"ޕެޓް ރިވަރސް ލޮޖިސްޓިކްސް ޕްރޮޖެކްޓް''ގައި ދެ ރިސޯޓަކުން ބައިވެރިވެއްޖެއެވެ.

ޕެޓް ރިވަރސް ލޮޖިސްޓިކްސް ޕްރޮޖެކްޓަކީ މޯލްޑިވްސް އޯޝަން ޕްލާސްޓިކް އެލަޔަންސް (މޯޕާ)ގެ އިސްނެމުގެ ދަށުން ސިންގަލް ޔޫސް ޕްލާސްޓިކް ރީސައިކަލް ކުރަން ދުވަހުން ދުވަހަށް ފޮނުވުމާގުޅޭ މަޝްރޫއެކެވެ. މި މަޝްރޫއު ފުރަތަމަ ފަށާފައިވަނީ މާލެ ސިޓީގައެވެ. ނަމަވެސް މިހާރު އަތޮޅުތެރޭގެ ބައެއް ރަށްރަށުގައި މިމަޝްރޫއުގެ މަސައްކަތްތައް ކުރިއަށް ގެންދިޔައެވެ.

މި މަޝްރޫއުގެ ދަށުން އެއްކުރާ ޕެޓް ފުޅިތައް ޕާލޭ މޯލްޑިވްސްއާ ހަވާލުކޮށްގެން ރީސައިކަލްކޮށް، އެޑިޑާސް ބްރޭންޑުގެ ބޫޓު ފަދަ އާންމު ދިރިއުޅުމުގައި ބޭނުންކުރާ ތަފާތު ތަކެއްޗަށް ބަދަލުކުރެއެވެ. ކަމާ ގުޅުންހުރި އެކި ފަރާތްތަކުން އެކައްޗެއް ކިޔައިގެން ހިންގޭ މި ހަރަކާތަކީ، ދެމެހެއްޓެނިވި ވިޔަފާރިއެއް ބިނާކުރުމުގެ އިތުރުން، ރައްޔިތުންގެ ދިރިއުޅުމާއި، މުޖުތަމައު އަދި ދުނިޔެއަށް ބަދަލުތަކެއް ގެނެސްދިނުމަށް ގިނަ ކުންފުނިތަކާއި ރީޓެއިލަރުން އެއްތަންވެ، އެއް ވިސްނުމެއްގައި މަސައްކަތް ކުރުމުގެ ފުރުސަތު ތަނަވަސްކޮށްދޭނެ ހަރަކާތެކެވެ.

މި ޕްރޮޖެކްޓަށް އެއް އަހަރު ފުރުމާއި ގުޅިގެން އާދިއްތަ ދުވަހު މާގިރި ހޮޓެލްގައި ބޭއްވި ޚާއްސަ ހަފްލާއެއްގައި ދެ ރިސޯޓަކާއެކު މަސައްކަތް ކުރުމަށް އެއްބަސްވުމުގައި ސޮއިކޮށްފައިވެއެވެ. އެއީ އަދާރަން ރިސޯޓާއި ހެރިޓަންސް އާރަށެވެ.

މިހަފްލާގައި ވާހަކަދައްކަވަމުން މޯޕާގެ ރައީސް، އަދި ކުރީގެ އެންވަޔަރަމަންޓް މިނިސްޓަރު ތޯރިގް އިބްރާހިމް ވިދާޅުވީ، މިމަޝްރޫއަށް ވަރަށް ބޮޑެތި ކުރިއެރުންތަކެއް ލިބިފައިވާ ކަމަށާއި، ދެ ރިސޯޓަކުން ބައިވެރިވެފައިވާއިރު، ކުރިއަށް އޮތްތަނުގައި އިތުރު ރިސޯޓުތަކުން ވެސް މި މިމަޝްރޫއާ ގުޅޭނެ ކަމަށެވެ. އަދި ކުރިއަށް އޮތްތަނުގައި އައްޑޫ ސިޓީގައި ވެސް މި މަސައްކަތްތައް ފެށިގެންދާނެ ކަމަށެވެ. މަޝްރޫއަށް ލިބިފައިވާ ކުރިއެރުންތަކަށް އަލިއަޅުއްވާލައްވައި ތޯރިގް ވިދާޅުވީ، މި ޕްރޮގްރާމްގައި އެންމެ ފުރަތަމަ ބައިވެރިވެފައިވަނީ ގާތްގަނޑަކަށް 120 ކެފޭ/ރެސްޓޯރަންޓް ކަމަށެވެ. ނަމަވެސް މިހާރު 260ށްވުރެ ގިނަ ކެފޭ/ރެސްޓޯރަންޓްތަކުން ބައިވެރިވެފައިވާ ކަމަށާއި، އަހަރެއްގެ ތެރޭގައި 30،000 ކިލޯއަށްވުރެ ގިނަ ޕެޓް ފުޅި އެއްކުރެވިފައިވާ ކަމަށް ތޯރިގް ވިދާޅުވިއެވެ. އަދި ދުވަހެއް ދުވަހަކަށް ދަނީ މަސައްކަތްފުޅާ ވަމުންކަން ތޯރިގް ފާހަގަކުރެއްވިއެވެ.

މީގެ އިތުރުން ތޯރިގް ވިދާޅުވީ މި މަޝްރޫއުގެ ހިއްސާދާރުން ކަމަށްވާ، ހެޕީ މާކެޓް، މޯލްޑިވްސް އެއިރޭޓަޑް ވޯޓާ ކޮމްޕެނީ އަދި އައިލެންޑް ބެވަރޭޖަސް މޯލްޑިވްސްގެ ފަރާތުން ވަރަށް ބޮޑު އެއްބާރުލުމެއް ލިބޭ ކަމަށާއި، އެކުންފުނިތަކުގެ ވަސީލަތްތައް ލިބުމަކީ މިމަޝްރޫއު ކާމިޔާބުކަމާއެކު ކުރިއަށް ގެންދެވޭ މައިގަނޑު އެއްސަބަބު ކަމަށެވެ.

މި ޕްރޮޖެކްޓްގެ ދަށުން ރެސްޓޯރަންޓްތަކާ/ކެފޭތަކުން ފެންފުޅިއާއި ޕްލާސްޓިކްގެ އެހެން ބާވަތްތަކުގެ ފުޅި، ބްރޭންޑުތަކަށް ބަލައި ވަކިކުރާނެ އެވެ. ދެން އެތަކެތި އެ ވިޔަފާރިތަކަށް ސަޕްލައިކުރާ ކުންފުނިތަކުން އަލުން ނެގުމަށް ފަހު، ޕާލޭ މޯލްޑިވްސްއާ ހަވާލުކުރާނީއެވެ. ޕާލޭއިން އެ ޕްލާސްޓިކް ފުޅިތައް ފޮނުވާނީ، އެ ޖަމިއްޔާއާއެކު މަސައްކަތްކުރަމުން އަންނަ ގައުމުތަކަށެވެ.