ޝަރުތަކާއެކު ޖާބިރު ދޫކޮށްލައިފި
ދޫކޮށްލީ ޢަލީ މުޙައްމަދަށް 10 ދުވަހުގެ ތެރޭގައި މުސާރަ ދިނުމަށް ޝަރުތުކުރުމަށްފަހު
ކާށިދޫ ދާއިރާގެ މެންބަރު އަބްދުﷲ ޖާބިރު
ކާށިދޫ ދާއިރާގެ މަޖިލިސް މެންބަރު އަބްދުﷲ ޖާބިރު ކޯޓަށް ހާޒިރުކުރުމަށްފަހު ޝަރުތަކާއެކު ދޫކޮށްލައިފިއެވެ.
ރާއްޖެ އެމްވީއަށް އެނގިފައިވާ ގޮތުގައި ޖާބިރު ހައްޔަރުކޮށްފައިވަނީ ބުދަ ދުވަހުގެ ވަގުތެއްގައި ގދ. ތިނަދޫގައި ހުންނަވަނިކޮށެވެ.
މައުލޫމާތު ލިބިފައިވާ ގޮތުގައި ޖާބިރު ހައްޔަރުކޮށްފައިވަނީ ސިވިލް ކޯޓުން އޭނާ ކޯޓަށް ހާޒިރު ކުރަން ނެރެފައިވާ އަމުރެއް ތަންފީޒު ކުރުމުގެ ގޮތުންނެވެ. ސިވިލް ކޯޓުގައި ބުދަ ދުވަހުގެ ހެނދުނު 10:00ށް ތާވަލުކޮށްފައިވަނީ ޖާބިރުގެ ކުންފުނި ޔޮޓް ޓުއަރސްގެ މައްޗަށް ސަބިތުވެފައިވާ ސާބިތު ދަރަންޏެއްގެ މައްސަލައެވެ.
ޖާބިރު ކޯޓަށް ހާޒިރު ކުރި މައްސަލައަކީ ޔޮޓް ޓުއަރސްއިން އެ ކުންފުނީގެ މުވައްޒަފަކަށް ދޭން ވަޒީފާއާބެހޭ ޓްރަބިއުނަލުން ކޮށްފައިވާ އަމުރަކާ ގުޅިގެން، އެ މުވައްޒަފަށް ދޭންޖެހޭ ފައިސާ ދީފައި ނުވާތީ ކޮށްފައިވާ ދައުވާއެކެވެ. މި ދައުވާ ކޮށްފައިވަނީ ޅ. ނައިފަރު ފަތަނގުމާގެ އަލީ މުހައްމަދެވެ.
މި މައްސަލައަކީ ވަޒީފާއާ ބެހޭ ޓްރަބިއުނަލުން 2020 ވަނަ އަހަރުގެ އޮކްޓޯބަރ މަހުގެ 20 ވަނަ ދުވަހު ނިންމާފައިވާ މައްސަލައެކެވެ. މި މައްސަލައިގައި ޔޮޓް ޓުއަރސް ވަޒީފާއާ ބެހޭ ޓްރަބިއުނަލަށް ހާޒިރުވާން އެންގި ނަމަވެސް ހާޒިރުވެފައި ނުވާތީ މައްސަލަ ނިންމާފައިވަނީ އެ ކުންފުނީގެ ޣައިރު ހާޒިރުގައެވެ.
ވަޒީފާއާ ޓްރަބިއުނަލްގެ ނިންމުމުގައި ބުނެފައިވަނީ ޢަލީ މުޙައްމަދަށް މުސާރައިގެ ގޮތުގައި ކޮންމެ މަހަކު 3,000 އެމެރިކާ ޑޮލަރު ނުވަތަ 46,260 ރުފިޔާ ލިބޭކަން 7 ޖުލައި 2019 ގައި ޔޮޓް ޓުއަރސް މޯލްޑިވްސް ޕްރައިވެޓް ލިމިޓެޑްގެ ފަރާތުން ޢަލީ މުޙައްމަދަށް ދީފައިވާ 'ސެލަރީ އައުޓް ސްޓޭންޑިންގ' ލިޔުމުން އެނގެން އޮންނަ ކަމަށެވެ.
އަދި ޔޮޓް ޓުއަރސް މޯލްޑިވްސް ޕްރައިވެޓް ލިމިޓެޑްގައި ޢަލީ މުޙައްމަދު 2017 ވަނަ އަހަރުގެ އެޕްރީލް މަހުން ފެށިގެން ވަޒީފާ އަދާކޮށްފައިވާކަން އެނގެން އޮންނާތީ އާއި ޢަލީ މުޙައްމަދު މަސައްކަތްކުރި 2017 ވަނަ އަހަރުގެ ޖޫން މަހުން ފެށިގެން 2017 ވަނަ އަހަރުގެ ޑިސެންބަރު މަހުގެ ނިޔަލަށާއި 2018 ވަނަ އަހަރުގެ ނޮވެންބަރު މަހާއި ޑިސެންބަރު މަސް އަދި 2019 ވަނަ އަހަރުގެ ޖަނަވަރީ މަހުން ފެށިގެން 2019 ވަނަ އަހަރުގެ ޖުލައި މަހުގެ ނިޔަލަށްވާ މުސާރައާއި ޢިނާޔަތުގެ ގޮތުގައި ލިބެންޖެހޭ ޖުމްލަ 713960 (ހަތްލައްކަ ތޭރަހާސް ނުވަސަތޭކަ ފަސްދޮޅަސް ރުފިޔާ) ދީފައިނުވާކަމަށް ޤަބޫލުކުރެވޭތީ، މި ފައިސާއަކީ ޔޮޓް ޓުއަރސް ޕްރައިވެޓް ލިމިޓެޑްގެ ފަރާތުން ޢަލީ މުޙައްމަދަށް ދޭންޖެހޭ ފައިސާކަމަށް ކަނޑައަޅައި، 20 އޮކްޓޫބަރު 2020 އިން ފެށިގެން 14 (ސާދަ) ދުވަސް ތެރޭގައި ޢަލީ މުޙައްމަދަށް އެކީ އެއްފަހަރާ ދިނުމަށް އަންގާފައިވެއެވެ.
ޖާބިރު ބުދަ ދުވަހު ކޯޓަށް ހާޒިރުކުރުމަށްފަހު, ދޫކޮށްލީ ޢަލީ މުޙައްމަދަށް 10 ދުވަހުގެ ތެރޭގައި މުސާރަ ދިނުމަށް ޝަރުތުކުރުމަށްފަހުއެވެ.
