ދައުރުން ބޭރުގައި ބާއްވާ ހަވަނަ ޖަލްސާ މާދަމާ
ޖަލްސާ ބޭއްވުމަށް ހަމަޖެހިފައިވަނީ ހޯމަދުވަހުގެ 11:00 ޖަހާއިރު
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ދައުރުން ބޭރުގައި ބާއްވާ ހަވަނަ ޖަލްސާ ހޯމަ ދުވަހު ބޭއްވުމަށް ތާވަލްކޮށްފިއެވެ.
މި ޖަލްސާގައި އޮތީ ފުރަމާނަ ދަތުރުފުޅެއްގައި ރާއްޖެއަށް ޒިޔާރަތް ކުރެއްވުމަށް ހަމަޖެހިފައިވާ ބަންގްލަދޭޝްގެ ބޮޑުވަޒީރު ހަރ އެކްސެލެންސީ ޝައިޚް ހަސީނާ ރައްޔިތުންގެ މަޖިލީހަށް ޒިޔާރަތްކުރައްވައި ރައްޔިތުންގެ މަޖިލީހުގައި ތަގުރީރު ކުރެއްވުމަށް މަޖިލީހަށް ވަޑައިގެންދެއްވުމަށް ދައުވަތު އެރުވުމުގެ މައްސަލައަށް ގޮތެއް ނިންމުމެވެ. އަދި ވޯޓުން ނިންމާ ހިސާބަސް ގޮސްފައިވާ ކަންކަމަށް ވޯޓަށް އެހުމެއެވެ.
ޖަލްސާ ބޭއްވުމަށް ހަމަޖެހިފައިވަނީ ހޯމަ ދުވަހުގެ 11:00 ޖަހާއިރުއެވެ.
ދައުރުން ބޭރުން ބޭއްވި 5 ވަނަ ހާއްސަ ޖަލްސާ އޮތީ، މި މަހުގެ 16 ވަނަ ދުވަހުއެވެ. މި ޖަލްސާއަށް އެޖެންޑާކޮށްފައިވަނީ 2 މަސައްކަތެކެވެ. އެއީ އެންޓި-ކޮރަޕްޝަން ކޮމިޝަންގެ 4 މެންބަރުން މަޤާމުން ވަކިކުރުމުގެ މައްސަލަ، މަޖިލީހުގެ ގަވާއިދުގެ 210 ވަނަ މާއްދާގެ (ށ) ގައިވާ ގޮތުގެމަތިން މަޖިލީހުގައި އިޢުލާންކުރުމަށް މިނިވަން މުއައްސަސާތަކުގެ ކޮމިޓީން ފޮނުވާފައިވާ މައްސަލަ އާއި، ދުވަހުގެ މަސައްކަތްތަކުގެ ތެރެއިން ވޯޓުން ނިންމާ ހިސާބަށް ގޮސްފައިވާ ކަންކަމަށް ވޯޓަށް އެހުމެވެ.
އޭސީސީގެ މެމްބަރުން ވަކި ކުރުމުގެ މައްސަލައިގައި މިނިވަން މުއައްސަސާތަކުގެ ކޮމިޓީންވަނީ ކޮމިޝަންގެ މެމްބަރުން އޮޑިޓް ރިޕޯޓާ ގުޅިގެން ލިޔުމުން ޖަވާބު ދިނުމަށް 5 ދުވަހުގެ މުއްދަތެއް ދީފައެވެ. އެ މުއްދަތު ދިނީ ޑިސެމްބަރު މަހުގެ 16 ވަނަ ދުވަހުއެވެ.
