ގދ. ފަރެސްމާތޮޑާ، ކޮކާ، އިބްރާހިމް އާގިލް (18އ) މަރާލި މައްސަލާގައި ދައުލަތުން ދައުވާއުފުލާފައިވާ މީހުންގެ ޝަރީއަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އާގިލް މަރާލި މައްސަލައިގައި ދައުލަތުން ދައުވާ ކޮށްފައިވަނީ ލ. ފޮނަދޫ، ހިޔާ، ހަމްދޫން ހަމްޒަތާއި ސ. ހިތަދޫ، ސްވޭހުހީނާގެ، އަލީ މިޖުވާދު މާލިކު އިބްރާހީމްގެ އިތުރުން، ހއ. ދިއްދޫ، ސްނޯބާޑް، އިބްރާހީމް ވިޝާމްގެ މައްޗަށެވެ.

މި މައްސަލައިގައި ހަމްދޫން ހަމްޒަތުގެ މައްޗަށް އުފުލާފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ. ހަމްދޫނުގެ އިތުރުން މިޖުވާދު މާލިކުގެ މައްޗަށްވެސް އުފުލާފައިވަނީ ހަމަ އެ ދައުވާއެވެ. އޭގެ އިތުރުން، މި މައްސަލައިގައި އިބްރާހީމް ވިޝާމްގެ މައްޗަށް އުފުލާފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ.

މި މައްސަލައިގައި ހޯމަ ދުވަހު ކްރިމިނަލް ކޯޓުގައި ކުރިއަށް ދިޔަ އަޑުއެހުމަކީ މައްސަލައިގެ ހެކިބަސް ނެގުމަށް ބޭއްވި އަޑުއެހުމެކެވެ. އެގޮތުން މި މައްސަލައިގެ ސީން އޮފް ކްރައިމް ރިޕޯޓު ތައްޔާރު ކުރެއްވި ފުލުސް އޮފިސަރު ވަނީ ހާޒިރުކޮށްފައެވެ. ދައުލަތާއި ދިފާއުން ވަނީ އެ ހެކިވެރިޔާއާ ސުވާލުކޮށްފައެވެ. ދައުލަތުން އެ ހެކިވެރިޔާ ހާޒިރުކޮށްފައިވަނީ ސީން އޮފް ކްރައިމް ރިޕޯޓަކީ ސައްޙަ ރިޕޯޓެއްކަން ކަށަވަރު ކުރުމަށެވެ.

މި މައްސަލައާ ގުޅިގެން ހެކިބަސް ދެއްވަމުން ހެކިވެރިޔާ ވަނީ ރިޕޯޓުގައި ހިމަނާފައިވާ އަނިޔާގެ ފޮޓޯތަކާއި ގުޅިގެން ދައުލަތުންނާއި ދިފާއުން ކޮށްފައިވާ ސުވާލުތަކަށް ޖަވާބު ދެއްވާފައެވެ. އެގޮތުން އެންމެ ބޮޑެތި ޒަޚަމްތަކެއް ގޮތުގައި ފާހަގަ ކުރެވުނީ ވައަތްފަރާތު މޭ މަތީގައި ހުރި ޒަޚަމްތަކެއްކަން އޭނާ ފާހަގަ ކުރިއެވެ.

މި އަޑުއެހުމުގައި އިތުރު ހެކިވެރިންތަކެއްގެ ހެކިބަސް ނެގުމަށްވެސް އޮތީ ތާވަލު ކުރެވިފައެވެ. އެހެންނަމަވެސް، އެ ހެކިން ހާޒިރު ކުރެވިފައިނުވާތީ ދެން އޮންނަ އަޑުއެހުމެއްގައި އޮންނާނީ ބާކީ ތިބި ހެކިންގެ ހެކިބަސް ނެގުމެވެ.

އާގިލް މަރާލާފައިވަނީ 2018 ވަނަ އަހަރުގެ އޮގަސްޓް މަހުގެ 31 ވަނަ ދުވަހުގެ ރޭ އެމްއެމްއޭ ސަރަހައްދުގައެވެ.