ހުޅުމާލޭ ބިމުގެ ރަޖިސްޓްރީ ބާތިލު ކުރުމުން އެޗްޑީސީއަށް ބޮޑު ގެއްލުމެއް
ހުޅުމާލޭގެ ރެޖިސްޓްރީ އެޗްޑީސީގެ ނަމުގައި ބޭއްވުމަކީ މި ލޯނުތައް ނެގިއިރު ލާޒިމުކޮށްފައިވާ ކަމެއް
އެޗްޑީސީ މެނޭޖިންގ ޑިރެކްޓަރ
ސަރުކާރުގެ ވިޔަފާރި ކުންފުނި، ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ބެލުމުގެ ދަށުގައިވާ ހުޅުމާލޭގެ ރެޖިސްޓްރީ މާލެ ސިޓީ ކައުންސިލުން ބާތިލު ކުރުމުގެ ގެއްލުން، ވަރަށް ބޮޑު ކަމަށް އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވެއްޖެއެވެ.
މާލެ ސިޓީ ކައުންސިލާ އެޗްޑީސީއާ ދެމެދު އުފެދުނު ދެބަސްވުންތަކެއްގެ ތެރޭގައި އެޗްޑީސީއާއެކު ހަދާފައިވާ ހުޅުމާލޭ ބިމުގެ ރެޖިސްޓްރީ ބާތިލުކުރުމާ ގުޅޭ ގޮތުން ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަ ދައްކަމުން ސުހައިލް ވިދާޅުވީ މިކަމުގެ ސަބަބުން އެޗްޑީސީއާ ދައުލަތަށް ވަރަށް ބޮޑު ގެއްލުމެއް ލިބިގެންދާނެ ކަމަށެވެ.
ސުހައިލް ވިދާޅުވީ ރައީސް ޔާމީނުގެ ސަރުކާރުގައި އެޗްޑީސީގެ ނަމުގައި ގާތްގަނޑަކަށް ބިލިއަނެއްހާ ޑޮލަރުގެ ލޯނު ނަގާފައިވާ ކަމަށެވެ. މި ހުރިހާ ލޯނަކީ ސަރުކާރުން ސޮވެރިން ގެރެންޓީ ދީފައި ހުންނަ ލޯނުތައް ކަމަށް ވާއިރު، ކޮންމެ އަހަރެއް ނިމުމުގެ ކުރިން މި ލޯނުތަކުގެ ވަކި މިންވަރެއް އަނބުރާ ދައްކަން ޖެހޭނެއެވެ. މީގެ އިތުރުން، ހުޅުމާލޭގެ ރެޖިސްޓްރީ އެޗްޑީސީގެ ނަމުގައި ބޭއްވުމަކީ މި ލޯނުތައް ނެގިއިރު ލާޒިމުކޮށްފައިވާ ކަމެކެވެ.
ރާއްޖެއަށް މި ލޯނުތައް ލިބުމުގެ މައިގަނޑު ސަބަބަކީ އެޗްޑީސީގެ ނަމުގައި ހުޅުމާލޭގެ ރަޖިސްޓްރީ އޮތުމެވެ. ނަމަވެސް މި ރެޖިސްޓްރީ ބާތިލުކުރުމާއެކު ލޯނުތައް ޑިފޯލްޓު ވުމަކީ އެކަށީގެންވާ ކަމެއްކަން ސުހައިލް ފާހަގަކުރެއްވިއެވެ. އަދި އެއްބަސްވުންތައް ހެދިފައިވާ ގޮތުން މީގެ ސަބަބުން ސަރުކާރުގެ އެހެނިހެން ލޯނުތައްވެސް ޑިފޯލްޓަށް ދާގޮތަށް ހުރިކަމަށް ސުހައިލް ވިދާޅުވިއެވެ.
މާލެ ސިޓީ ކައުންސިލުން ނިންމާފައިވާ މި ނިންމުމަކީ ގާނޫނުތަކުން ޖާގަދޭ ކަމަކަށް ނުވާއިރު، މިކަން މިގޮތަށް ނިމިއްޖެނަމަ ދައުލަތަށް ވަރަށް ބޮޑު ގެއްލުމެއް ލިބިގެންދާނެ ކަމަށް ސުހައިލް ވިދާޅުވިއެވެ.
