ޖަރުމަން ލީގުގައި ބުދަ ދުވަހުގެރޭ ކުޅުނު މެޗުން ފުލުގައި އޮތް ގްރޮއިޓާ ފާޓް ބަލިކޮށް ބޮރޫޝިއާ ޑޯޓްމުންޑުން ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން ބަޔާން މިއުނިކާ ދެމެދު އޮތް ފަރަގު ކުޑަކޮށްފިއެވެ.

އަމިއްލަ ދަނޑުގައި ކުޅުނު މެޗުން ޑޯޓްމުންޑް މޮޅުވީ 3-0 ގެ ނަތީޖާއަކުންނެވެ.

މި މެޗުގައި ޑޯޓްމުންޑުން މޮޅު ކުޅުމެއް ދެއްކިއިރު، އެ ޓީމުން ލީޑު ނަގާފައިވަނީ މެޗުގެ 33 ވަނަ މިނެޓުގައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ އާލިން ބްރައުޓް ހާލަންޑެވެ. މިއީ އޭރިއާ ތެރެއިން ހާލަންޑް ފޮނުވާލި ބޯޅައެއް ގްރޮއިޓާ ކުޅުންތެރިއެއްގެ އަތުގައި ޖެހުމުން، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ދިން ޕެނަލްޓީއެކެވެ.

މި މެޗުގައި ޑޯޓްމުންޑުން ލީޑު ފުޅާކޮށްފައިވަނީ މެޗުގެ 82 ވަނަ މިނެޓުގައެވެ. ހޫލިއަން ބްރަންޓް ހުރަސްކޮށްދިން ބޯޅައަކުން މި ލަނޑުވެސް އެ ޓީމަށް ކާމިޔާބުކޮށްދިނީ ހާލަންޑެވެ. މިއީ މި ސީޒަނުގެ ޖަރުމަން ލީގުގައި ހާލަންޑް ކާމިޔާބުކުރި 13 ވަނަ ލަނޑެވެ. އަދި އޭނާ ވަނީ މި ސީޒަނުގެ ހުރިހާ މުބާރާތެއްގައި މިހާތަނަށް 19 ލަނޑު ހަމަކޮށްފައެވެ.

ހާލަންޑުގެ ދެ ލަނޑުން ޑޯޓްމުންޑުން ލީޑު ފުޅާކޮށްފައި ވަނިކޮށް، މި މެޗުގައި އެ ޓީމުން ތިންވަނަ ލަނޑެއް ޖަހާފައިވަނީ މެޗު ނިމެން މިނެޓަކަށް ވެފައި ވަނިކޮށެވެ. ބްރަންޓް ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޑޮންޔެލް މާލެންއެވެ.

މި މޮޅާއެކު ޑޯޓްމުންޑުން ވަނީ ބަޔާނުގެ ލީޑު ހަ ޕޮއިންޓަށް ކުޑަކޮށްފައެވެ. އެގޮތުން ކުޅުނު 16 މެޗުން ބަޔާނަށް 40 ޕޮއިންޓް ލިބިފައިވާއިރު، ދެވަނައިގައި ޑޯޓްމުންޑް އޮތީ 16 މެޗުން 34 ޕޮއިންޓާއެކުއެވެ. އަދި ބުދަ ދުވަހުގެރޭ ކުޅުނު މެޗުން ތާވަލުގެ ތިންވަނައިގައި އޮތް ބެޔާ ލެވަކޫސެނާއި ހަތަރުވަނައިގައި އޮތް ހޮފެންހައިމް ވަނީ 2-2 ގެ ނަތީޖާއަކުން އެއްވަރުވެފައެވެ. އެއާއެކު ލެވަކޫސަނަށް 16 މެޗުން 28 ޕޮއިންޓް ލިބިފައިވާއިރު، ހޮފެންހައިމަށް ވަނީ 16 މެޗުން 27 ޕޮއިންޓް ލިބިފައެވެ.