ޝާމިލުކުރުމުގެ ސިޔާސަތަށް އަހުލުވެރިކުރުމުގެ ސަރަހައްދީ މަސައްކަތު ބައްދަލުވުން ކުޅުދުއްފުށީގައި ފަށައިފި
މި މަސައްކަތު ބައްދަލުވުމުގައި ތިލަދުންމަތީގެ 23 ރަށެއްގެ 25 ސްކޫލަކުން 41 މުވައްޒަފަކު ބައިވެރިވޭ
ޝާމިލް ކުރުމުގެ ސިޔާސަތައް އަހުލުވެރި ކުރުމަށް ސަރަހައްދީ ފެންވަރުގައި މިއަދު ފެށި މަސައްކަތްު ބައްދަލްވުމުގެ ތެރެން
ޝާމިލުކުރުމުގެ ސިޔާސަތަށް އަހުލުވެރިކުރުމަށް ސަރަހައްދީ ފެންވަރުގައި ބާއްވާ މަސައްކަތު ބައްދަލުވުން ކުޅުދުއްފުށި ސިޓީގައި ފަށައިފިއެވެ.
ބުދަ ދުވަހު ފެށި މި މަސައްކަތު ބައްދަލުވުމުގައި ތިލަދުންމަތީގެ 23 ރަށެއްގެ 25 ސްކޫލަކުން 41 މުވައްޒަފަކު ބައިވެރިވިއެވެ.
މި ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުން ކުޅުދުއްފުށީ ރީޖަނަލް ހޮސްޕިޓަލުގެ ޑެޕިއުޓީ ސީއީއޯ އަހުމަދު ދާއޫދު ވިދާޅުވީ، މި ސަރަހައްދަކީ އާބާދީ ބޮޑު ސަރަހައްދަކަށްވާއިރު މި ސަރަހައްދުގައި ނުކުޅެދުންތެރިކަން ހުންނަ ކުދިންގެ ނިސްބަތް ވަރަށް މަތިކަމަށެވެ.
އެހެންނަމަވެސް ދާދި ފަހަކާ ޖެހެންދެން ވެސް މިފަދަ ފަރާތްތަކަށް ފޯރުކޮށްދޭން ޖެހޭ ވަސީލަތްތަކާއި ޚިދުމަތްތައް ފޯރުކޮށްދިނުމުގައި އެކަމަށް ޖާމިނުވާ ފަރާތްތައް އެންމެ އެކަށީގެންވާ ގޮތެއްގައި މަސައްކަތްކޮށްފައިނުވާކަން ފާހަގަކުރައްވަމުން ދާއޫދު ވިދާޅުވީ، އެހެންނަމަވެސް އަދުގެ ސަރުކާރުން ނުކުޅެދުންތެރިކަން ހުންނަ ކުދިންނަށް ރަނގަޅު ޚިދުމަތްތަކެއް ދިނުމަށް އެކަށީގެންވާ މަސައްކަތްތަކެއް ކުރަމުންދާ ކަމަށެވެ.
މި ރަސްމިއްޔާތުގައި ވާހަކަދައްކަވަމުން އަފީފުއްދީން ސްކޫލުގެ ޕްރިންސިޕަލް ނާސިހާ އިދުރީސް ވިދާޅުވީ ދަރިވަރު ވަކިން އެކަހެރިކޮށް ކިޔަވައިދިނުމަށްވުރެ އެހެން ދަރިވަރުންނާ ޝާމިލުކޮށްގެން ކިޔަވައިދިނުމުން ދަރިވަރަށް އަންނަ ކުރިއެރުން އެ ސްކޫލުން ތަޖުރިބާކުރަމުންދާކަމަށެވެ.
ޔުނިސެފްގެ ބޮޑު އެހީތެރިކަމާއެކު ފެށި މި މަސައްކަތު ބައްދަލުވުން ރާއްޖޭގެ ދެކުނުގައި ވެސް ކުރިއަށްދާނެއެވެ. މި ބައްދަލުވުމުގައި ފެސިލިޓޭޓަރުންގެ ގޮތުގައި އިންކުލޫސިވް އެޑިއުކޭޝަންގެ ޓެކްނިކަލް ކޮމެޓީގެ ޗެއަރ އަބުދުﷲ ރަޝީދާއި ޑިޕާޓްމަންޓް އިންކުލޫސިވް އެޑިއުކޭޝަންގެ ބޭފުޅުންގެ އިތުރުން އިމާދުއްދީން ސްކޫލުގެ އިންކުލޫސިވް އެޑިއުކޭޝަންގެ ބޭފުޅަކާއި އައްޑޫ ސިޓީ މަރަދޫ ސްކޫލުގެ އިންކުލޫސިވް އެޑިއުކޭޝަންގެ ބޭފުޅެއް ބައިވެރިވަޑައިގަންނަވަ އެވެ.
