ޝެއިޚް ހަސީނާ ރާއްޖެއަށް ކުރައްވާ ދަތުރުފުޅުގައި 4 އެއްބަސްވުމެއްގައި ސޮއިކޮށް، 13 އަސްކަރީ އުޅަނދު ހަދިޔާކުރައްވާނެ
ރައްޔިތުންގެ މަޖިލީހުގައި ބުރާސްފަތި ދުވަހުގެ ހަވީރު 4:00ގައި އެކަމަނާ ތަގުރީރު ކުރައްވާނެ
ޝެއިޚް ހަސީނާ - ބަންގްލަދޭޝްގެ ބޮޑުވަޒީރު
ބަންގްލަދޭޝްގެ ބޮޑު ވަޒީރު ޝެއިޚް ހަސީނާ ރާއްޖެއަށް ކުރައްވާ ފުރަމާނަ ދަތުރުފުޅުގައި 4 އެއްބަސްވުމެއްގައި ސޮއިކޮށް، 13 އަސްކަރީ އުޅަނދު ރާއްޖެއަށް ހަދިޔާކުރައްވާނެކަން ހާމަކޮށްފިއެވެ.
މިކަން ހާމަކުރައްވާފައިވަނީ ޝެއިޚް ހަސީނާ ރާއްޖެއަށް ކުރައްވާ ދަތުރުފުޅާ ގުޅޭ ގޮތުން އެ ގައުުމުގެ ފޮރިން މިނިސްޓަރު ޑރ. އޭކޭ އަބްދުލް މޫމިން ބޭއްވެވި ނޫސްވެރިންގެ ބައްދަލުވުމެއްގައެވެ. ބަންގްލަދޭޝްގެ ބޮޑުވަޒީރު ރާއްޖެއަށް ކުރައްވާ މި ދަތުރުފުޅުގައި ރާއްޖެ ވަޑައިގަންނަވާނީ ބުދަ ދުވަހުގެ މެންދުރުފަހުގެ ވަގުތެއްގައެވެ. ސޮއިކުރެއްވުމަށް ހަމަޖެހިފައިވާ އެއްބަސްވުންތަކުގެ ތެރޭގައި އެވޮއިޑެންސް އޮފް ޑަބަލް ޓެކްސޭޝަން، ގައިދީން ބަދަލުކުރުމުގެ އެއްބަސްވުމަކާއި ޒުވާނުންނާއި ކުޅިވަރާ ގުޅޭދާއިރާގެ އެއްބަސްވުމެއް ހިމެނެއެވެ. އަދި ސިއްޙީ ދާއިރާއިން މީހުން ތަމްރީނުކުރުމަށް ރާއްޖެއާއި ބަންގްލަދޭޝްއާދެމެދު ވެފައިވާ އެއްބަސްވުން އައުކުރުމަށް ވެސް ވަނީ ހަމަޖެހިފައެވެ.
ރަސްމީކޮށް މަރުހަބާ ދެންނެވުމުގެ ގޮތުން ބުރާސްފަތި ދުވަހު އެކަމަނާއަށް ގާރޑް އޮފް އޮނަރއެއް އަރުވާނެއެވެ. ދެގައުމުގެ ދެމެދުގައި ރަސްމީ މަޝްވަރާތަކަށްފަހު ގުޅިފައިވާ ބަޔާނެއް ދެއްވުމަށްވަނީ ހަމަޖެހިފައެވެ. އެއަށްފަހު ސޮއިކުރެއްވުމަށް ހަމަޖެހިފައިވާ އެއްބަސްވުންތަކުގައި ސޮއި ކުރައްވާނެއެވެ. އެއަށްފަހު ރައްޔިތުންގެ މަޖިލީހުގައި ބުރާސްފަތި ދުވަހުގެ ހަވީރު 4:00ގައި އެކަމަނާ ތަގުރީރު ކުރައްވާނެއެވެ.
މި ދަތުރުފުޅުގައި ނާއިބުރައީސް ފައިސަލް ނަސީމާއި، ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، އުއްތަމަ ފަނޑިޔާރު މުއުތަސިމް އަދުނާނާ ހޮޓެލް ޖެންގައި ބައްދަލު ކުރައްވާނެއެވެ.
މި މަހުގެ 24 ވަނަ ދުވަހު ރާއްޖޭގައި އުޅޭ ބަންގްލަދޭޝްގެ ރައްޔިތުންނާ ވާރޗުއަލްކޮށް އެކަމަނާ ބައްދަލު ކުރައްވާނެއެވެ. މި ދަތުރުފުޅު ނިންމަވާލެއްވުމަށްފަހު އެނބުރި ގައުމަށް ވަޑައިގަންނަވާނީ މި މަހުގެ 27 ވަނަ ދުވަހު ކަމަށް ބަންގްލަދޭޝްގެ މީޑިއާއިން ވަނީ ރިޕޯޓްކޮށްފައެވެ.
