ވެލެންސިއާގެ ކޯޗު އާތީ މަގާމުން ވަކިވެއްޖެ
14 ޑިސެމްބަރު 2021 | އަންގާރަ 11:18ޗެރިޓީ ޝީލްޑް މެޗަށް ވެލެންސިއާ ނުކުންނާނީ ކުޑަހީނާއާއެކު
ކްލަބް ވެލެންސިއާގެ ކޯޗު މުޙައްމަދު އާތިފް (އާތީ)
ނިމިދިޔަ ސީޒަނުގައި ކުލަބު ވެލެންސިއާގެ ކޯޗުކަމުގެ މަގާމުގައި ހުރި ތަޖުރިބާކާރު ކޯޗު މުޙައްމަދު އާތިފް (އާތީ) މަގާމުން ވަކިވެއްޖެއެވެ.
އައު ސީޒަނަށް ތައްޔާރުވުމުގެ ގޮތުން ވެލެންސިއާއިން ފަރިތަކުރުންތައް ފަށާފައިވާއިރު، އެ ޓީމުގެ ފަރިތަކުރުންތައް ކުރިއަށް ގެންދަނީ އެސިސްޓެންޓް ކޯޗު އިސްމާއިލް އާސިފް (ކުޑަހީނާ) ގެ ބެލުމުގެ ދަށުންނެވެ.
އެހެންކަމުން ބުދަ ދުވަހުގެރޭ ރާއްޖޭގެ ފުޓްބޯޅަ ސީޒަން ހުޅުވާ އެފްއޭ ޗެރެޓީ ޝީލްޑް މެޗަށް ވެލެންސިއާއިން ނުކުންނާނީ ކުޑަހީނާގެ އިރުޝާދުގެ ދަށުންނެވެ. އެ މެޗުގެ ކުރިން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ވެލެންސިއާގެ ކޯޗިން ޓީމުގައި ހިމެނޭ އާފިއު މުޙައްމަދު ބުނީ ވެލެންސިއާގެ ކޯޗުކަން ދޫކޮށްލުން އެއީ އާތީގެ އަމިއްލަ ނިންމުމެއް ކަމަށެވެ. އަދި ވެލެންސިއާގެ ކޯޗުގެ މަގާމުން އާތީ ވަކިވުމާ ގުޅިގެން ކޯޗަކު ހޯދުމުގެ މަސައްކަތް ކުރަމުންދާ ކަމަށްވެސް ބުންޏެވެ.
އާތީ ވަނީ 2019 ވަނަ އަހަރުގެ ސީޒަނުގެ ޗެރިޓީ ޝީލްޑް ޓީސީ ސްޕޯޓްސް ކުލަބަށް ކާމިޔާބުކޮށްދީފައެވެ. އެކަމަކު އެ ސީޒަނުގެ ވަކި ހިސާބަކުން ޓީސީގެ ކޯޗުކަމުން އިސްތިއުފާ ދިނުމަށްފަހު އާތީ ދެން ފެނުނީ މިދިޔަ ސީޒަނުގައި ވެލެންސިއާ ބެންޗުންނެވެ. އާތީގެ ކޯޗުކަމުގައި ވެލެންސިއާއިން ވަނީ މިދިޔަ ސީޒަނުގައި ލީގުގެ ރަނަރަޕްކަން ހޯދައިފައެވެ.
މީގެ ކުރިން ގައުމީ އަންހެން ޓީމުގެ ކޯޗުކަމާއި ފިރިހެން ޓީމުގެ އެސިސްޓަންޓް ކޯޗުކަންވެސް ކުރި އާތީ ވަނީ ޔުނައިޓެޑް ވިކްޓަރީ (ޔޫވީ) އާއެކުވެސް ކާމިޔާބު މަސައްކަތްތަކެއް ކޮށްފައެވެ.
އެގޮތުން އާތީގެ ކޯޗުކަމުގައި ގައުމީ އަންހެން ޓީމަށް ސިންގަޕޫރުގައި ބޭއްވި މުބާރާތަކުން ތިންވަނަ ހޯދައިދީ، އެ ޓީމަށް ބޮޑު ކުރިއެރުމެއް ހޯދައިިދިނެވެ. އަދި ވަރުގަދަ ޓީމުތަކާ ދެކޮޅަށް ކުޅެ، އަންހެން ފުޓްބޯޅައަށް ކުރިއެރުންތަކެއް ހޯދައިދޭން އާތީ މުހިންމު މަސައްކަތްތަކެއް ކުރިއެވެ.
