ތަރައްޤީއަކީ ވަކި ކަހަލަ ބަނދަރެއް ނުވަތަ ވަކި ބާވަތެއްގެ ކަނޑުތޮށްޓެއް ނޫން :ރައީސް
ތަރައްޤީގެ ކޮންމެ ވާހަކައެއް ދައްކާއިރު، އެއާ އެކީގައި ތިމާވެށި ޙިމާޔަތްކުރުމުގެ ވާހަކަ ނުދައްކައި މިހާރު ދޫކޮށްލެވޭކަށް ނެތް
މަޑުއްވަރީ ބަނދަރު
ތަރައްޤީއަކީ ވަކި ކަހަލަ ބަނދަރެއް، ނުވަތަ ވަކި ބާވަތެއްގެ ކަނޑުތޮށްޓެއް ނޫންކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
އެމްޓީސީސީގެ 41 ވަނަ އަހަރީ ދުވަހުގެ ޙަފްލާގައި ވާހަކަދައްކަވަމުން ރައީސް ވިދާޅުވީ ތަރައްޤީގެ ކޮންމެ ވާހަކައެއް ދައްކާއިރު، އެއާ އެކީގައި ތިމާވެށި ޙިމާޔަތްކުރުމުގެ ވާހަކަ ނުދައްކައި މިހާރު ދޫކޮށްލެވޭކަށް ނެތްކަމަށެވެ. ރައީސް ވިދާޅުވީ އެމްޓީސީސީގެ ފަރާތުން ހިންގާ އަސާސީ ޚިދުމަތްތަކުގެ ތެރޭގައިވެސް ތިމާވެށްޓާ ގުޅޭ ވަރަށް ގިނަ މަޝްރޫޢުތައް ހިމެނޭކަމަށެވެ. ބަނދަރު ހެދުމާއި، ގޮނޑުދޮށް ޙިމާޔަތްކުރުމާއި، ފަޅު ފުންކުރުމަކީވެސް މިފަދަ މަޝްރޫޢުތައް ކަމަށް ރައީސް ވިދާޅުވިއެވެ.
ރައީސް ވިދާޅުވީ ތަރައްޤީއަށްޓަކައި ވެށި ހަލާކުކުރެވެން ނެތްކަމަށެވެ.
ދުނިޔޭގެ މޫސުން މިހާރު ބަދަލުވަމުން ދާގޮތަށް ބަލާއިރު، ތަރައްޤީއަށްޓަކައި ކިތަންމެ ކުޑަކަމެއް ކުރިޔަސް، ތިމާވެށްޓަށް ލިބިދާނެ ގެއްލުމެއް އޮތްތޯ ބަލައި، އެކަމަކުން ސަލާމަތްވުމަކީ މިއަދު ކުރަންޖެހިފައި އޮތްކަމެއް ކަމަށް ރައީސް ވިދާޅުވިއެވެ. ރައީސް ވިދާޅުވީ ސިޔާސަތު ކަނޑައަޅާ ބޭފުޅުންނާއި، މަޝްރޫޢުތައް ފަރުމާކުރައްވާ ބޭފުޅުން އަދި މަޝްރޫޢުތައް ތަންފީޒު ކުރައްވާ ބޭފުޅުންވެސް މިކަންކަމަށް ވިސްނުން ގެންގުޅުއްވަން އެބަޖެހޭކަމަށެވެ.
