ސަފާރީތަކުގެ ސެކްޓަރ ކުރިއެރުވުމަށް މަސައްކަތް ކުރަންޖެހޭ: މިނިސްޓަރު މައުސޫމް
18 ޑިސެމްބަރު 2021 | ހޮނިހިރު 06:16ޑައިވިންގ މާކެޓްވެސް ވަނީ ދަށަށް ގޮސްފައި
ޓުއަރިޒަމް މިނިސްޓަރު ޑރ. އަބްދުﷲ މައުސޫމް،
ރާއްޖޭގެ ސަފާރީތަކުގެ ސެކްޓަރ ކުރިއެރުވުމަށް މަސައްކަތް ކުރަން ޖެހޭ ކަމަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ޓޫރިޒަމްގެ ދާއިރާއަށް ލިބެމުންދާ ކުރިއެރުންތަކާއި ބެހޭ ގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން މިނިސްޓަރު މައުސޫމް ވިދާޅުވީ ކޮވިޑް-19ގެ ބަލިމަޑުކަމާއެކު ވަން އައިލެންޑް، ވަން ރިސޯޓު ކޮންސެޕްޓަކީ ޖާދުވީ ދަމާބާރެއްކަން ހާމަވެގެން ގޮސްފައިވާ ކަމަށެވެ.
މިނިސްޓަރު މައުސޫމް ވިދާޅުވީ ފަތުރުވެރިކަމުގެ ސިނާއަތް ކުރިއެރުމަށް ގިނަ މަސައްކަތްތައް ކުރަމުންދާއިރު، ފަތުރުވެރިކަމުގެ ބަބަލްގެ އެކިއެކި ދާއިރާތައް އެއްވަރެއްގައި ކުރިއަރައިގެންދާން ޖެހޭ ކަމަށެވެ. އެގޮތުން މިހާރުގެ ހާލަތަށް ބަލައި، ވަން އައިލެންޑް، ވަން ރިސޯޓު ކުރިއެރުވި ގޮތަށް ސަފާރީތަކުގެ ސެކްޓަރ ކުރިއަރުވަން ޖެހޭ ކަމަށް ވިދާޅުވިއެވެ.
މިނިސްޓަރު މައުސޫމް ވިދާޅުވީ ރާއްޖޭގައި އެކޮނޮމީ ބެޑްތައް މަދު ކަމަށާއި، ޑައިވިން މާކެޓް ވެސް ދަށަށް ގޮސްފައިވާ ކަމަށެވެ. ފަތުރުވެރިކަމުގެ ސިނާއަތް ކުރިއެރުވުމުގައި އަބަދުވެސް ބުރަ މަސައްކަތްތަކެއް ކުރަން ޖެހޭކަން ފާހަގަކުރައްވައި މިނިސްޓަރު ވިދާޅުވީ ދިވެހިން ފަތުރުވެރިންގެ ވެރިންނަށް ވާން ޖެހޭ ކަމަށެވެ.
މިނިސްޓަރު މައުސޫމް ވިދާޅުވީ މުޅި ދުނިޔޭގައި ފަތުރުވެރިވެރިކަން އެބައޮތް ކަމަށާއި، ރާއްޖޭގެ ފަތުރުވެރިކަމަށް ބޮޑު ކުރިއެރުމެއް ލިބިގެންދިޔައީ ލިބިފައިވާ ގުދުރަތީ ވަސީލަތްތަކާއެކު ދިވެހިން އަދާކުރި މެހެމާންދާރީގެ ސަބަބުން ކަމަށެވެ. އެހެންކަމުން ކުރިއަށް އޮތްތަނުގައި ވެސް އެމެހެމާންދާރީ އަދާކޮށް، ދިވެހިންގެ ރީތި ސަގާފަތް ފަތުރުވެރިންނަށް ދައްކުވައިދިނުމަށް މިނިސްޓަރު އިލްތިމާސްކުރެއްވިއެވެ. އަދި ސިނާއަތުގައި މަސައްކަތް ކުރާ މުވައްޒަފުންގެ ހައްގުތައް ކަށަަވަރުކޮށްދިނުމަށް މިނިސްޓަރު އެދިވަޑައިގެންނެވިއެވެ.
