ކޮވިޑް-19 ބަލީގައި އިތުރު މީހަކު ނިޔާވެފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން ބުނީ ނިޔާވެފައިވަނީ އައްޑޫ ކޮވިޑް މެނޭޖްމެންޓް ފެސިލިޓީގައި ފަރުވާ ދެމުންދިޔަ 83 އަހަރުގެ ދިވެހި ފިރިހެނެއް ކަމަށެވެ. އެމީހާ ނިޔާވެފައިވަނީ ހޮނިހިރު ދުވަހުގެ މެންދުރުފަހު 3:00ގައި ކަމަށް އެޗްޕީއޭއިން ބުނެފައިވެއެވެ.

މިއާއެކު ކޮވިޑް ބަލީގައި ރާއްޖެއިން ނިޔާވި މީހުންގެ ޖުމްލަ ވަނީ 257އަށް އަރާފައެވެ.

ހޮނިހިރު ދުވަހު އިތުރު މީހަކު ނިޔާވެފައިވާއިރު، ހުކުރު ދުވަހު ވެސް ހުޅުމާލެ މެޑިކަލް ފެސިލިޓީގައި އެޑްމިޓުކޮށްގެން ފަރުވާދެމުންދިޔަ އުމުރުން 82 އަހަރުގެ ދިވެހި ފިރިހެނެއް ނިޔާވެފައިވެއެވެ. އެމީހާ ނިޔާވެފައިވަނީ ހުކުރު ދުވަހުގެ މެންދުރު 02:23ގައި ކަމަށް އެޗްޕީއޭއިން ބުނެއެވެ.

މިއާއެކު ކޮވިޑް ބަލީގައި ރާއްޖެއިން ނިޔާވި މީހުންގެ ޖުމްލަ ވަނީ 256އަށް އަރާފައެވެ.

ރާއްޖޭގެ ކޮވިޑް-19ގެ ހާލަތަށް ބަލާއިރު، ބުރާސްފަތި ދުވަހުގެ އިރުއޮއްސި 6:00ން ހުކުރު ދުވަހުގެ އިރުއޮއްސި 6:00ށް 4،366 ސާމްޕަލް ނަގާފައިވާ ކަމަށެވެ. އަދި އޭގެ ތެރެއިން 92 މީހުން ޕޮޒިޓިވްވެފައިވާ ކަމަށެވެ. އެއީ މާލެ ސަރަހައްދުން 20 މީހުންނާއި، އަތޮޅުތެރޭގެ ރަށްރަށުން 63 މީހުންނާއި އަދި ހިންގަމުންދާ ރިސޯޓުތަކުން ނުވަ މީހުންނެވެ.

އެޗްޕީއޭއިން ބުނީ 1،801 އެކްޓިވް ކޭސް ހިމެނޭ ކަމަށާއި، 16 މީހަކަށް އެޑްމިޓް ކޮށްގެން ފަރުވާ ދެމުންދާ ކަމަށެވެ. މިހާތަނަށް 92،846 މީހުން ޕޮޒިޓިވް ވެފައިވާއިރު، 90،776 މީހުން މި ބަލިން ރަނގަޅުވެފައިވެއެވެ.