އެމްޓީސީސީ ގެ އަމާޒަކަށް ދެންވާންވީ ބައިނަލްއަޤްވާމީ ޕްރޮޖެކްޓްތަކާ ދިމާއަށް މިސްރާބު ޖެހުންކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
އެމްޓީސީސީގެ 41 ވަނަ އަހަރީ ދުވަހުގެ ޙަފްލާގައި ވާހަކަދައްކަވަމުން ރައީސް ވަނީ އެކަމުގެ ޚިޔާލު ކުންފުނީގައި މިހާރުވެސް ގެންގުޅުއްވާތީ އެކަމަށްޓަކައި ކުންފުނީގެ ހިންގުންތެރިންނަށް ޝުކުރު އަދާކުރައްވާފައެވެ. ރައީސް ވިދާޅުވީ އެމަނިކުފާނުގެ ނަޒަރުގައި މިހާރު މިއޮތީ ކުންފުނީގެ މިސްރާބު މުޅިން އެހެން އަމާޒަކަށް ސީދާ ކުރަންވީ ވަގުތު ޖެހިފައިކަމަށެވެ. ދެން ރާއްޖޭގެ ޚާއްޞަކޮށް، އަތޮޅުތަކުގެ ރަށްރަށުގެ ޢުމްރާނީ ތަރައްޤީއަށްޓަކައި ކުރަންޖެހޭނެ ކަންތައްތަކުގެ ގޮތުގައި ކުރެވޭނެކަމަށް ގަބޫލުފުޅުކުރައްވަނީ މަގުތައް ހެދުމާއި، އެއްރަށް އަނެއްރަށް ކަނޑުމަގުންނާއި އަދި ބްރިޖާއި ކޯޒްވޭތަކުން ގުޅައިލުން ކަމަށް ރައީސް ވިދާޅުވިއެވެ.
މިކަމަށް އެމްޓީސީސީ ތައްޔާރުވާން ޖެހޭކަމަށް ރައީސް ވިދާޅުވިއެވެ.
50 ވަނަ އަހަރަށް އަމާޒުކޮށް ދެންމެ ދެއްކި ވީޑިއޯގައި އެ ވާހަކަތައް އެބަހުރި ދައްކަވާފައި. އަޅުގަނޑުގެ އެދުމަކީ، ޒަމާނީ ޓެކްނޮލޮޖީއާއި، ތަމްރީނާއި، އެކްސްޕަރޓީސް ހޯއްދަވައިގެން މިކަންތައްތަކަށް ތައްޔާރުވުމަށް. އަޅުގަނޑުގެ ފުރިހަމަ ޔަޤީންކަން ޢާޒިމަށާއި، އެމް.ޓީ.ސީ.ސީ.ގެ ޓީމަށް އެބައޮތް.ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ވިދާޅުވީ އެމްޓީސީސީ އަށް 41 އަހަރު ފުރުން ފާހަގަކުރާއިރު، ޙަޤީޤަތުގައި ފާހަގަކުރެވެނީ، މިވޭތުވެދިޔަ 2 އަހަރުގެ ތެރޭގައި ކުންފުނި ހޯދާފައިވާ ކާމިޔާބީކަމަށެވެ. އެމް.ޓީ.ސީ.ސީ.ގެ ޙަޔާތުގައިވެސް އައި އެންމެ ޙަރަކާތްތެރި އަދި އެންމެ ކާމިޔާބު ދުވަސްތަކަކީ މިދިޔަ ދެ އަހަރު ކަމަށް ރައީސް ވިދާޅުވިއެވެ.
އެމް.ޓީ.ސީ.ސީއޭ ބުނުމުން ލިބޭ އެންމެ ބޮޑު ހިތްހަމަޖެހުމަކީ ކުންފުންޏާ ހަވާލުކުރާ ކޮންމެ މަޝްރޫޢެއްވެސް އޭގެ އެންމެ ރަނގަޅު ފެންވަރުގައި ވަގުތަށް ނިންމައިދޭނެކަމުގެ ޔަގީންކަން އޮތުންކަމަށް ރައީސް ވިދާޅުވިއެވެ. އެއީ މިއަދު އެމްޓީސީސީ އާ މެދު ހިތްތަކުގައި އޮންނަ ޔަގީންކަން ކަމަށް ރައީސް ވިދާޅުވިއެވެ.
ރައީސް ވިދާޅުވީ އެމްޓީސީސީ އޭ ބުނުމުން، އެއީ ހަމައެކަނި ޢިމާރާތްކުރާ، ދަތުރުފަތުރާއި، ކަނޑު އުޅަނދުފަހަރުގެ އިންޖީނު ވިއްކާ ކުންފުންޏެއް ކަމަށް ބައެއް ފަރާތްތަކަށް ހީވެދާނެކަމަށެވެ. ނަމަވެސް ޙަޤީޤަތުގައި އެމްޓީސީސީއަކީ، ރާއްޖޭގެ ޢުމްރާނީ ތަރައްޤީގެ ވަރަށް މުހިންމު ބައިވެރިއެއް ކަމަށާއި ޚާއްޞަކޮށް، ރަށްރަށުގެ ޢުމްރާނީ ތަރައްޤީގެ އެންމެ މުހިންމު ބައިވެރިޔާ އަކީ އެމްޓީސީސީ ކަމަށް ރައީސް ވިދާޅުވިއެވެ.
ބަނދަރު ހެދުން، ބިން ހިއްކުން، ގޮނޑުދޮށް ޙިމާޔަތްކުރުން، ޝީޓް ޕައިލްކުރުން، މިއީ މި ކުންފުނީގެ އެންމެ ޒަމާންވީ މަސައްކަތްތައް. މިއީ ރަށްރަށުގެ ރައްޔިތުން އެންމެ ބޭނުންވާ ލަފާފުރުމުގެ ޚިދުމަތާ ގުޅިފައި ހުރި މަޝްރޫޢުތައް. އެއަރޕޯޓް ހެދުމާއި، މަގު ހެދުމާއި، ފެނާއި ނަރުދަމާ ނިޒާމު ޤާއިމުކުރުމަކީވެސް، ރަށްރަށާއި މާލެއާ ދެމެދު ހުރި އަސާސީ ޚިދުމަތުގެ ތަރައްޤީގެ ފަރަޤު ނައްތައިލުމަށްޓަކައި ހިންގާ ވަރަށް މުހިންމު މަޝްރޫޢުތަކެއް. އާދެ، މި ސަރުކާރުން އެންމެ ބޮޑަށް އިސްކަންދޭ ސިޔާސަތަކީ މިދެންނެވީ. އެއީ ތަރައްޤީވެސް ލާމަރުކަޒުވުން. ރާއްޖޭގެ ހުރިހާ ހިސާބެއްގައިވެސް އަސާސީ ޚިދުމަތްތައް ޤާއިމުކުރުން. ކޮންމެ ކަމެއްގައި މާލެ އަންނަން ނުޖެހި އެމީހަކު ދިރިއުޅޭ ރަށަކުން ނުވަތަ އެ ސަރަޙައްދަކުން، އަސާސީ ޚިދުމަތްތައް ލިބޭނެގޮތް ހެދުން.ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ކޮވިޑް-19ގެ ދަތިކަމުގެ ތެރޭގައި، ތަރައްޤީގެ ބައެއް ސިޔާސަތުތަކަށް ބަދަލުތަކެއް ގެންނަން ޖެހުނުކަމަށާއި އެހެންނަމަވެސް، ރައްޔިތުންގެ އަސާސީ ޚިދުމަތްތަކާ ގުޅިފައިވާ ތަރައްޤީގެ މަޝްރޫޢުތައް މެދުކަނޑާނުލައި ކުރިއަށް ގެންދިއުމަށް ވަރަށް ބޮޑަށް ސަމާލުކަމެއް ދިންކަމަށް ރައީސް ވިދާޅުވިއެވެ. މި އަސާސީ ޚިދުމަތްތަކާ ގުޅިފައިވާ އެއް ދާއިރާއަކީ ދަތުރުފަތުރުގެ ދާއިރާކަމަށް ރައީސް ވިދާޅުވިއެވެ.
ހައި ސްޕީޑް ފެރީ ނިޒާމަކުން މުޅި ރާއްޖެ ގުޅައިލުމަށް، މި އަހަރުގެ ކުރީކޮޅު އެމްޓީސީސީ އާ ބޮޑު މަޝްރޫޢެއް ޙަވާލުކޮށްފައިވާ ކަމަށް ރައީސް ވިދާޅުވިއެވެ. އެ މަޝްރޫޢުގެ ޒޯން 1 ގައި ހިމެނޭ، ހއ. ހދ. އަދި ށ. އަތޮޅުގެ ރަށްތަކުގެ މެދުގައި، ފެރީގެ ޚިދުމަތް ފެށުމަށް، އެމްޓީސީސީން ތައްޔާރުވަމުން އަންނަކަމަށް ރައީސް ވިދާޅުވިއެވެ.
