އެމްބާޕޭގެ 100 ވަނަ ލަނޑާއެކު ޕީއެސްޖީއަށް މޮޅެއް

ފްރެންޗް ލީގުގައި އާދީއްތަ ދުވަހުގެރޭ ކުޅުނު މެޗުގައި ޒުވާން ތަރި ކީލިއަން އެމްބާޕޭ ޖެހި ލަނޑުތަކާއެކު ޕީއެސްޖީން މޮނާކޯ ބަލިކޮށްފިއެވެ.

އަމިއްލަ ދަނޑުގައި ކުޅުނު މެޗުން ޕީއެސްޖީ މޮޅުވީ މޮނާކޯ އަތުން 2-0 ގެ ނަތީޖާއަކުންނެވެ.

މި މެޗަށް ޕީއެސްޖީގެ ކުޅުންތެރިން ނުކުތީ އެ ޓީމުގެ ޖާޒީގައި ރަން ކުލައިން ނަންބަރާއި ނަން ޖަހައިގެންނެވެ. އެއީ ދާދި ފަހުން ހަތްވަނަ ފަހަރަށް ބަލޮންޑޯ އެވޯޑް ހޯދި އާޖެންޓީނާގެ ތަރި ލިއޮނެލް މެސީ ކާމިޔާބީއަށް ޚާއްސަކުރުމުގެ ގޮތުންނެވެ. މި އަހަރުގެ ބަލޮންޑޯ އެވޯޑް މެސީ ހާސިލުކުރިއިރު، މި އެވޯޑް އެންމެ ގިނައިން ހޯދާފައިވާ ކުޅުންތެރިޔަކީވެސް މެސީއެވެ.

އާދީއްތަ ދުވަހުގެރޭ ކުޅުނު މެޗުގައި ޕީއެސްޖީން ދެ ލަނޑުވެސް ޖަހާފައިވަނީ ފުރަތަމަ ހާފުގައެވެ. އެގޮތުން މެޗު ފަށައިގެން 12 ވަނަ މިނެޓުގައި ޕެނަލްޓީއަކުން އެމްބާޕޭ ވަނީ ޕީއެސްޖީއަށް ލީޑު ނަގައިދީފައެވެ. މިއީ އޭރިއާ ތެރެއިން ޕީއެސްޖީގެ އެންހެލް ޑި މާރިއާއަށް މޮނާކޯގެ ޖިބްރީލް ސިޑީބޭ ކުރި ފައުލަކަށް، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ދިން ޕެނަލްޓީއެކެވެ.

ދެން މި މެޗުގައި ޕީއެސްޖީން ލީޑު ފުޅާކޮށްފައިވަނީ ފުރަތަމަ ހާފުގެ އިތުރު ވަގުތުގައެވެ. މޮނާކޯގެ ކުޅުންތެރިންނަށް ހެދުނު ގޯހެއްގެ ފައިދާ ނަގައި ކައުންޓަ އެޓޭކެއްގައި މެސީ ދިން ބޯޅައަކުން މި ލަނޑުވެސް ކާމިޔާބުކޮށްދިނީ އެމްބާޕޭއެވެ. މި މެޗުގައި ޖެހި ދެ ލަނޑާއެކު އެމްބާޕޭ ވަނީ ފްރެންޗް ލީގުގައި ޕީއެސްޖީއަށް 100 ލަނޑު ހަމަކޮށްފައެވެ. އެއާއެކު އުމުރުން 22 އަހަރުގެ އެމްބާޕޭ ވެފައިވަނީ ފްރެންޗް ލީގުގެ ތާރީޚުގައި އެއް ޓީމަކަށް 100 ލަނޑު ހަމަކުރި ޖެހި އެންމެ ޒުވާން ކުޅުންތެރިޔާއަށެވެ.

މޮނާކޯ އަތުން ހޯދި މޮޅާއެކު ތާވަލުގެ އެއްވަނައިގައި ޕީއެސްޖީ އޮތީ 13 ޕޮއިންޓުގެ ލީޑަކާއެކުއެވެ. އެގޮތުން ކުޅުނު 18 މެޗުން ޕީއެސްޖީއަށް 45 ޕޮއިންޓް ލިބިފައިވާއިރު، ދެވަނައިގައި އޮތް އޮލިމްޕިކް މާސޭއަށް 17 މެޗުން ލިބިފައިވަނީ 32 ޕޮއިންޓެވެ. އަދި ޕީއެސްޖީ އަތުން ބަލިވި މޮނާކޯ އޮތީ ތާވަލުގެ އަށްވަނައިގައި 18 މެޗުން 26 ޕޮއިންޓާއެކުއެވެ.