މުޅި ރާއްޖެއަށް ވޮލީ ފުޅާކުރަން ހިންގި ބޭސިކް ވޮލީބޯލް ރެފުރީ ކޯހާއި, ސެޓިފިކެޓް ލެވަލް އެކެއް ވޮލީބޯލް ކޯޗިން ކޯސް ކާމިޔާބުކަމާއެކު ނިންމާލައިފިއެވެ.

މި ކޯސްތައް ކުރިއަށް ގެންގޮސްފައިވަނީ ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އާއި، ނެޝަނަލް އިންސްޓިޓިއުޓް އޮފް ސްޕޯޓްސް (އެންއައިއެސް) އަދި ޕޮލިސް ކުލަބު ގުޅިގެންނެވެ.

ހުޅުމާލޭ ޕޮލިސް ސްޓޭޝަނުގައި ބުދަ ދުވަހުގެރޭ ބޭއްވި ޚާއްސަ ރަސްމިއްޔާތުގައި ކޯހުގެ ބައިވެރިންނަށް ހަނދާނީ ލިޔުންދީފައިވާއިރު، މި ރަސްމިއްޔާތު ޝަރަފުވެރިކޮށްދެއްވީ ކުޅިވަރާ ބެހޭ ވުޒާރާގެ ސްޓޭޓް މިނިސްޓަރު ހުސައިން އިސްމާޢީލެވެ. މީގެ އިތުރުން މި ރަސްމިއްޔާތުގައި ވީއޭއެމުގެ ރައީސް މުޙައްމަދު ރަނޭޝް (ރަނޭ) ގެ އިތުރުން ޕޮލިސް ކުލަބުގެ ރައީސް، ޗީފް ސްޕްރިންޓެންޑެންޓް އޮފް ޕޮލިސް މުޙައްމަދު ރަޝީދުވެސް ބައިވެރިވެވަޑައިގެންނެވިއެވެ.

ނޮވެމްބަރު މަހުގެ 14 ވަނަ ދުވަހުން ފެށިގެން މިދިޔަ އަންގާރަ ދުވަހުގެ ނިޔަލަށް ކުރިއަށްގެންދިޔަ ބޭސިކް ވޮލީބޯލް ރެފުރީ ކޯހާއި ސެޓިފިކެޓް ލެވަލް އެކެއް ވޮލީބޯލް ކޯޗިން ކޯހުގައި ޖުމްލަ 33 މީހަކު ވަނީ ބައިވެރިވެފައެވެ. މި ދެކޯހުގައި މާލޭގެ އިތުރުން 14 އަތޮޅެއް ހިމެނޭހެން 20 ރަށަކުން މީހުން ވަނީ ބައިވެރިވެފައެވެ.

ބުދަ ދުވަހުގެރޭ ބޭއްވި ރަސްމިއްޔާތުގައި ބޭސިކް ވޮލީބޯލް ރެފުރީ ކޯހުން ފާސްވި 21 ބައިވެރިން ލިޔުން ހާސިލްކޮށްފައިވާއިރު، ކޯޗިން ކޯހުން 27 ބައިވެރިން ވަނީ ފާސްވެ ލިޔުން ހާސިލްކޮށްފައެވެ.

ރާއްޖޭގެ އެކި އަތޮޅުތަކުން ވޮލީބޯޅަ ކޯޗުން ތަމްރީނުކުރުމުގެ ކޯސް ބޭއްވިއިރު، ދާދި ފަހުން ވީއޭއެމުގެ ރައީސް ރަނޭ ވަނީ ރާއްޖެ ހަތް ޒޯނަކަށް ބަހާލައި، ހުރިހާ ރަށަކަށް ބައިވެރުވުމުގެ ފުރުސަތު އޮންނާނެހެން "ރާއްޖެ ވޮލީބޯޅަ ޗެމްޕިއަންޝިޕް" އަންނަ އަހަރު ބާއްވާނެކަން އިއުލާންކުރައްވާފައެވެ.

މިއީ މުޅި ރާއްޖެއަށް ހުޅުވާލައިގެން ވޮލީބޯޅައިގެ މިފަދަ ބޮޑު މުބާރާތެއް ބާއްވާނެ ފުރަތަމަ ފަހަރެވެ. އެގޮތުން އަންނަ އަހަރު މުޅި ރާއްޖޭގައި ބާއްވާ ރާއްޖެ ވޮލީބޯޅަ ޗެމްޕިއަންޝިޕް ކުރިއަށްދާނީ ހަތް ޒޯނެއްގެ މެދުގައެވެ. އަދި އެ ޒޯނުތަކުގެ ޗެމްޕިއަނުންގެ މެދުގައިވެސް މުބާރާތެއް ބޭއްވުމަށް ވީއޭއެމުން އަންނަނީ މަސައްކަތްކުރަމުންނެވެ.

މީގެ ކުރިން ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ރަނޭ ވިދާޅުވީ އަންނަ އަހަރު އެންމެ ބޮޑަށް ފޯކަސް ކުރަން ނިންމާފައިވާ މުބާރާތަކީ ރާއްޖެ ވޮލީބޯޅަ ޗެމްޕިއަންޝިޕް ކަމަށާއި އަދި އެ މުބާރާތަކީ އަތޮޅުތެރެއިން ހުނަރުވެރި ކުޅުންތެރިން އުފެއްދުމަށް ކުރެވޭނެ މުހިންމު މަސައްކަތެއް ކަމަށެވެ.

އަދި އަތޮޅުތެރޭގެ މުބާރާތަށް ޓީމުތައް ފައްކާކުރުމަށް މިހާރުވެސް ވޮލީބޯޅައިގެ ކޭމްޕުތަކެއް އަތޮޅު ތެރޭގައިވެސް ކުރިއަށްގެންދާކަން ރަނޭ ވަނީ ފާހަގަކުރައްވާފައެވެ. އަދި ވިދާޅުވީ ވޮލީ ކޭމްޕުތަކަށް ރާއްޖެއިން ބޭރުން ކޯޗުން ގެންނަން މަސައްކަތް ކުރަމުން އަންނަ ކަމަށާއި، އަދި އިތުރު ކޯޗުންނާއެކު ރިސޯޓުތަކުގައިވެސް ކޭމްޕުތައް ވަރަށް އަވަހަށް ފެށިގެންދާނެ ކަމަށެވެ.