ބޫސްޓަރ ޑޯޒް ޖެހި މީހުންގެ އަދަދު 22،000ން މައްޗަށް
ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 396،358ށް އަރާފައި
އައްޑޫގައި ވެކްސިން ދިނުމުގެ ޕްރޮގްރާމް ފެށުމުގެ ތެރެއިން
ރާއްޖޭގައި ކޮވިޑް-19ގެ ބޫސްޓަރ ޑޯޒް ޖެހި މީހުންގެ އަދަދު 22،093ށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ބުރާސްފަތި ބޫސްޓަރ ޑޯޒް 496 މީހުން ޖަހާފައިވާކަމަށެވެ. އޭގެތެރެއިން މާލެ ސަރަހައްދުން 317 މީހުން ބޫސްޓަރ ޑޯޒް ޖަހާފައިވާއިރު އަތޮޅުތަކުން ބޫސްޓަރ ޑޯޒް ޖަހާފައިވަނީ 179 މީހުންނެވެ.
މީގެއިތުރުން ބުރާސްފަތި ދުވަހު ވެކްސިންގެ ފުރަތަމަ ޑޯޒް 36 މީހުން ވަނީ ޖަހާފައެވެ. އެއީ މާލެ ސަރަހައްދުން 30 މީހުންނާއި އަތޮޅުތަކުން 6 މީހުންނެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 396،358ށް އަރާފައެވެ.
ބުރާސްފަތި ދުވަހު 127 މީހުން ދެވަނަ ޑޯޒް ޖަހާފައިވެއެވެ. އެއީ މާލެ ސަރަހައްދުން 111 މީހުންނާއި އަތޮޅުތަކުން 16 މީހުންނެވެ. މިއާއެކު ދެވަނަ ޑޯޒް ޖެހި މީހުންގެ އަދަދު ވަނީ 366،165ށް އަރާފައެވެ.
ރާއްޖޭގައި ބޫސްޓަރ ޑޯޒް ޖަހަން ފަށާފައިވާއިރު އާއްމުންނަށް ކޮވިޑް-19ގެ ބޫސްޓަރ ޑޯޒު ޖެހުން ފަސްވެފައިވާކަމަށް އެޗްޕީއޭއިން ވަނީ ބުނެފައެވެ. އެޗްޕީއޭ އިން މިހާރު ބޫސްޓަރ ޑޯޒު ޖަހައި ދެމުންދަނީ ފްރަންޓްލައިންގައި މަސައްކަތްކުރާ ސިއްޙީ ޚިދުމަތްތެރިންނަށާއި، 60 އަހަރުންމަތީގެ މީހުންނަށާއި، ދިފާއީ ނިޒާމު ބަލިކަށި މީހުންނަށެވެ. މީގެ ތެރޭގައި ހަށިގަނޑުގެ ގުނަވަނެއް ބަދަލުކޮށްފައިވާ މީހުންނާއި، ހަށިގަނޑުގެ ދިފާއީ ބާރު ދެރަކުރާ ފަދަ ބޭސްތައް ބޭނުންކުރާ މީހުން ހިމެނެއެވެ. ނަމަވެސް މިމަހުގެ 15ން ފެށިގެން ތިން ވަނަ ޑޯޒު އާންމުންނަށް ދޭން ފަށާނެ ކަމަށް މީގެ ކުރިން އެޗްޕީއޭއިން ބުނެފައިވެއެވެ.
ބޫސްޓަރ ޑޯޒު ޖަހައިދިނުން ލަސްވުމާއި ގުޅޭ ގޮތުން އެޗްޕީއޭގެ އެޕިޑިއަމޮލަޖިސްޓް ޑރ. އިބްރާހީމް އަފްޒަލް ވިދާޅުވީ ކަނޑައަޅާފައިވާ އަދަދަށް ވެކްސިން ލިބޭނެ ކަމަށާއި، ބައެއް ސަބަބުތަކާއި ގުޅިގެން ވެކްސިން ލިބުން ލަސްވެދާނެ ކަމަށެވެ. އަދި ވެކްސިން ލިބުމާއެކު، އިތުރު ކެޓަގަރީތަކަށް ވެކްސިން ދިނުމުގެ މަސައްކަތް ފަށާނެ ކަމަށް ޑރ.އަފްޒަލް ވިދާޅުވިއެވެ.
