އިންޑަސްޓްރިއަލް ވިލެޖުގައި ޕެޓްރޯލް ޝެޑް ހެދުމަށް ފަހު މާލެ ތެރޭގައި ހުރި ޕެޓްރޯލް ޝެޑްތައް ބަންދުކުރަން ފިއުލް ސަޕްލައިސް މޯލްޑިވްސް(އެފްއެސްއެމް) އިން ނިންމައިފި އެވެ.
އެފްއެސްއެމް އިން މާލޭގެ ތިން ސަރަހައްދެއްގައި ތިން ޝެޑް ހިންގަ އެވެ.
ޕެޓްރޯލް ޝެޑްތައް އިންޑަސްޓްރިއަލް ވިލެޖަށް ބަދަލުކުރުމުގެ މަސައްކަތް އެފްއެސްއެމްއިން ވަނީ އެމްޓީސީސީއާ ހަވާލު ކޮށްފައެވެ. ޕެޓްރޯލް ޝެޑްތައް އިންޑަސްޓްރިއަލް ވިލެޖަށް ބަދަލު ކުރުމަށް ހިންގާ މަޝްރޫއަކީ ގާތްގަނޑަކަށް 50 މިލިއަން ރުފިޔާގެ މަޝްރޫއެކެވެ.
އެ މަޝްރޫއުގެ ދަށުން އިންޑަސްޓްރިއަލް ވިލެޖުގައި ހަ މަސް ދުވަހުގެ ތެރޭގައި އާ ޝެޑް ހަދާނެ އެވެ. އެއިރުން، އެތަން ފަރުމާކުރަނީ އެއްފަހަރާ 20 އުޅަނދަށް ތެޔޮ އެޅޭ ގޮތަށެވެ.
އެފްއެސްއެމް އިން ނިންމާފައިވަނީ، ޕެޓްރޯލް ޝެޑްތައް އިންޑަސްޓްރިއަލް ވިލެޖަށް ބަދަލުކުރުމަށް ފަހު، އެތަނުން އެއްގަމު އުޅަނދުތަކާއި ކަނޑު އުޅަނދުތަކަށް ވެސް ޚިދުމަތް ދިނުމަށެވެ. އިންޑަސްޓްރިއަލް ވިލެޖުގައި ޝެޑް ހުޅުވުމަށް ފަހު އެފްއެސްއެމްގެ ތެޔޮ ބައުޒަރުތައް މާލެ ތެރޭގައި ނުދުއްވާނެ ކަމަށް އެ ކުންފުނިން މައުލޫމާތުދެ އެވެ.
އެފްއެސްއެމްއަކީ އެސްޓީއޯގެ ސަބްސިޑަރީ ކުންފުންޏެކެވެ.