ދެވަނަ ބުރުގައި ޔުނައިޓެޑާއި ޕީއެސްޖީގެ ކުރިމަތިލުމެއް

ޔުއެފާ ޗެމްޕިއަންސް ލީގުގެ ދެވަނަ ބުރުގައި މެންޗެސްޓާ ޔުނައިޓެޑާއި ޕީއެސްޖީ ބައްދަލުކުރަން ޖެހިއްޖެއެވެ.

ޗެމްޕިއަންސް ލީގުގެ ގަދަ 16 ގެ ގުރުނެގުން ކުރިއަށްދިޔައީ ހޯމަ ދުވަހުގެ ހަވީރު ސްވިޓްޒަލެންޑުގެ ނިޔޯނުގައި ހުންނަ ޔުއެފާ ހެޑްކުއާޓަރުގައެވެ. މި ސީޒަނުގެ ޗެމްޕިއަންސް ލީގުގެ ދެވަނަ ބުރުގައި ޔުނައިޓެޑާއި ޕީއެސްޖީ ބައްދަލުކުރާއިރު، މިއީ މި ސީޒަނަށް ޕީއެސްޖީއަށް ބަދަލުވި އާޖެންޓީނާގެ ތަރި ލިއޮނަލް މެސީ އާއި މެންޗެސްޓާ ޔުނައިޓެޑަށް އަލުން ސޮއިކުރި ޕޯޗުގަލުގެ ތަރި ކްރިސްޓިއާނޯ ރޮނާލްޑޯގެ ކުރިމަތިލުމެއް ފެންނާނެ މެޗެކެވެ.

މި ފަހަރުގެ ގުރުއަތުލުމުގައި ޔުނައިޓެޑަށް ފުރަތަމަ ދިމާވީ ވިޔަރެއާލާ ކުޅޭ ގޮތަށެވެ. އެކަމަކު ޔުއެފާގެ ގަވާއިދުގައިވާ ގޮތުން އެއް ގްރޫޕެއްގައި އޮތް ދެ ޓީމަކަށް ދެވަނަ ބުރުގައި ނުކުޅެވޭނެއެވެ. އެހެންކަމުން އަލުން ގުުރުއަތުލައިގެން ޔުނައިޓެޑަށް ދިމާވީ ޕީއެސްޖީއެވެ.

މި ފަހަރުގެ މުބާރާތުގެ ދެވަނަ ބުރުގައި ޔުނައިޓެޑާއި ޕީއެސްޖީ ބައްދަލުކުރާއިރު، ޔުނައިޓެޑުން ވަނީ މި ފަހުން ޕީއެސްޖީއާ ދެކޮޅަށް ޗެމްޕިއަންސް ލީގުގައި ހަތަރު ފަހަރެއްގެ މަތިން ބައްދަލުކޮށްފައެވެ. އެގޮތުން 2018-2019 ވަނަ އަހަރުގެ ސީޒަނުގައި ޗެމްޕިއަންސް ލީގުގެ ދެވަނަ ބުރުގައި ޔުނައިޓެޑުން ޕީއެސްޖީ ކަޓުވާލިއިރު، ޕީއެސްޖީން ވަނީ މިދިޔަ ސީޒަނުގެ ޗެމްޕިއަންސް ލީގުގެ ގްރޫޕް ސްޓޭޖުން ޔުނައިޓެޑް ކަޓުވާލާފައެވެ.

ދެވަނަ ބުރުގައި ދެން ކުޅޭ އެހެން މެޗުތަކަށް ބަލާލާއިރު، މި މުބާރާތުގެ އެންމެ ކާމިޔާބު ޓީމު ކަމަށްވާ ރެއާލް މެޑްރިޑް ކުޅޭނީ ބެންފީކާއާ ދެކޮޅަށެވެ. އަދި މެންޗެސްޓާ ސިޓީއާ ދެކޮޅަށް ވިޔަރެއާލް ނުކުންނައިރު، ބަޔާން މިއުނިކް ކުޅޭނީ އެތުލެޓިކޯ މެޑްރިޑާއެވެ. މި ފަހަރުގެ ޗެމްޕިއަންސް ލީގުގެ ބުރުން މުޅިން އަލަށް ފުރުސަތު ހޯދި ސަލްޒްބާގުން ލިވަޕޫލާ ދެކޮޅަށް ނުކުންނައިރު، އިންޓަ މިލާން ކުޅޭނީ އަޔަކްސްއާއެވެ. މީގެ އިތުރުން ދެވަނަ ބުރުގައި ސްޕޯޓިން ލިޒްބަނުން ޔުވެންޓަސްއާ ދެކޮޅަށް ނުކުންނައިރު، އެންމެ ފަހުގެ ޗެމްޕިއަން ޗެލްސީ ބައްދަލުކުރާނީ ލިލްއާއެވެ.

ޗެމްޕިއަންސް ލީގުގެ މި ފަހަރުގެ ފައިނަލް މެޗު އަންނަ އަހަރު މެއި މަހު ރަޝިއާގެ ސެއިންޓް ޕީޓާސްބާގުގައި ކުޅޭއިރު، ދެވަނަ ބުރުގެ މެޗުތައް ކުޅޭނީ އަންނަ އަހަރުގެ ފެބްރުއަރީ 15-16 އަދި 22-23 ގައެވެ.