ކޮވިޑްގައި އިތުރު މީހަކު ނިޔާވެއްޖެ
15 ޑިސެމްބަރު 2021 | ބުދަ 16:35އެމީހާ ނިޔާވެފައިވަނީ ބުދަ ދުވަހު ހެނދުނު 10:30ގައި
ކޮވިޑުގައި ނިޔާވާ މީހުން ވަޅުލުމަށް ޚާއްސަ ކުރެވިފައިވާ ހުޅުމާލެ ސަހަރާ
ކޮވިޑް-19ށް ފަރުވާ ހޯދަމުން ދިޔަ އިތުރު މީހަކު ނިޔާވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ، ނިޔާވެފައިވަނީ ހއ. އަތޮޅު ހޮސްޕިޓަލްގައި ފަރުވާ ހޯދަމުންދިޔަ 62 އަހަރު ފިރިހެނެއް ކަމަށެވެ. އެމީހާ ނިޔާވެފައިވަނީ ބުދަ ދުވަހު ހެނދުނު 10:30ގައި ކަަމަށް އެޗްޕީއޭއިން ބުނެއެވެ.
މިއާއެކު ކޮވިޑް ބަލީގައި ރާއްޖެއިން ނިޔާވި މީހުންގެ ޖުމްލަ ވަނީ 259އަށް އަރާފައެވެ.
ބުރާސްފަތި ދުވަހު އިތުރު މީހަކު ނިޔާވެފައިވާއިރު، މިމަހުގެ 11ވީ ހޮނިހިރު ދުވަހު އައްޑޫ ކޮވިޑް މެނޭޖްމެންޓް ފެސިލިޓީގައި ފަރުވާ ދެމުންދިޔަ 83 އަހަރުގެ ދިވެހި ފިރިހެނަކު ނިޔާވެފައިވެއެވެ. އަދި މިމަހުގެ 10ވީ ހުކުރު ދުވަހުވެސް ހުޅުމާލެ މެޑިކަލް ފެސިލިޓީގައި އެޑްމިޓްކޮށްގެން ފަރުވާދެމުންދިޔަ އުމުރުން 82 އަހަރުގެ ދިވެހި ފިރިހެނެއް ނިޔާވެފައިވެއެވެ.
އެޗްޕީއޭގެ ތަފާސްހިސާބުތައް ދައްކާ ގޮތުން އަންގާރަ ދުވަހުގެ ނިޔަލަށް 93،370 މީހުން ބައްޔަށް ޕޮޒިޓިވްވެފައިވެއެވެ. 91،118 މީހުން ބަލިން ރަނގަޅުވެފައިވެއެވެ.
