މިނިވަން އެއްވެސް މުއައްސަސާއަކަށް ސަރުކާރުގެ އެއްވެސް ނުފޫޒެއް ނޯންނާނެކަމުގެ ޔަގީންކަން އަރުވަން: ރައީސް
ހައްގުތައް ލިބިދޭ މިންވަރާމެދު ސަރުކާރު ޒިންމާދާރު ކުރުމުގައި، އެޗްއާރުސީއެމްގެ ދައުރު މިހާރު އަންނަނީ ފުޅާވަމުން
ބައިނަލްއަޤްވާމީ އިންސާނީ ޙައްޤުތަކުގެ ދުވަހާއި، ހިއުމަން ރައިޓްސް ކޮމިޝަންގެ 18 ވަނަ އަހަރީ ދުވަސް ފާހަގަކުރުމަށް ބޭއްވެވި ރަސްމިއްޔާތުގެ ތެރެއިން ރައީސް ވާހަކަދައްކަވަނީ
ހިޔުމަން ރައިޓްސް ކޮމިޝަން އޮފް ދަ މޯލްޑިވްސް(އެޗްއާރުސީއެމް) އަށް 18 އަހަރު ފުރިގެންދާއިރު ފާއިތުވި ދުވަސްތަކުގައި ކޮމިޝަނަށް ކުރިމަތިވި ސިޔާސީ ފިއްތުންތަކުގެ ސަބަބުން ކޮމިޝަންގެ ހަގީގީ ޒިންމާ އަދާކުރެވިފައިވާކަމަށް ގަބޫލުނުކުރައްވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ބައިނަލްއަޤްވާމީ އިންސާނީ ޙައްޤުތަކުގެ ދުވަހާއި، ހިއުމަން ރައިޓްސް ކޮމިޝަންގެ 18 ވަނަ އަހަރީ ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ހުރިހާ ޙައްޤުތަކެއް ރައްޔިތުންނަށް ލިބިދިނުމަކީ، ސަރުކާރުގެ ޒިންމާއަކަށް ވާއިރު، އެ ޒިންމާ ސަރުކާރުން އަދާކުރާ މިންވަރު ބެލުމަށް އުފެއްދި ތަނަކީ ހިއުމަން ރައިޓްސް ކޮމިޝަންކަމަށެވެ. އަދި މިއަދު ސަރުކާރުގެ އެއްވެސް ނުފޫޒެއް އެޗްއާރުސީއެމް އާއި އެހެން މިނިވަން މުއައްސަސާއަކަށްވެސް ނޯންނާނެކަމުގެ ޔަގީންކަން އަރުވާކަމަށް ރައީސް ވިދާޅުވިއެވެ.
ސަރުކާރުގެ ފަރާތުން އެޗްއާރުސީއެމް އަށް ކަށަވަރުކޮށްދީފައިވާ މިނިވަންކަމުގެ ސަބަބުން، ރާއްޖޭގައި އިންސާނީ ޙައްޤުތައް ރައްކާތެރިކޮށް، ޙައްޤުތައް ލިބިދޭ މިންވަރާމެދު ސަރުކާރު ޒިންމާދާރު ކުރުމުގައި، އެޗްއާރުސީއެމްގެ ދައުރު މިހާރު އަންނަނީ ފުޅާވަމުން ކަމަށް ރައީސް ވިދާޅުވިއެވެ.
ރައީސް ވިދާޅުވީ އިންސާނީ ޙައްޤުތަކުގެ ދުވަހެއް ފާހަގަކުރުމުގެ ބޭނުމަކީ، އިންސާނީ ޙައްޤުތަކާމެދު ރައްޔިތުން ހޭލުންތެރިކުރުވުން އެކަނި ނޫންކަމަށެވެ. އެންމެ ބޮޑު ބޭނުމަކީ، ޤާނޫނުއަސާސީންނާއި، ބައިނަލްއަޤްވާމީ މުޢާހަދާތަކުން ކަށަވަރުކޮށްދީފައިވާ އަސާސީ ޙައްޤުތައް، އެންމެ ފުރިހަމައަށް ރައްޔިތުންނަށް ލިބިދިނުމުގައި، ދައުލަތުގެ މުއައްސަސާތަކުން އަދާކުރަންޖެހޭ ދައުރު އަދާކުރުމަށް ބާރުއެޅުން ކަމަށް ރައީސް ވިދާޅުވިއެވެ.
ޤާނޫނުއަސާސީގައި، ދައުލަތުގެ ބާރުތަކަށްވުރެވެސް ކުރިން ޖާގަ ހޯދާފައިވަނީ އަސާސީ ޙައްޤުތައް ކަމަށާއި އެ ޙައްޤުތަކަކީ، އެންމެ ތަހުޒީބީ މުޖުތަމަޢުތަކުގައިވެސް ކަށަވަރުކޮށްދީފައިވާ މިނިވަންކަމާއި ޙައްޤުތައް ކަމަށް ރައީސް ވިދާޅުވިއެވެ. އެ ޙައްޤުތައް ހޯދުމަށްޓަކައި، އެތައް އަހަރެއް ވަންދެން ރައްޔިތުން ވަރަށް ގިނަ ތަކުލީފުތަކެއް އުފުލި ކަމަށް ރައީސް ވިދާޅުވިއެވެ.
ދިރިހުރުމުގެ ޙައްޤާއި، ރަނގަޅު ކާނާއާއި، ސާފު ބޯފެން ލިބުމާއި، ރައްކާތެރި ނަރުދަމާ ނިޒާމެއް އޮތުމާއި، ރަނގަޅު ޞިއްޙީ ޚިދުމަތް ލިބިދިނުންފަދަ، ފަރުދުންގެ ޒާތީ ކިތަންމެ ޙައްޤުތަކެއް، ޤާނޫނުއަސާސީން ކަށަވަރުކޮށްދޭ ކަމަށާއި މުޅި މުޖުތަމަޢުގެ މަޞްލަޙަތާ ގުޅިފައިވާ ޙައްޤުތަކެއްވެސް ބަޔާންކޮށްފައި އެބަހުރި ކަމަށް ރައީސް ވިދާޅުވިއެވެ. ހަމައެފަދައިން، ޤައުމަކަށް ވީތީ ޤައުމީ މަޞްލަޙަތާ ގުޅިފައިވާ ޙައްޤުތަކެއްވެސް އެބަހުރި ކަމަށް ރައީސް ވިދާޅުވިއެވެ.
މީގެއިތުރުން މިހާރު މިއޮތީ ވަރަށް ތަޢުލީމީ ޒުވާން ޖީލެއް ކަމަށް ރައީސް ވިދާޅުވިއެވެ.
ރައީސް ވިދާޅުވީ އިންސާނީ ޙައްޤުތައް ފެށިގެން އަންނަނީ، ދިރިހުރުމުގެ ޙައްޤާ ހަމައިން ކަމަށެވެ. ދިރިހުރުމުގެ ޙައްޤު ފުރިހަމަވަނީ، އަސާސީ އެތައް ޙައްޤުތަކެއް ގެތި ލާމެހިގެން ކަމަށްވާއިރު އެކަށީގެންވާ ބޯހިޔާވަހިކަމެއް ލިބުމަކީ، އެންމެ މުހިންމު އެއް ޙައްޤު ކަމަށް ރައީސް ވިދާޅުވިއެވެ. މި ޙައްޤު ލިބިދިނުމަށްޓަކައި ގިނަ މަޝްރޫޢުތަކެއް މިހާރުވެސް ހިނގަމުންދާ ކަމަށާއި އިތުރު މަޝްރޫޢުތައް ފެށުމަށް މި އަންނަނީ ތައްޔާރުވަމުން ކަމަށް ރައީސް ވިދާޅުވިއެވެ.
އަދި ފަށައިގެން ކުރިއަށް މިގެންދާ، ތަރައްޤީގެ ކޮންމެ މަޝްރޫޢަކީ، އަސާސީ ޙައްޤުތަކާ ގުޅިފައިވާ ޚިދުމަތްތައް، ރައްޔިތުންގެ މެދުގައި ތަފާތުނުކޮށް، ހަމަހަމަގޮތެއްގައި ލިބިދިނުމަށް ހިންގާ މަޝްރޫޢުތަކެއް ކަމަށް ރައީސް ވިދާޅުވިއެވެ. އެތައް އަހަރެއް ވަންދެން، ރައްޔިތުން އާދޭސް ކުރަމުން ދިޔައިރުވެސް، އަސާސީ ޚިދުމަތްތައް ލިބިދޭންޖެހޭ ކަމަށް ސަރުކާރަށް ޤަބޫލުނުކުރެވުނު ކިތަންމެ ރަށެއްގައި، އެ ޚިދުމަތްތައް ޤާއިމުކުރަމުން އަންނަކަމަށް ރައީސް ވިދާޅުވިއެވެ.
