އެކުވެރިކަމުގެ މެޗުތަކަކަށް އިންޑިއާގެ ވޮލީބޯޅަ ޓީމެއް ރާއްޖެއަށް

މި މަހު ބަންގްލަދޭޝްގައި ފަށާ ސެންޓްރަލް ޒޯން ވޮލީބޯޅަ މުބާރާތުގެ ކުރިން އިންޑިއާގެ ހައިދަރުއާބާދު ސްޕައިކާސްއިން ރާއްޖޭގައި އެކުވެރިކަމުގެ މެޗުތަކެއް ކުޅުމަށް ހަމަޖެހިއްޖެއެވެ.

މީގެ ކުރިން މި މަހު ރާއްޖެއިން ވަނީ ސްރީ ލަންކާއާ ދެކޮޅަށްވެސް އެކުވެރިކަމުގެ ތިން މެޗެއް ކުޅެފައެވެ. ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ބުނީ މި ތިން މެޗުގައި ރާއްޖޭގެ ގައުމީ ޓީމުގެ ފަރާތުން މެޗަކަށްވުރެ މެޗެއް ކުޅުން ރަނގަޅުކުރި ކަމަށެވެ.

ވީއޭއެމުގެ ރައީސް މުޙައްމަދު ރަނޭޝް (ރަނޭ) "ރާއްޖެ.އެމްވީ" އަށް ދެއްވި ޚާއްސަ އިންޓަވިއުއެއްގައި ވިދާޅުވީ އިންޑިއާގެ ހައިދަރުއާބާދު ސްޕައިކާސްއިން މި މަހު 16 ވަނަ ދުވަހު ރާއްޖެ އަންނާނެ ކަމަށާއި، އެ ޓީމުން ރާއްޖޭގެ ސީނިއާ ވޮލީ ޓީމާއެކު ތިން މެޗު ކުޅެން ހަމަޖެހިފައިވާ ކަމަށެވެ. އެ މެޗުތައް ކުޅޭނީ 16 ވަނަ ދުވަހުގެރޭ 21:00 ގައި އާއި، 17 އަދި 18 ވަނަ ދުވަހުގެރޭ 20:00 ގައި ކަމަށްވެސް ރަނޭ ވިދާޅުވިއެވެ.

ރަނޭ ވިދާޅުވީ ކުރިން ގައުމީ ވޮލީ ޓީމު އިންޑިއާއަށް ޓްރެއިނިން ކޭމްޕަށް ދިޔުމަށް ނިންމާފައިވީ ނަމަވެސް، އެ ނިންމުން ބަދަލުކުރީ ކޮވިޑް-19 ގެ މި ހާލަތުގައި ރައްކާތެރިކަމުގެ ގޮތުން ދަތުރުކުރަން ބޭނުންނުވާތީ ކަމަށެވެ. އަދި ރާއްޖޭގައި އެކުވެރިކަމުގެ މެޗުތަކެއް ކުޅުމުގެ ސަބަބުން އޭގެ ފައިދާ އެތައް ގޮތަކުން ކުރާނެ ކަމަށް ދެކޭ ކަމަށާއި، އެގޮތުން ވާދަވެރި މެޗުތަކެއް ސަޕޯޓަރުންނަށް ފެނުމާއި، ސީނިއާ ޓީމުގެ ކުޅުންތެރިންގެ ފަރާތުން ޒުވާން ގައުމީ ޓީމަށްވެސް ފައިދާތަކެއް ކުރާނެ ކަމަށްވެސް ރަނޭ ވިދާޅުވިއެވެ.

މި މަހު ބަންގްލަދޭޝްގައި ބާއްވާ މުބާރާތުގައި ގައުމީ ފިރިހެން ވޮލީ ޓީމުގެ އިތުރުން އަންހެން ޓީމުވެސް ވާދަކުރާނެއެވެ. ފިރިހެން ޓީމުގެ ކޯޗު މުޙައްމަދު ސާޖިދު (ކާއްޓޭ) ގެ އިރުޝާދުގެ ދަށުން 15 ކުޅުންތެރިންގެ ސްކޮޑެއް މިހާރު ފައިނަލް ކޮށްފައިވާއިރު، ސެންޓްރަލް ޒޯން މުބާރާތަށް ދާނީ 12 ކުޅުންތެރިންގެ ސްކޮޑެކެވެ. އެހެންކަމުން މިހާރު އެކުލަވާލި ސްކޮޑުން އަދި ތިން ކުޅުންތެރިއަކު ބާކީވާނެއެވެ. މި މުބާރާތާ ކުރިމަތިލާއިރު، ދާދި ފަހުން ގައުމީ ފިރިހެން ވޮލީބޯޅަ ޓީމުގެ ކެޕްޓަނުގެ މަގާމަށް ތަޖުރިބާކާރު ވޮލީ ކުޅުންތެރިޔާ އިސްމާއިލް ސާޖިދު (ކުޑަކާއްޓޭ) ވަނީ ހަމަޖައްސާފައެވެ.

މިމަހު ސެންޓްރަލް ޒޯން ވޮލީބޯޅަ މުބާރާތް ބަންގާޅުގައި ބާއްވާއިރު، ފިރިހެން މުބާރާތުގައި ވާދަކުރާ ގައުމުތަކަކީ ރާއްޖެ އާއި، ނޭޕާލާއި، ސްރީ ލަންކާ އާއި، އުޒްބެކިސްތާން އަދި ބަންގްލަދޭޝެވެ. އަދި އަންހެން މުބާރާތުގައި ރާއްޖެއާއެކު ވާދަކުރާނީ ކިރްގިސްތާނާއި، ނޭޕާލާއި، އުޒްބެކިސްތާން އަދި ބަންގްލަދޭޝެވެ.