ގްރީން ޒޯން ހިމެނޭ ގޮތަށް ބައެއް ސަރަހައްދުތައް ބަންދު ކުރަނީ

ބަންގްލަދޭޝްގެ ބޮޑުވަޒީރު ޝައިޚް ހަސީނާ ރާއްޖެއަށް ކުރައްވާ ފުރަމާނަ ދަތުރުފުޅާ ގުޅިގެން ބުރާސްފަތި ދުވަހުގެ ވަކި ވަގުތުތަކެއްގައި ގްރީން ޒޯން ހިމެނޭހެން ބައެއް މަގުތައް ބަންދުވާނެކަމަށް ފުލުހުން ބުނެފިއެވެ.

ޝައިޚް ހަސީނާ ދިވެހިރާއްޖެއަށް ކުރައްވާ ރަސްމީ ދަތުރުފުޅާ ގުޅިގެން މާލޭ ސިޓީގައި ކުރިއަށް ގެންދާ ހަރަކާތްތަކާ ގުޅިގެން ސަލާމަތީ ސަބަބުތަކަށްޓަކައި ގްރީން ޒޯން ހިމެނޭހެން ރައްޔިތުންގެ މަޖިލިސް ކުރިމަތިން އޮންނަ ޕާކިން ޒޯނާއި، ޝަހީދު ހުސައިން އާދަމް ބިލްޑިންގ ފަހަތުގައި އޮންނަ ޕާކިން ޒޯން ހުސްކުރުމަށް ވަނީ އަންގާފައެވެ.

ބަންދުކުރުމަށް ނިންމާފައިވަނީ އެމްއެމްއޭ ކުރިމަތިން ބޮޑުތަކުރުފާނު މަގުން ފެށިގެން ގޮސް ރައީސް އޮފީހުގެ އިރުމަތީ ކަންމައްޗާ ހަމައަށް، އަދި އިސްލާމީ މަރުކަޒު ޗާންދަނީ މަގު ކަންމަތިން ފެށިގެން ގޮސް މަޖީދިއްޔާ ސްކޫލާ ހަމައަށާއި، އެ މަގުތަކާ ގުޅިފައިވާ ހުރަސް މަގުތަކުގެ އިތުރުން ސަލްޓަން ޕާކް ކުރިމަތިން ކުރީގެ ދިރާގު އިމާރާތް ހުރި ޖަންކްޝަނުން ފެށިގެން ގޮސް އާޓް ގެލެރީއާއި އެ މަގުތަކާ ގުޅިފައިވާ ގޯޅިތަކެވެ. މީގެ އިތުރުން ރައްޔިތުންގެ މަޖިލިސް ހިމެނޭ ސަރަހައްދުތަކުގެ ބައެއް މަގުތަކާއި ގޯޅިތައް ބަންދުކުރުމަށް ވަނީ ނިންމާފައެވެ.

މަގުތައް ބަންދުކުރުމަށް ނިންމާފައިވަނީ ބުރާސްފަތި ދުވަހުގެ ހެނދުނު 07:00 އިން ފެށިގެން ރޭގަނޑު 9:00 އާއި ހަމައަށެވެ. އަދި އެކި ވަގުތުތަކުގައި ފައިމަގުގައި އުޅޭ މީހުންނާއި ދުއްވާ ތަކެއްޗަށް ނުވަދެވޭ ގޮތަށް މަގުތައް ބައެއް މަގުތައް ބަންދުކުރުމަށްވަނީ ހަމަޖެހިފައެވެ.

ހަމައެއާއެކު މި ސަރަހައްދުގައި ހުރި ޕާކިންގ ޒޯންތައް ހުސްކުރުމަށް ހަމަޖެހިފައިވާތީ ބުދަ ދުވަހުގެ ރޭގަނޑު 10:00ގެ ކުރިން ޕާކިންގ ޒޯންތަކުގައި ހުރި އުޅަނދުތައް ނަގައި ޒޯންތައް ހުސްކޮށްދިނުމަށް ފުލުހުން ވަނީ އެދިފައެވެ. އަދި އެކި ވަގުތުތަކުގައި އެސަރަހައްދަށް އެކި ބޭނުންތަކަށްދާ ފަރާތްތަކުން ފުލުހުން އަންގާ ގޮތެއްގެމަތިން އަމަލުކުރުމަށް ވަނީ އަންގާފައެވެ.