މޯލްޑިވްސް މެރިން އެކްސްޕޯ 2021 ފަށައިފި
13 ޑިސެމްބަރު 2021 | ހޯމަ 11:34މިއަހަރުގެ މޯލްޑިވްސް މެރިން އެކްސްޕޯ ކުރިއަށްދާނީ ޑިސެމްބަރު 13، 14 އަދި 15 ވަނަ ދުވަހު ހުޅުމާލޭގެ ސެންޓްރަލް ޕާކުގައި
މޯލްޑިވްސް މެރިން އެކްސްޕޯ 2021 ހުޅުވުން
މޯލްޑިވްސް މެރިން އެކްސްޕޯ 2021 ރަސްމީކޮށް ފަށައިފިއެވެ.
ހުޅުމާލޭ ސެންޓްރަލް ޕާކުގައި ހޯމަ ދުވަހުގެ މެންދުރު މި އެކްސްޕޯ ރަސްމީކޮށް ހުޅުވައިދެއްވީ މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަންއެވެ.
ނޭޝަނަލް ބޯޓިންގ އެސޯސިއޭޝަން އޮފް މޯލްޑިވްސް (އެންބީއޭއެމް)ގެ އިސްނެގުމާއެކު އޮފިޝަލް އިވެންޓު އޯގަނައިޒާއިން އިންތިޒާމު ކޮށްގެން ކުރިއަށްގެންދާ މި އެކްސްޕޯއަކީ ދެމެހެއްޓެނިވި ގޮތެއްގައި މެރިން އިންޑަސްޓްރީ ކުރިއަރުވައި، މި ސިނާއަތުގައި ދިމާވާ ދަތިތަކަށް ހައްލު ހޯދުމުގެ ގޮތުން އޮޑިދޯނިފަހަރުގެ ވެރިންނާ، މެރިން ސާވިސްދޭ ފަރާތްތައް އެއްތަން ކުރުމަށް ބާއްވާ އެކްސްޕޯއެކެވެ.
މިނިސްޓަރ ވިދާޅުވީ ފަތުރުވެރިކަން ކުރިއެރުވުމަށް ބަލާނަމަވެސް ފަތުރުވެރިކަން ކުރިއެރުވުމަށްޓަކައި ބޭނުންކުރާ ހުރިހާ ވަސީލަތްތަކެއްގެ މައުލޫމާތު މިތަނުން ލިބެން ހުންނާނެ ކަމަށެވެ.
މީގެ އިތުރުން ރާއްޖޭގެ ރައްޔިތުންނާ ކަނޑާ އޮތް ގުޅުން ފާހަގަކުރައްވާ މިނިސްޓަރ ވިދާޅުވީ ރާއްޖޭގެ އިގްތިޞާދީ ސަރަހައްދުގެ ބޮޑުމިނަކީ ގާތްގަނޑަކަށް އެއް މިލިއަން ސްކޮޔާ ކިލޯމީޓަރު ކަމަށް ވާއިރު، ބިމުގެ ބޮޑުމިން 300 ސްކޮޔާ މީޓަރަށްވުރެ ކުޑައެވެ. އެހެންކަމުން ރާއްޖޭގެ ގިނަ ކަންތައްތަކެއް ބިނާވެފައި އޮތީ ގުދުރަތީ ގޮތުން ރާއްޖެއަށް ލިބިފައިވާ ކަނޑުގެ މައްޗަށެވެ.
އެގޮތުން ރާއްޖޭގެ މަސްވެރިކަމަކީ ދިރިއުޅުމަށްޓަކައި އެންމެ ގިނަ އަދަދެއްގެ ރައްޔިތުން ކުރަމުން އަންނަ މަސައްކަތްކަން ފާހަގަ ކުރައްވާ މިނިސްޓަރ ވިދާޅުވީ 17،000 މަސްވެރިން ސީދާ މަސްވެރިކަމުގެ މަސައްކަތުން ދިރިއުޅުން ބިނާކުރަމުން އަންނަ ކަމަށެވެ. އަދި އެފަރާތްތަކުގެ އާއިލާ ހިމަނައިފިނަމަ މި އަދަދު ވަރަށް މަތިވާނެ ކަމަށެވެ.
އެންމެ ފުރަތަމަ 2014 ވަނަ އަހަރު ފެށި މި އެކްސްޕޯއަށް އަންނަނީ ވިޔަފާރިތަކާ، ވިޒިޓަރުންގެ އިތުރުން ސްޕޮންސަރުންގެ ފަރާތުން ވަރަށް ބޮޑު އެއްބާރުލުމެއް ލިބެމުންނެވެ. އެންބީއޭއެމްގެ ރައީސް އަހުމަދު އަފްރާހު ވިދާޅުވީ މި އެކްސްޕޯގެ ތެރެއިން ވިޔަފާރިތަކުގެ އައު ޕްރޮޑަކްޓްތައް ލޯންޗު ކުރެވިގެންދާނެއެވެ. މީގެ އިތުރުން މި ސިނާއަތުގައި ދިމާވާ ގޮންޖެހުން ތަކާމެދު ފުޅާ ދާއިރާއެއްގައި މަޝްވަރާ ކުރެވިގެންދާނެ ކަމަށެވެ.
މިއަހަރުގެ މޯލްޑިވްސް މެރިން އެކްސްޕޯ ކުރިއަށްދާނީ ޑިސެމްބަރު 13، 14 އަދި 15 ވަނަ ދުވަހު ހުޅުމާލޭގެ ސެންޓްރަލް ޕާކުގައެވެ.
