މިއަހަރުގެ މަސްވެރިންގެ ދުވަސް ފާހަގަކުރުމުގެ ގޮތުން ކުޅުދުއްފުށީގެ މަސްވެރިންނަށް ޑިނަރ ނައިޓެއް ބާއްވަން ސިޓީ ކައުންސިލުން ނިންމައިފި އެވެ.

ސިޓީ ކައުންސިލްގައި ބުދަ ދުވަހު ބޭއްވި ބައްދަލުވުމުގައި ވާހަކަދައްކަވަމުން މޭޔަރު އާތިފް ވިދާޅުވީ، މަސްވެރިންގެ ދުވަސް ފާހަގަކުރުމަށް ކައުންސިލުން ތައްޔާރީތަކެއްވަމުން އަންނައިރު އެކަމަށް އަތޮޅު ކައުންސިލުންވެސް ބަޖެޓެއް ކަނޑައަޅައި ކޮންމެ ރަށަކަށް ދިހަހާސް ރުފިޔާ ދިނުމަށް ނިންމާފައިވާކަމަށެވެ. މި ޑިނާ ނައިޓް ބޭއްވުމަށް ނިންމާފައިވަނީ މިއަަހަރުގެ މަސްވެރިންގެ ދުވަހު އެވެ.

މިއަހަރު މަސްވެރިންގެ އަގު ވަޒަންކުރުމުގެ ގޮތުން ބާއްވާ ޑިނަރ ނައިޓްގައި މަސްވެރިންނަށް އުފާވެރި ޚަބަރެއް ހިއްސާކުރެވިގެންދާނެކަމަށް މޭޔަރު ވިދާޅުވި އެވެ. މި ބައްދަލުވުމުގައި މެމްބަރު ރިލްވާނު މުހައްމަދު ވިދާޅުވީ، މަސްވެރިން ކުރާ ބުރަ މަސައްކަތަކީ ހަމައެކަނި ޑިނަރ ނައިޓަކުން ވަޒަން ކުރެވޭނެ ކަމެއް ނޫން ކަމަށާއި އެއަށްވުރެ ގިނަ ކަންތައްތަކެއް މަސްވެރިންނަށް އެބަ ފަހިކޮށްދޭން ޖެހޭ ކަމަށެވެ. އެކަމަކު އަދި އެ ހުރިހާ ވަސީލަތްތަކެއް ގާއިމުކޮށް ފުރިހަމަ ކޮށްނުދެވުނުކަމުގައިވިޔަސް ކުރިއަށްއޮތްނުގައި މަސްވެރިންނަށްޓަކާ މިއަށްވުރެ ބޮޑެތި ކަންތައްތަކެއް ކުރަން ރާވާފައި އެބަހުރި ކަމަށާއި އެގޮތުން ކުރިއަށް އޮތްތަނުގައި އައިސް ޕްލާންޓެއްވެސް ގާއިމުކުރެވިދާނެކަމަށް އޭނާ ވިދާޅުވި އެވެ.

މިއަހަރުގެ މަސްވެރިންގެ ދުވަސް ފާހަކުރުމަށް ހދ އަތޮޅު ކައުންސިލްގެ ފަރާތުން އަތޮޅުގެ ކޮންމެ ރަށަކަށް 10000 ރުފިޔާގެ ބަޖެޓެއް ދިނުމަށް ނިންމާފައިވާއިރު، ރަށްރަށުގައި ތަފާތު ހަރަކާތްތަކެއް ރާވަމުން ދާކަމަށް ކައުންސިލް ތަކުން މައުލޫމާތު ދެއެވެ. އެގޮތުން ހދ. ނެއްލައިދޫ ، ކުމުންދޫ ، އަދި މަކުނުދޫގައި މަސްރޭހެއް ބާއްވާނެކަން މިހާރުވެސް ވަނީ އިއުލާނުކޮށްފައެވެ.

މިއަހަރުގެ މަސްވެރިންގެ ދުވަސް ކުލަގަދަކޮށް ސަރުކާރުން ފާހަގަ ކުރުމަށް ހަމަޖެހިފައިވަނީ ކ. ގާފަރުގައެވެ. ރާއްޖޭގައި މަސްވެރިންގެ ދުވަހުގެ ގޮތުގައި ފާހަގަ ކުރަނީ ޑިސެމްބަރ މަހުގެ 10 ވަނަ ދުވަހެވެ.