މަސްވެރިންގެ ދުވަސް ފާހަގަކުރުމުގެ ގޮތުން އިހަވަންދޫގައި ޚާއްސަ މަސްރޭހެއް ބާއްވަނީ
8 ޑިސެމްބަރު 2021 | ބުދަ 09:06މަސްވެރިންގެ ދުވަސް ރަސްމީކޮށް ފާހަގަ ކުރުމަށް ހަމަޖެހިފައިވަނީ ކ. ގާފަރުގައި
ހއ.އިހަވަންދޫ
އިހަވަންދޫ މަސްވެރިންގެ ގުޅުން (އިމަގު) ގެ ފަރާތުން ހއ. އިހަވަންދޫގައި މަސްވެރިންގެ ދުވަސް ކުލަގަދަގޮތެއްގައި ފާހަގަ ކުރުމުގެ ގޮތުން ޚާއްސަ މަސްރޭހެއް ބާއްވަން ނިންމައިފިއެވެ.
އިމަގުގެ ފަރާތުން 2021ވަނަ އަހަރުގެ މަސްވެރިންގެ ދުވަހަށް ޚާއްސަކޮށްގެން އެކި ޙަރަކާތްތައް ޑިސެމްބަރު މަހުގެ 10ން 18ށް ކުރިއަށް ގެންދަން ނިންމާފައިވާއިރު މަސްރޭސް ބޭއްވުމަށް ހަމަޖެހިފައިވަނީ ޑިސެމްބަރު 18 ވާ ހޮނިހިރު ދުވަހުއެވެ. މަސްރޭހުން އެއްވަނަ އަށްދާ ޓީމަކަށް 5000(ފަސްހާސް) ރުފިޔާ ދިނުމަށް ނިންމާފައިވާއިރު ދެވަނަ އަށްދާ ޓީމަކަށް 2000 (ދެހާސް) ރުފިޔާ ދިނުމަށް ހަމަޖެހިފައިވެއެވެ. މިހާރު ވަނީ މަސްރޭހުގައި ބައިވެރިވުމުގެ ފުރުސަތު ހުޅުވާލައިފައެވެ. ބައިވެރިވުމަށް އެދޭ ފޯރމް ފުރުމަށްފަހު 9886681އަކަށް ވައިބަރ ކުރުމަށް އިމަގުން އެދިފައިވެއެވެ. މަސްރޭހުގައި ބައިވެރިވުމުގެ ސުންގަނޑި އަކީ 16 ޑިސެމްބަރު ވާ ބުރާސްފަތި ދުވަހުގެ ރޭ 22:00 އެވެ.
މި މަސްރޭހާއެކު އިތުރު ހަރަކާތްތަކެއް ކުރިއަށް ގެންދިއުމަށް އިމަގުން ވަނީ ހަމަޖައްސާފައެވެ. އެއީ މަސްވެރިންނަށް ޚާއްސަ ފަރިވަޅު ތައްޔާރުކުރުމާއި، މަސްވެރި ކަނބަލުންގެ ރޯނު ވެށުން އަދި ފަންގިވިނުމުގެ މުބާރާތެއް ބޭއްވުމާއި ކަނބަލުންގެ ތަޖުރިބާ މަސްދަތުރެއް ބޭއްވުމުގެ އިތުރުން މަސްވެރިކަމުގެ ވަސީލަތްތަކުގެ ހަވީރެއް ބޭއްވުމެވެ.
ރާއްޖޭގައި މަސްވެރިންގެ ދުވަހުގެ ގޮތުގައި ކޮންމެ އަހަރަކުވެސް ފާހަގަ ކުރަމުން އަންނަނީ ޑިސެމްބަރ 10 ވަނަ ދުވަހުއެވެ. ސަރުކާރުން 2021 ވަނަ އަހަރުގެ މަސްވެރިންގެ ދުވަސް ރަސްމީކޮށް ފާހަގަ ކުރުމަށް ހަމަޖެހިފައިވަނީ ކ. ގާފަރުގައެވެ. އެގޮތުން 2021 ވަނަ އަހަރު ފާހަގަ ކުރާނީ 41ވަނަ މަސްވެރީންގެ ދުވަހެވެ.
