ބަންގަލަދޭޝްގެ ބޮޑުވަޒީރު މަޖިލީހުގައި ތަގުރީރު ކުރެއްވުމަށް ދައުވަތު އަރުވަން ނިންމަވައިފި

ބަންގަލަދޭޝްގެ ބޮޑުވަޒީރު ޝެއިޚް ހަސީނާ ރާއްޖެއަށް ކުރައްވާ ފުރަމާނަ ދަތުރުފުޅުގައި ރައްޔިތުންގެ މަޖިލީހުގައި ތަގުރީރު ކުރެއްވުމުގެ ދައުވަތު އަރުވަން ނިންމައިފިއެވެ.

ދައުވަތު އެރުވުމަށް ފާސްކުރީ މިކަމަށްޓަކައި ދައުރުން ބޭރުގައި ބޭއްވި ޚާއްސަ ޖަލްސާގައި ބައިވެރިވެވަޑއިގެންނެވި 44 މެމްބަރުންގެ އިއްތިފާގުންނެވެ.

Advertisement

ހޯމަދުވަހު މިކަމަށްޓަކައި އޮތް ޚާއްސަ ޖަލްސާއަށް މަޖިލީހުގައި ދަފްތަރުގައި ހިމެނިވަޑައިގަންނަވާ ހުރިހާ ސިޔާސީ ޕާޓީއަކަށް ދައުވަތު ދެއްވާފައިވާއިރު، ޖަލްސާއަށް އިދިކޮޅު ކޯލިޝަން އަދި ޖުމްހޫރީ ޕާޓީން އެއްވެސް މެމްބަރެއް ވަޑައެއް ނުގަންނަވައެވެ. މަޖްލީހުގެ ރައީސް މުހައްމަދު ނަޝީދު ވިދާޅުވީ، އެ ޕާޓީތަކުން ވަޑައިނުގަތް ނަމަވެސް ޖަލްސާ ބޭވުމަށް އެއްވެސް ޕާޓީއަކުން ދެކޮޅު ކަމެއް ހާމަކޮށްފައި ނުވާ ކަމަށެވެ.

ފުރަމާނަ ދަތުރުފުޅެއްގައި ރާއްޖެއަށް ޒިޔާރަތް ކުރެއްވުމަށް ހަމަޖެހިފައިވާ ބަންގްލަދޭޝްގެ ބޮޑުވަޒީރު ހަރ އެކްސެލެންސީ ޝައިޚް ހަސީނާ ރައްޔިތުންގެ މަޖިލީހަށް ޒިޔާރަތްކުރައްވައި ރައްޔިތުންގެ މަޖިލީހުގައި ތަގުރީރު ކުރެއްވުމަށް މަޖިލީހަށް ވަޑައިގެންދެއްވުމަށް ދައުވަތު އެރުވުމުގެ މައްސަލައަށް އެމްޑީޕީގެ ފަރާތުން ވާހަކަދައްކަވަމުން ޕީޖީ ލީޑަރ އަލީ އާޒިމް ވިދާޅުވީ، ބަންގްލަދޭޝަކީ ދިވެހިންގެ ތަރައްގީގެ މުހިންމު ބައިވެރިއެއް ކަމަށެވެ. ބަންގްލަދޭޝްގެ މަސައްކަތްތެރިންގެ ހިއްސާ ރާއްޖޭގެ އުމްރާނީ ތަރައްގީގައި ބޮޑު ކަމަށާއި، ސުނާމީގައިވެސް ރާއްޖެއަށް ބޮޑެތި އެހީތަކެއް ބަންގްލަދޭޝްއިން ފޯރުކޮށްދީފައިވާ ކަމަށެވެ. އަދި ކޮވިޑްގައިވެސް އެ ގައުމުން ރާއްޖެއަށް ބޮޑެތި އެހީތަކެއް ވެފައިވާ ކަމަށެވެ.

ޝެއިޚް ހަސީނާއަކީ ދިވެހިންގެ ތެރޭގައި މަގްބޫލު ކަނބަލެއް ކަމަށާއި، އެކަމަނާ ދިވެހިންނާ މުޚާތަބު ކުރުމަށް މަޖިލީހުގައި ތަގުރީރު ކުރެއްވުމަށް ދައުވަތުދޭން ޖެހޭ ކަމަށް އެމްޑީޕީން ގަބޫލް ކުރައްވާ ކަމަށް ޕީޖީ ލީޑަރ އަލީ އާޒިމް ވިދާޅުވިއެވެ.

އެމްއެންޕީގެ ނައިބުރައީސް އަދި ތިމަރަފުށި ދާއިރާގެ މެމްބަރު އަބްދުﷲ ރިޔާޒު ވިދާޅުވީ، އެ ޕާޓީގެ ޚާރިޖީ ސިޔާސަތަކީ އިސްލާމީ ގައުމުތަކާ ގުޅުން ބަދަހި ކުރުމުގެ ސިޔާސަތެއް ކަމަށެވެ. ރާއްޖޭގައި ބަންގްލަދޭޝްގެ އެތައް ރައްޔިތުންނެއް މަސައްކަތް ކުރަމުން އަންނަކަން ރިޔާޒު ފާހަގަކުރެއްވިއެވެ. ބަންގްލަދޭޝަކީވެސް ޓެރަރިޒަމަށް ޒީރޯ ޓޮލަރެންސް ދޭ ގައުމެއްކަމަށާއި، ޝައިޚް ހަސީނާއަކީ، ތިމާވެށި ހިމާޔަތްކުރުމަށް ކުރަމުން އަންނަ މަސައްކަތްތަކުގައިވެސް އިސް ދައުރެއް އަދާކުރައްވާ ކަނބަލެއް ކަމަށެވެ. އެހެންކަމުން އެއްވެސް ގައުމެއްގެ ބޮޑު ވަޒީރަކަށް ދިވެހި ރައްޔިތުންނާ މުޚާތަބު ކުރުމަށް ފުރުސަތު ދޭނަމަ އެ ފުރުސަތު ބަންގްލަދޭޝްގެ ބޮޑުވަޒީރަށް ދޭން ޖެހޭ ކަމަށް އެމްއެންޕީން ގަބޫލްކުރާ ކަމުގައި ވިދާޅުވިއެވެ.

ޝެއިޚް ހަސީނާ ވައިވެރިވެވަޑައިގަންނަވާ ޖަލްސާއަށް ރައްޔިތުންގެ މަޖިލީހުގެ މެމްބަރުންނާއި، ވަޒީރުންގެ މަޖިލީހާއި، ދައުލަތަށް ގިނަ ދުވަހު ޚިދުމަތް ކުރައްވާފައިވާ ބޭފުޅުންގެ ތެރެއިން 28 ބޭފުޅަކާއި، މިނިސްޓަރުންގެ ފެންވަރުގެ 8 ބޭފުޅަކަށާއި، ޗީފް އޮފް ޑިފެންސް ފޯސް، ކޮމިޝަނަރ އޮފް ޕޮލިސް، ގައުމީ ޔުނިވަރސިޓީގެ ޗާންސެލަރ، ވައިސް ޗާންސެލަރ، މާލެ ސަރަހައްދުގެ ކޮންމެ ސްކޫލަކުން ދެ ދަރިވަރުން ހިމެނޭ ގޮތަށް 153 ބޭފުޅުންނަށް ދައުވަތު އެރުވޭނެ ކަމަށް ރިޔާސަތުގައި އިންނެވި ރައީސް ނަޝީދު ވިދާޅުވިއެވެ. އަދި މި ހަފްލާ ކުލަގަދަ ގޮތެއްގައި ފާހަގަ ކުރެވިގެންދާނެ ކަމަށް ވިދާޅުވިއެވެ.

ރައީސް ނަޝީދު ވިދާޅުވީ ބަންގްލަދޭޝަކީ ދިވެހިންނާ އެކުވެރި ގައުމުތަކުގެ ތެރެއިން ވަފާތެރި ގައުމެއް ކަމަށެވެ.

ބަންގްލަދޭޝްގެ ބޮޑުވަޒީރު ޝައިޚް ޙަސީނާ ދިވެހިރާއްޖެއަށް ކުރައްވާ ފުރަމާނަ ދަތުރުފުޅެއްގައި ވަޑައިގަންނަވާނީ، މި މަހު 22ން 23ށް އެވެ. ޝައިޚް ޙަސީނާގެ މި ދަތުރުފުޅަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މި އަހަރުގެ މާރޗް މަހު ބަންގްލަދޭޝަށް ކުރެއްވި ދަތުރުފުޅުގެ ތެރެއިން ދެއްވި ދަޢުވަތަކަށް ކުރައްވާ ދަތުރުފުޅެކެވެ.

‎އެ ކަމަނާގެ މި ދަތުރުފުޅުގައި ރައީސުލްޖުމްހޫރިއްޔާއާ ބައްދަލުކުރައްވައި ރަސްމީ ވާހަކަފުޅުތައް ބޭއްވެވުމަށް ވަނީ ހަމަޖެހިފައެވެ. މި ވާހަކަފުޅުތަކުގައި، ދެ ޤައުމުގެ ދެމެދުގައި އެކި ދާއިރާތަކުން އިތުރަށް ގުޅުން ބަދަހި ކުރެއްވުމާ ބެހޭގޮތުން މަޝްވަރާކުރައްވާނެއެވެ. އަދި ދެ ޤައުމުގެ ދެމެދު، އެކި ދާއިރާތަކުން ގުޅުން ބަދަހިކުރުމުގެ ގޮތުން ފަހުމުނާމާތަކެއްގައި ސޮއިކުރުމަށް ވަނީ ހަމަޖެހިފައެވެ. މަސްވެރިކަމާއި މީހުން ބިނާކުރުމާއި ތަޢުލީމަކީ މިހާރުވެސް ދެ ޤައުމުގެ ދެމެދު ގާތް ގުޅުމެއް އޮންނަ ބައެއް ދާއިރާތަކެވެ. ދެ ޤައުމު ދެމެދު ސޮއިކުރެވޭ މި އެއްބަސްވުންތަކާއެކު ދެ ޤައުމުގެ މެދުގައި އޮތް ގުޅުން އިތުރަށް ވަރުގަދަވެ ހަރުދަނާވެގެންދާނެއެވެ.