ހުޅުމާލޭގެ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފްލެޓް ސަރަހައްދަށް އެމްޓީސީސީން ކުރާ ބަސްދަތުރުތައް އިތުރުކޮށްފިއެވެ.

މީގެ ކުރިން އެސަރަހައްދަށް ބަސް ދަތުރުކުރަމުން އައީ ކޮންމެ 30 މިނެޓަކުންނެވެ. ނަމަވެސް މި ގެނެވުނު ބަދަލުތަކާއެކު ކޮންމެ ދުވަހެއްގެ ހެނދުނުން ފެށިގެން ޕީކް ގަޑިތަކުގައި ކޮންމެ 15 މިނެޓަކުން ބަސް ދަތުރުކުރުމަށް ވަނީ ހަމަޖެހިފައެވެ. މިގޮތަށް ދަތުރުކުރަން ފަށަފައިވަނީ އަންގާރަ ދުވަހުން ފެށިގެންނެވެ.

ހުޅުމާލޭގެ ދެވަނަ ފިޔަވަހީގެ ބަސް ދަތުރުތައް ފަށާނީ ހެނދުނު 05:45ން ފެށިގެންނެވެ. އަދި މެންދުރުފަހު 14:45 އާއި ހަމައަށް ކޮންމެ 15 މިނެޓަކުން ބަސް ދަތުރުކުރާނެއެވެ. އޭގެ ފަހުން ދަންވަރު 00:15 އާ ހަމައަށް ދަތުރުތައް އޮންނާނީ ކޮންމެ 30 މިނެޓަކުންނެވެ.

ހިޔާ ފްލެޓުތަކުގައި މީހުން ދިރިއުޅެންފެށިތާ ގާތްގަނޑަކަށް ހަތަރު މަސްވެފައި ވާއިރު، މިހާރު އެފްލެޓުތަކުގައި 1،500 ށްވުރެ ގިނަ އާއިލާ އަންނަނީ ދިރިއުޅެމުންނެވެ. އެހެންކަމުން ހެނދުނު ގަޑީގައި ސްކޫލަށް ދިއުމާއި، އޮފީސްތަކަށް ދިއުމަށް ގިނަ ބަޔަކު ބަހުގެ ޚިދުމަތް ހޯދަމުން އަންނައިރު، ބަސްތައް އޮންނަނީ ފުރިބާރުވެފައެވެ. ނަމަވެސް މި ގެނެވުނު ބަދަލާއެކު ބަސްތަކާއި ބަސް ސްޓޭޝަންތަކުގައި ތޮއްޖެހުމުގެ މައްސަލައަށް ހައްލު ލިބިގެންދާނެއެވެ.