ވެކްސިން ފުރިހަމަ ކުރި މީހުންގެ ޖުމްލަ އަދަދު 365،332ށް!
11 ޑިސެމްބަރު 2021 | ހޮނިހިރު 02:27ބޫސްޓަރ ޑޯޒު ޖެހި ޖުމްލަ އަދަދު 18،947ށް އަރާފައިވޭ
ކޮވިޑުން ރައްކާތެރިވުމަށް ޖަހާ ވެކްސިން
ރާއްޖޭގައި ވެކްސިން ފުރިހަމަ ކުރި މީހުންގެ ޖުމްލަ އަދަދު 365،332ށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ ބުރާސްފަތި ދުވަހު 40 މީހުން ފުރަތަމަ ޑޯޒު ޖަހާފައިވާ ކަމަށެވެ. އެއީ މާލެ ސަރަހައްދުން 30 މީހުންނާއި، އަތޮޅުތެރޭގެ ރަށްރަށުން 10 މީހުންނެވެ. އެއާއެކު ވެކްސިންގެ ފުރަތަމަ ޑޯޒު ޖެހި ޖުމްލަ އަދަދު ވަނީ 396،146ށް އަރާފައެވެ. އަދި 155 މީހުން ވެކްސިންގެ ދެވަނަ ޑޯޒު ޖަހާފައި ވާއިރު، އޭގެ ތެރޭގައި ހިމެނެނީ މާލެ ސަރަހައްދުން 122 މީހުންނާއި، އަތޮޅުތެރޭގެ ރަށްރަށުން 33 މީހުން ކަމަށް އެޗްޕީއޭއިން ބުނެއެވެ. އެއާއެކު ވެކްސިންގެ ދެވަނަ ޑޯޒު ޖެހި ޖުމްލަ އަދަދު ވަނީ 365،332ށް އަރާފައެވެ.
މީގެ އިތުރުން އެޗްޕީއޭއިން ބުނީ 823 މީހުން ވެކްސިންގެ ބޫސްޓަރ ޑޯޒު ޖަހާފައިވާ ކަމަށެވެ. އެއީ މާލެ ސަރަހައްދުން 378 މީހުންނާއި، އަތޮޅުތެރޭގެ ރަށްރަށުން 445 މީހުންނެވެ. ބޫސްޓަރ ޑޯޒު ޖެހި ޖުމްލަ އަދަދު މިހާރުވަނީ 18،947ށް އަރާފައެވެ.
ރާއްޖޭގައި ވެކްސިން ފުރިހަމަ ކުރި ޖުމްލަ އަދަދު 365،332ށް އަރާފައިވާއިރު، 90 އިންސައްތަ ސްކޫލު ދަރިވަރުން ވެކްސިންގެ ދެ ޑޯޒް ފުރިހަމަކޮށްފައިވާ ކަމަށް އެޑިއުކޭޝަން މިނިސްޓްރީން ބުނެފައިވެއެވެ.
ކޮވިޑް-19 ކޮންޓްރޯލް ކުރުމަށް ޚާއްސަ އިސްކަމެއްދީގެން ވެކްސިނޭޝަން ޕްރޮގްރާމް ކުރިއަށް ގެންދާއިރު، ވީހާވެސް އަވަހަށް ވެކްސިން ފުރިހަމަ ކުރުމަށް ކަމާބެހޭ ފަރާތްތަކުން ދަނީ އިލްތިމާސް ކުރަމުންނެވެ. ވެކްސިން ފުރިހަމަ ކޮށްފައިވާނަމަ، ބައްޔަށް ޕޮޒިޓިވްވި ނަމަވެސް ހާލަތު ސީރިއަސް ނުވާ ކަމަށް ޑޮކްޓަރުން ވިދާޅުވެއެވެ.
