ދިއްދޫއަށް ވަންނަންދިޔަ ދޯންޏެއް ފަޅުތެރެއަށް އަޑިޔަށް ހިނގައްޖެ
13 ޑިސެމްބަރު 2021 | ހޯމަ 10:29ދޯނި އަޑިޔަށް ދިޔަވަގުތު އެއްވެސް މީހަކަށް ގެއްލުމެއް ނުވެ ސަލާމަތްވެފައިވޭ
ދިއްދޫ ފަޅުތެރެއަށް ފެތުނު ދޯނި
ހއ. ދިއްދޫ ނެރުން ވަންނަން ދިޔަ ދޯންޏެއް އަޑިއަށް ހިނގައްޖެއެވެ.
ދިއްދޫ ކައުންސިލްގެ ރައީސް އަބްދުﷲ ރަޝީދު ވިދާޅުވީ މެންދުރު 12:30 ހާއިރު އަޑިޔަށް ދިޔައީ ހއ. އުތީމުން ދިއްދޫ އަށް އައި ދޯންޏެއް ކަމަށެވެ. އެ ދޯނީގައި އެވަގުތު ހަ މީހުން ތިބި އިރު، އެ އެންމެން ވެސް ސަލާމަތްވެފައިވާ ކަމަށް އޭނާ ވިދާޅުވިއެވެ.
އަބްދުﷲ ރަޝީދު ވިދާޅުވި ގޮތުގައި ދޯނި އަޑިޔަށް ދާން މެދުވެރިވީ، ދޯނި ނެރުން ވަންނަން ދިޔަ ގަޑީގައި ނެގި ރާޅަކާ ގުޅިގެން، ނެރު ކައިރީގައި ހުރި ހިލަތަކުގައި ޖެހިގެންނެވެ.
އެ ދޯންޏަކީ އުތީމުގައި ދިރިއުޅޭ ރައްޔިތުން ބޭސްފަރުވާ ކުރުމަށާއި އެހެނިހެން ބޭނުންތަކަށް ދިއްދޫ އަށް ދަތުރު ކުރާ ދޯންޏެއް ކަމަށް ކައުންސިލުން ބުނެއެވެ.
އަދިވެސް އެ ދޯނި އޮތީ މޫދު ފެތިފައި ކަމަށާއި، އެހެންނަމަވެސް ފަޅު ތެރެއަށް ވައްދާފައި ކަމަށް ކައުންސިލްގެ ރައީސް ވިދާޅުވިއެވެ.
