ވެސް ހާލު ރަނގަޅު ކަމަށް މިނިސްޓްރީން ބުނެފައިވެއެވެ.