ފިލިޕީންސަށް އެރި ތޫފާނުގައި މަރުވި މީހުންގެ އަދަދު 400ން މައްޗަށް، ސަލާމަތްވި މީހުން ފެނާއި ކާބޯތަކެއްޗަށް ޖެހިފައި

ފިލިޕީންސަށް އެރި ތޫފާން ރާއީގައި ސަލާމަތްވި ފަރާތްތަކުން ފެނާއި ކާބޯތަކެއްޗަށް ޖެހިފައިވާކަމަށް އެގައުމުގެ އޮފިޝަލުން ބުނެފިއެވެ.

ތޫފާން ރާއީގައި އެގައުމުގެ އެތައް ހާސް ބަޔަކު ދިރިއުޅެމުންދާ ގޯތިގެދޮރު ހަލާކުވެފައިވާއިރު، ފެންބޮޑުވުމުގެ ސަބަބުން ގިނަ ސަރަހައްދުތަކުން ކަރަންޓް ކަނޑައިގެން ގޮސް އެކި ފޯނު ލައިންތައް ވަނީ ކަނޑައިގެން ގޮސްފައެވެ. މިއާއެކު ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށްވެސް އަންނަނީ ދަތިތަކާ ކުރިމަތިވަމުންނެވެ.

މިދިޔަ ހަފުތާގެ ބުރާސްފަތި ދުވަހު ފިލިޕީންސަށް އެރި ތޫފާން ރާއީއަކީ މިއަހަރު އެރި އެންމެ ބާރުގަދަ ތޫފާނެވެ. މިތޫފާނުގައި މަރުވި މީހުންގެ އަދަދު 400ށް އަރާއިރު، ގެއްލުންލިބުނު މީހުންގެ އަދަދު 1.8 މިލިއަނަށް އަރައެވެ. ތޫފާނުގެ ސަބަބުން އެކި ހިސާބުތަކަށް ގޮސްފައިވާ މީހުންގެ އަދަދު 630،000ށް އަރާކަމަށް އދ.ން ބުނެއެވެ.

ތޫފާންގެ ސަބަބުން ހާލުގައި ޖެހިފައިވާ މީހުންނަށް ބޭނުންވާ ކާނާގެ ބާވަތްތައް މަދުވަމުންދާކަމަށާއި، ކުރިޔަށް އޮތް މަދު ދުވަސްތަކުގެ ތެރޭގައި ކާނާ އެއްކޮށް ހުސްވެދާނެކަމުގެ ބިރު އެބައޮތްކަމަށް ތޫފާންގެ އަސަރު އެންމެ ބޮޑަށް ކޮށްފައިވާ އެއް ޓައުންކަމުގައިވާ ޓޫބަޖޮން ޓައުންގެ މޭޔަރ ޕެޑްރަބްލަންސާ ވިދާޅުވިއެވެ.

އެސަރަހައްދުގައި ހުރި 2000ށްވުރެ ގިނަ ގެތަކުގެ ތެރެއިން ސަލާމަތްވެފައިވަނީ އެންމެ ނުވަ ގެ ކަމަށް މޭޔަރ ވިދާޅުވިއެވެ.

ތޫފާނުގައި ހާލުގައި ޖެހިފައިވާ މީހުންނަށް އެހީތެރިވުމަށް ކޯސްޓް ގާޑުން މަސައްކަތްކުރާއިރު އެސަރަހައްދުގައި ތިބި ބޭރު ގައުމުތަކުގެ ފަތުރުވެރިންވެސް ރައްކާތެރި ހިސާބުތަކަށް ގެންދިޔުމުގެ މަސައްކަތް ފިލިޕީންސްގެ ރެޑް ކްރޮސްއިން ގެންދަނީ ކުރަމުންނެވެ.

މިހާތަނަށް މިތޫފާންގައި 375 މީހުން މަރުވެފައިވާއިރު 56 މީހުން ވަނީ ގެއްލިފައިކަމަށް ފިލިޕީންސް ފުލުހުން ވަނީ ބުނެފައެވެ. އަދި 500ށްވުރެ ގިނަ މީހުން ވަނީ ޒަޚަމްވެފައެވެ.

މިތޫފާންގައި ގެއްލުންވި މީހުންނަށް އެހީވުމަށް 200 މިލިއަން އެމެރިކާ ޑޮލަރު ދިނުމަށް އެގައުމުގެ ރައީސް ވަނީ ވައުދުވެވަޑައިގެންފައެވެ. މީގެއިތުރުން ޖަޕާން، ޗައިނާ އަދި އދ.ން ވެސް ވަނީ ތޫފާންގައި ގެއްލުންވި މީހުންނަށް އެހީވެދޭނެކަމަށް ބުނެފައެވެ.

ފިލިޕީންސަށް މިހާތަނަށް އެރި އެންމެ ބާރު ގަދަ ތޫފާން އަރާފައިވަނީ 2013 ވަނަ އަހަރުއެވެ. އެތޫފާންގައި މަރުވި މީހުންގެ އަދަދު 6300ށް އަރައެވެ.