އެމްޓީސީސީގެ ސްކޮލަރޝިޕްތަކަށް އަންހެން މުވައްޒަފުން ކުރިމަތިލުމަށް އާޒިމް ހިތްވަރުދެއްވައިފި
އެމްޓީސީސީން ވަނީ އެކި ދާއިރާތަކުން 11 ސްކޮލަރޝިޕެއް ތައާރަފުކޮށްފައި
އެމްޓީސީސީގެ ސީއީއޯ އާދަމް އާޒިމް ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަނީ
އެމްޓީސީސީއިން ތައާރަފުކޮށްފައިވާ ސްކޮލަރޝިޕްތަކަށް އެ ކުންފުނީގެ އަންހެން މުވައްޒަފުން ކުރިމަތިލުމަށް ސީއީއޯ އާދަމް އާޒިމް ގޮވާލައްވައިިއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އާޒިމް ވިދާޅުވީ ރައްޔިތުންނަށް ތައުލީމު ފޯރުކޮށްދިނުމަކީ މި ސަރުކާރުގެ ވަރަށް މުހިންމު ސިޔާސަތެއް ކަމަށެވެ. އެމްޓީސީސީން ވެސް އެ ސިޔާސަތު ހިފަހައްޓަމުން ދާކަމަށް އާޒިމް ވިދާޅުވިއެވެ.
އާޒިމް ވިދާޅުވީ އެ ކުންފުންޏަށް އަހަރު ފުރުމާއި ގުޅިގެން ބޭއްވި ޚާއްސަ ޖަލްސާގައި އެ ކުންފުނިން 11 ސްކޮލަރޝިޕެއް ތައާރަފުކޮށްފައިވާކަމަށެވެ. މިއީ 5 އަހަރު ދުވަހަށް ބަޖެޓުކޮށްގެން ކުރިއަށްގެންދާ ޕްރޮގްރާމެއް ކަމަށާއި، ކޮންމެ އަހަރަކު ވެސް 10 ނުވަތަ 15 ކުދިންނަށް އެކިއެކި ދާއިރާތަކުން ސްޕޮލަރޝިޕްތައް ދޫކުރާނެ ކަމަށް އާޒިމް ވިދާޅުވިއެވެ. މީގެ ތެރޭގައި ރާއްޖެއަށް މިވަގުތު އެންމެ ބޮޑަށް ބޭނުންވާ ދާއިރާތައް ކަމަށްވާ އިންޖީނިއަރިން ދާއިރާ ފަދަ އެތައް ދާއިރާއެއް ހިމެނޭނެ ކަމަށް އާޒިމް ވިދާޅުވިއެވެ.
އާޒިމް ވަނީ މި ސްކޮލަރޝިޕްތަކަށް އެ ކުންފުނީގެ ވީހާވެސް ގިނަ އަންހެން މުވައްޒަފުން ކުރިމަތިލުމަށް އިލްތިމާސްކުރައްވާފައެވެ. އަދި ޖިންސީ ހަމަހަމަކަން ގާއިމްކޮށްގެން މެނުވީ ގައުމު ކުރިއަރައިގެންނުދާނެ ކަމަށް އާޒިމް ވިދާޅުވިއެވެ.
މީގެ އިތުރުން އާޒިމް ވިދާޅުވީ އެ ކުންފުނީގެ އިންސާނީ ވަސީލަތްތައް ވަރުގަދަކުރުމުގެ މަސައްކަތްތަކެއް ވެސް ކުރިއަށްދާކަމަށެވެ. އެމްޓީސީސީން ކުރާ ގިނަ މަސައްކަތްތައް މީގެ ކުރިން ކޮށްފައިވަނީ ރާއްޖެއިން ބޭރުން މިކަމުގެ ފަންނީ މީހުން ގެނެސްގެން ކަމަށް އާޒިމް ވިދާޅުވިއެވެ. އެހެންނަމަވެސް މިހާރު އެ މަސައްކަތްތައް އަދި މީގެ ކުރިން ކޮށްފައިނުވާވަރުގެ ބޮޑެތި މަސައްކަތްތައް ވެސް ކުރަމުންދަނީ މިވަގުތު އެ ކުންފުނީގައި ތިބި ދިވެހި މުވައްޒަފުން ކަމަށް އާޒިމް ވިދާޅުވިއެވެ.
