ތިން ޖަލަކުން ކޮވިޑްގެ ކޭސްތަކެއް ފެނިއްޖެ
ހުޅުމާލެ ޖަލުންނާއި މާލެ ޖަލުން، އަދި މާފުށި ޖަލުން ކޮވިޑްގެ ކޭސްތަކެއް ވަނީ ފެނިފައި
ޖަލުން ސާމްޕަލް ނެގުން
ތިން ޖަލަކުން ކޮވިޑް-19ގެ ކޭސްތަކެއް ފެނިފައިވާކަމަށް މޯލްޑިވްސް ކަރެކްޝަނަލް ސަރވިސްއިން ބުނެފިއެވެ.
ކަރެކްޝަންސްއިން ބުނީ ކޮވިޑްގެ އަލާމާތް ހުރެގެން ނެގި ސާމްޕަލް ތަކުން ހުޅުމާލެ ޖަލުން 1 އޮފިސަރަކު ޕޮޒިޓިވްވެފައިވާކަމަށެވެ. މާލެ ޖަލުން 8 ގައިދީއަކު ޕޮޒިޓިވްވެފައިވާކަމަށާއި، މާފުށި ޖަލުންވެސް ގައިދީއަކު ޕޮޒިޓިވް ވެފައިވާކަމަށެވެ.
މި ކޭސްތައް ފެނުމާއެކު އިތުރު ގައިދީންނާއި އޮފިސަރުންގެ ސާމްޕަލް ނަގައި، ޓެސްޓުކުރުމުގެ މަސައްކަތް ކުރިއަށްދާކަމަށް ކަރެކްޝަންސްއިން ބުނެފައިވެއެވެ.
ކޭސްތަކާގުޅިގެން މި ތިން ޖަލުގައި ރައްކާތެރިކަމުގެ އިތުރު ފިޔަވަޅުތައް އަޅަމުންދާކަމަށް ކަރެކްޝަންސްއިން މައުލޫމާތުދީފައިވެއެވެ.
މީގެ ކުރިން މާލެ ޖަލާއި ހުޅުމާލެ ޖަލު، އަދި މާފުށީ ޖަލުން ކޮވިޑް-19ގެ ކޭސްތަކެއް ފެނުމާއެކު އެ ތިން ޖަލުވެސް ލޮކްޑައުންކޮށްފައިވެއެވެ. އެއާއެކު ޖަލުތަކުގައިތިބި ހައި ރިސްކު ގައިދީން ގޭބަންދަށް ބަދަލުކުރުމުގެ މަސައްކަތް ކަރެކްޝަންސްއިން ކޮށްފައިވެއެވެ. މިވަގުތުވެސް ގޭ ބަންދުގައި ހައި ރިސްކު ބައެއް ގައިދީން ތިބިކަމަށް ކަރެކްޝަންސްއިން ބުނެއެވެ.
