ބަޔަކު ބަރަހަނާކުރަން ހިއްލާލި އަމިއްލަ ފޮށާ

ބަޔަކަށް އޮޅިދާނެއެވެ. ބަޔަކަށް އޮޅުވާވެސް ލެވިދާނެއެވެ. އެކަމަކު އެންމެނަށް އޮޅުވާލުމަކީ އަބަދަކު ކުރެވޭނެ ކަމެއް ނޫނެވެ. ކިތައްމެ ސިޔާސީވެފައި ފުންނާބުއުސް ކަމުގައިވިއަސް މިހަޤީގަތަކަށް އަންނާނެ ބަދަލެއް ނޯވެއެވެ. މުސްކުޅިން ބުނެ އުޅެނީ އެހެން އުޅެންޏާ ދާނީ ހުޅުނބުކަމަށެވެ.

އެބީދައިން ބަލާއިރު، ނިމިދިޔަ ރިޔާސީ އިންތިޚާބުގެ ވާހަކަ މިހާރު ނިމިއްޖެއެވެ. ނަގަނަގާފައި ދައްކާކަށް އެއީ މިހާރު ބާވާހަކައެކެވެ. ދައްކާކަށް ތާހިރު ވާހަކައެއްވެސް ނުމެނޫންމެއެވެ. ކަންވީ ގޮތާއި ކަންނިމުނުގޮތް އެނގި ނިމިއްޖެއެވެ. އިތުރަކަށް ދެން އޭގައި ދައްކާނޭ ވާހަކައެއް ނެތެވެ. ފޯރިނަގާފައި ކިޔާނެ ލަވައެއް ނެތެވެ. ދައްކަން އޮތިއްޔާ ދައްކަން އޮތީ ބަލިވި ބަޔަކު ބަލިވިގޮތާއި އަމިއްލަށް ރަނގަޅު ކުރާނެ ގޮތުގެ ވާހަކައެވެ. އަދި  ބަލިވީ ކީއްވެކަން ޤަބޫލު ކުރުމުގެ ވާހަކައެވެ.

ނިމިދިޔަ ރިޔާސީ އިންތިޚާބުގައި ރައީސް ޔާމީނާއި ޕީޕީއެމް ބަލިވެގެން ދިޔައީކީ ދޮޅަހަކަށް ވޯޓުގެ ފަރަގަކުންނޫނެވެ. އެއަށްވުރެ ބޮޑު ބައްޔަކުންނެވެ. ތަފާތު ބޮޑުކޮށެވެ. ބަލިވީ ވޯޓުންނެވެ. އަދި ބަލި ޤަބޫލު ނުކުރީމާ ބަލި ޤަބޫލު ކުރުވަން މަޖްބޫރުކޮށް ކޯޓުންނެވެ. އިހަށް ދުވަހު ކޮށްގެން ބަލައިގެން ހުކުމް ކުރި ރާއްޖޭގެ އެންމެމަތީ ކޯޓުންނެވެ. އިންތިޚާބުގެ ކަންކަމުގައިވެސް ފަހުބަސްބުނާ ސުޕްރީމް ކޯޓުންނެވެ.

ޕީޕީއެމްގެ ބާރުގައި އޮތް ރައީސް ޔާމީންގެ މެޖޯރިޓީ އޮތް ރައްޔިތުންގެ މަޖިލީހުން ކަނޑައެޅި ސުޕްރީމް ކޯޓުގެ ބެންޗުން އެކަން ކަނޑައެޅުމުގެ ކުރިން ޖެހި ސަކަރާތާއި ދެއްކި ވާހަކަތައް އިތުރަށް ދައްކަ ދައްކާފައި ބޮޑާހޭކުމުން އަންނަނީ އަމަށަކު ހިންޏެއް ނޫނެވެ. ފާހަގަ ވެއްޓުނު ވާހަކައާއި އަނގޮޓީގެ ވާހަކައާއި ދެންވެސް އޭރު ދެއްކިއްޔާ ދެއްކި ވާހަކައެއް ދައްކަދައްކާފައި ޓަސްބުނެ ސުޕްރީމް ކޯޓަށް ވެއްދީ ސީދާ ބޮޑުތަނުން ބަލިވި ރައީސް ޔާމީނެވެ. އިންތިޚާބު ބާތިލް ކުރާނެ ކަމަށް ޕާޓީކުދިންނާއި އަދުރޭމެން އުފަލުން ނަށަމުން އެވާހަކަ ކާޅުގޮވާހެން ގޮވާ ނަގަމުންނެވެ. އެކޯޓުން ނިންމީ އިންތިޚާބު ބާތިލް ކުރަން ޖެހޭ ތަނެއް ނެތްކަމަށެވެ. ފުރާޅުން ޓިނުނަގާފައި ޔާމީން ގަޔާވާ ބަޔަކުލައިގެން އޭރުއޮތް ސުޕްރީމް ކޯޓުންނެވެ. ކުރީގެ އުއްތަމަ ފަނޑިޔާރު ޢަބްދުﷲ ސައީދުމެންނާއެކު ހުކުމްތައްކޮށް، ކޮޅު ބަދަލުކޮށްލައިގެން އެހުކުމް އަނބުރާލައި ޕީޕީއެމް ގަޔާވާ ގޮތަކަށް ހުކުމްތައް ނެރުއްވި މަޝްހޫރު ދީދީތައްވެސް އިންނެވި ސުޕްރީމް ކޯޓުންނެވެ. އެހުކުމާއެކު ރައީސް އިބްރާހީމް މުހައްމަދު ސޯލިހް ރައީސްކަން ކުރައްވާތާ 3 އަހަރަށްފަހު އަނެއްކާ ތިޔަފެށީ އެއްކަލަ ހޮޅި ވާހަކައެވެ. ޕާޓީ ކުދިންކޮޅު ހިފަހައްޓަންވެސް ތިޔަވާހަކަ ދެއްކީމާ ހާމަވަނީ މުޅިން އެހެން އެއްޗެކެވެ. އެކަމަކުވެސް ތިޔަ ވާހަކައެއް ނިކަން ރަނގަޅަށް ދައްކާލަމާ ހިނގާށެވެ.

ތިޔަބުނާ އީސީ ޝަރީފަކީ ސީދާ ޔާމިން މަޖިލީހަށް ފޮނުވައިގެން ޕީޕީއެމް މެޖޯރިޓީން ނެގި މީހެކެވެ. ޚުދު ޔާމީންގެ އަރިސް ބޭފުޅެކެވެ. އިންތިޚާބު ބޯމަތިވަމުން އައިއިރު އިދިކޮޅުން ލައްކަ ވާހަކަ ދެއްކިއެވެ. އިންތިޚާބާމެދު ކަންބޮޑުވުން ފާޅުކޮށެވެ. އެކަމަކު އޭރު ޕީޕީއެމާއި ރައީސް ޔާމީންގެ ސަރުކާރުން ކަހާތަން ހިރުވާވެސް ނުލިއެވެ. އަދި އެހެންކަމެއްވެސް ނިކަން ހަނދާނަށް ގެންނަމާހެއްޔެވެ. އޭރު ބާރު އޮތީ ސީދާ ޔާމީންގެ އަތްޕުޅުގައެވެ. އޭރުގެ އިދިކޮޅަށް ކުރެވޭނެ ހަމަ އެއްކަމެއްވެސް ނެތެވެ. އަމުދުން ޖަލްސާގަނޑެއް ބާއްވާލާނެ ތަނެއް ހިސާބުވެސް ނުދީއޮތީ އޮބިއަޅުވާފައެވެ. ވިއްޔާ ވީކަމަކީ ވެރިކަން ކުރިގޮތާއި ވައްކަންތަކުގެ ވާހަކައިން ރައްޔިތުން ފޫހިވުމެވެ. އަނިޔާވެރިކަން ހިތަށް އަރާފައި ބިރުން ރޫރޫއެޅުމެވެ. މަށަކުވާ ދެން ބޭނުމެއް ނޫނޭ ބުނެ ވޯޓު އަޅައި ވޯޓުންތަޅާ ބޮޑުތަނުން ނޫނެކޭ ބުނީއެވެ.

އަނެއްކާވެސް ތިޔަ ދައްކަން ފެށީ އެވާހަކައެވެ. އެކަމަކު މިފަހަރު ތިޔަގޮވީ އަތަށެވެ. ތިޔަހެއްދުވި ފޭކު ރިޕޯޓުން ހަމަ ރަނގަޅަށްވެސް ފަޟީޙަތްވެ ނިމުނީއެވެ. ވަތަކުތޯވެސް ނުޖެހުނީއެވެ. ތިޔަގޮވާކޮސްތަކަށް ޒުވާބުދޭ މީހުންވެސް ބޮޑުތަނުން އިތުރުވީއެވެ. ތިޔަހޭވިހަޑިއަކުން އިތުރަށް މީހުން ފޫހިވީއެވެ. ދެއަކުރެއްގެ ތަފާތަކުން ސަލާމަތްވިއަސް ހުކުމުގައި އޮތް އެއްޗެއްގެ ވާހަކަ ދައްކާތީ އެއަޑު ކަނޑުވާލަންވެސް މިފަހަރު ތިޔައެޅުނީ އިތުރު ޅައެއްޗެކެވެ. މުސްކުޅިން ބުނެއުޅެއެވެ. ބަޔަކު ފަޟީޙަތް ކުރާންވެސް އަމިއްލަ ފޮށާ ހިއްލާ ނުލާށެވެ. އޮޅިގެން ނަމަވެސް ހިއްލާލެވޭވަރު ބޮޑުވެއްޖިއްޔާ ބަރަހަނާވާނީ އަމިއްލަ މީހާއެވެ. މިފަހަރު ތިޔަވީ އެކަހަލަ ގޮތެކެވެ.