ގުރައިދޫ މަރުކަޒުގެ ހާލަތު ރަނގަޅުކުރުމަށް ބޭނުންވާ ވަސީލަތްތައް ނުލިބި ވަނީ ބަޖެޓުގެ ތާށިކަމުގެ ސަބަބުން ކަމަށް ޖެންޑަރ މިނިސްޓްރީން ބުނެފިއެވެ.
އދ. ގެ ވޯރކިން ގްރޫޕް އޮން އާބިޓްރަރީ ޑިޓެންޝަނުން ރާއްޖޭގެ ދައުވަތަކަށް ރާއްޖެ އައިސް، 10 ދުވަހުގެ ތަހުގީގަކަށްފަހު ނެރުނު ރިޕޯޓުގައި ވަނީ ގުރައިދޫ މަރުކަޒުގެ ހާލަތު ވަރަށް ދަށްކަމަށް ބުނެފައެވެ. އެތަނުގައި ތިބޭ މީހުންނަށް އެކަށީގެންވާ ވަސީލަތްތައް ނެތް ކަމަށެވެ. އެތަނުގައި އެކަށީގެންވާ އަދަދަކަށް މުވައްޒަފުންވެސް ނެތްއިރު، ބޭނުންވާ ސައިކޯ ސޯޝަލް ސަޕޯޓްވެސް ފޯރުކޮށް ނުދެވޭ ކަމަށެވެ.
މިކަމާއި ގުޅިގެން ރާއްޖެޓީވީން ކުރި ސުވާލަކަށް ޖަވާބުދެއްވަމުން ޖެންޑަރ މިނިސްޓްރީން ބުނީ މަރުކަޒުގެ ހާލަތު ރަނގަޅުކުރުމަށް ބޭނުންވާ ވަސީލަތްތައް ނުލިބި ވަނީ ބަޖެޓުގައި ހުރި ތާށިކަމުގެ ސަބަބުން ކަމަށެވެ. ގުރައިދޫ މަރުކަޒަށް އަހަރަކު ލިބެނީ 33،191،134 ރުފިޔާގެ ބަޖެޓެއް ކަމަށް މިނިސްޓްރީން ބުނެފައިވެއެވެ.
އދ. ގެ ވޯރކިން ގްރޫޕް އޮން އާބިޓްރަރީ ޑިޓެންޝަނުން ބުނެފައިވަނީ އެތަނުން ދޫކޮށްލާފައި ތިބި 20 މީހަކު އެތަނުގައި މިހާރުވެސް އެބަތިބި ކަމަށެވެ. އަދި ކުޑަ 2 ކުދިންވެސް ބޮޑެތި މީހުންނާއެކު އެތަނުގައި ގެންގުޅެމުންދާ ކަމަށާއި، އެކުދިން ވަކިން ގެންގުޅޭނެ ތަނެއް ނެތް ކަމަށެވެ. މިކަމާއި ގުޅިގެން ޖެންޑަރ މިނިސްޓްރީން ބުނީ މި ކުދިން ވަކިން ބޭތިއްބުމަށްޓަކައި 2 ވޯޑްގެ މަރާމާތުގެ މަސައްކަތްދަނީ ކުރިއަށް ކަމަށެވެ. ޖެނުއަރީ މަހުގެ ނިޔަލަށް މަސައްކަތް ނިންމާލެވޭނެ ކަމަށް މިނިސްޓްރީން ބުނެފައިވެއެވެ.
އުމުރުން ދުވަސްވީ މީހުންނަށް ޚިދުމަތްދޭނެ ވަކި ތަނެއް ނެތުމުން ގުރައިދޫ މަރުކަޒުން ދޫކޮށްލާ މީހުންވެސް ދާނެ ވަކި ތަނެއް ނެތްކަން އެ ގްރޫޕުން ފާހަގަކުރިއެވެ. މިކަމާއި ގުޅިގެން މިނިސްޓްރީން ބުނީ ދާނެ ވަކި ތަނެއް ނެތް މީހުންގެ ތެރެއިން މިނިސްޓްރީގެ ބެލުމުގެ ދަށުން އެޗްޕީއެސްއެންގައި މިވަގުތު 23 މީހުން އެބަތިބިކަމަށެވެ. މިފަދަ މީހުން ބޭތިއްބުމަށް ވިލިމާލޭގައި ހުންނަ ހިޔާ އަލުން މަރާމާތުކުރަން މަސައްކަތް ކުރަމުންދާ ކަމަށް މިނިސްޓްރީން ބުނެފައިވެއެވެ.
މީގެ އިތުރުން މެންޓަލީ ސްޓޭބަލް މީހުންނާއި އަންސްޓޭބަލް މީހުންވެސް އެއް ތަނަކު ބައިތިއްބާކަން ފާހަގަކޮށްފައިވާއިރު، މިނިސްޓްރީން ބުނީ އެމީހުން ވަކިކުރުމަށް ވޯޑް ނަމްބަރު 5 ހުސްކޮށް އެތަނުގެ މަރާމާތު ނިމިފައިވާކަމަށެވެ. އެތަނަށް ފަރުނީޗަރު ހޯދުމަށް ބިޑަށް ހުޅުވާލާފައިވާކަމަށް މިނިސްޓްރީން ބުނެފައިވެއެވެ. 5 ނަމްބަރު ވޯޑު މަރާމާތުކޮށްފައި ވަނީ ސްޓެލްކޯގެ ސީއެސްއާރްގެ ދަށުން ކަމަށް މިނިސްޓްރީން ވަނީ ބުނެފައެވެ.
މީގެ އިތުރުން އެތަނުގެ ވަސީލަތް އިތުރުކޮށް މީހުން ތަމްރީނުކުރުމުގެ މަސައްކަތުގެ ތެރެއިން ކްލިނިކަލް ޚިދުމަތް ދިނުމަށްޓަކައި ޖަޕާން ސަރުކާރުގެ ހިލޭ އެހީގެ ދަށުން މިހާރު ޚިދުމަތް ދިނުމަށްޓަކައި ދަނީ މަސައްކަތްތައް ކުރަމުން ކަމަށް ޖެންޑަރ މިނިސްޓްރީން ބުނެފައިވެއެވެ. މިވަގުތު ކްލިނިކަލް އިކުއިޕްމަންޓް ހޯދުމުގެ މަސައްކަތް ކުރަމުން ދާކަމަށް ވެސް ބުނެފައިވެއެވެ.
މިނިސްޓްރީން ބުނީ އެންމެ ބޮޑު ޖޮންޖެހުމެއް އޮތީ އިންސާނީ ވަސީލަތް ތަރައްގީ ކުރުމުގައި ކަމަށެވެ. އެހެންކަމުން މުވައްޒަފުން ތަމްރީން ކުރުމަށް އޭޖް ކެއަރ މޯލްޑިވްސްއާއި އެކި އެކި އެންޖީއޯތަކުން ވަނީ ތަފާތު ޕްރޮގްރާމްތައް ހިންގާފައި ކަމަށް މިނިސްޓްރީން ބުނެފައިވެއެވެ.
މީގެ އިތުރުން ޕޮލިޓެކްނިކާއި އެކު މިނިސްޓްރީގެ އެލްޑާރލީ ޑިވިޝަނުން ގެންދަނީ ކެއަރ ޑިވެލޮޕްމަންޓް ޕްރޮގްރާމް، ސެޓްފިކްޓް ލެވެލް 3 ގެ ކޯހެއް އަންނަ އަހަރުގެ ޖެނުއަރީ މަހު ފެށުމަށް ތައްޔާރުވަމުން ކަމަށެވެ. މިއީ ޑަބްލިއުއެޗްއޯ ގެ އެހީގެ ދަށުން 6 މަސްދުވަހުގެ މުއްދަތަށް ކުރިއަށްގެންދާނެ ޕްރޮގްރާމެއް ކަމަށާއި، މިޕްރޮގްރާމްގައި ފުރަތަމަ ޓްރެއިން ކުރާނީ އެޗްޕީއެސްއެންގެ މުވައްޒަފުން ކަމަށް މިނިސްޓްރީން ބުނެފައިވެއެވެ. އެއަށްފަހު އާންމު ފަރާތްތަކުންވެސް މިޕްރޮގްރާމްގައި ބައިވެރިވުމަށް ފުރުސަތު ހުޅުވާލާނެ ކަމަށް ބުނެފައިވެއެވެ.
ގުރައިދޫ މަރުކަޒަށް ބޭނުންވާ ވަސީލަތްތައް ނެތް ކަމަށާއި، އެކަށީގެންވާ ބަޖެޓްވެސް އެތަނަށް ނުލިބޭ ކަމަށް އދ. ގެ ވޯރކިން ގްރޫޕް އޮން އާބިޓްރަރީ ޑިޓެންޝަނުންވެސް ފާހަގަކޮށްފައިވެއެވެ. ގުރައިދޫ މަރުކަޒަށް އެހާ ބޮޑަށް ސަރުކާރުތަކުން އަޅާލެވިފައި ނެތްކަމަށާއި، އެކަށީގެންވާ ވަސީލަތާ މީހުން ތަމްރީނު ކުރުމަށް އެ ގްރޫޕުން އެދިފައިވެއެވެ.
