ބޫސްޓަރ ޑޯޒް ޖެހި މީހުންގެ އަދަދު 19،000ށް
މިހާތަނަށް 79،000ށް ވުރެ ގިނަ ބިދޭސީން ވަނީ ވެކްސިންގެ ދެވަނަ ޑޯޒް ފުރިހަމަކޮށްފަ
ކުޅުދުއްފުށީގައި ވެކްސިން ދިނުމުގެ ޕްރޮގްރާމުގެ ތެރެއިން
ކޮވިޑް-19 އިން ރައްކާތެރިވުމަށް ބޫސްޓަރ ޑޯޒް ޖެހި މީހުންގެ އަދަދު 19،000ން މައްޗަށް އަރައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ ހޮނިހިރު ދުވަހުގެ ތަފާސް ހިސާބުތައް ދައްކާގޮތުން، އެ ދުވަހު 485 މީހަކު ވަނީ ބޫސްޓަރ ޑޯޒް ޖަހާފައެވެ. އެއީ މާލެ ސަރަހައްދުން ވެކްސިން ޖެހި 94 މީހުންނާއި، ރަށްރަށުން ބޫސްޓަރ ޑޯޒް ޖެހި391 މީހުންނެވެ. މިއާއެކު ރާއްޖެއިން މިހާތަނަށް 19،432 މީހަކު ވަނީ ބޫސްޓަރ ޑޯޒް ޖަހާފައެވެ.
ހޮނިހިރު ދުވަހު އިތުރު 150 މީހުން ވަނީ ދެވަނަ ޑޯޒް ޖަހާފައެވެ. އެއި މާލެ ސަރަހައްދުން ދެވަނަ ޑޯޒް ޖެހި 15 މީހުންނާއި، ރަށްރަށުން ދެވަނަ ޑޯޒް ޖެހި 135 މީހުންނެވެ. މިއާއެކު ބޫސްޓަރ ޑޯޒް ޖެހި މީހުންގެ އަދަދު ވަނީ 365،482ށް އަރާފައެވެ.
މީގެ އިތުރުން 16 މީހަކު ވަނީ އަލަށް ވެކްސިން ޖަހާފައެވެ. އެއީ މާލެ ސަރަހައްދުން ވެކްސިން ޖެހި 9 މީހަކާއި، ރަށްރަށުން ވެކްސިން ޖެހި 7 މީހެކެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 396،162ށް އަރާފައެވެ.
ރާއްޖޭގައި ވެކްސިން ދެމުން އަންނީ ވަކި ގައުމެއްގެ މީހަކަށް ބެލުމެއް ނެތިއެވެ. އަދި ވެކްސިނޭޝަން ޕްރޮގްރާމުގެ ތެރެއިން ރާއްޖޭގައި މަސައްކަތް ކުރާ ބިދޭސީންނަށް ވެކްސިން ޖަހަމުން އަންނަ އިރު، މިހާތަނަށް 79،000ށް ވުރެ ގިނަ ބިދޭސީން ވަނީ ވެކްސިންގެ ދެވަނަ ޑޯޒް ފުރިހަމަކޮށްފައެވެ.
