ނޫމަރާ ފަރަށް އެރި ބާޖުގެ ވެރިފަރާތް 61 މިލިއަން ރުފިޔާއިން ޖޫރިމަނާކޮށްފި
އެ ބާޖުގެ ދިވެހިރާއްޖޭގެ އެޖެންޓު، ރޮސޮފް ޕްރައިވެޓް ލިމިޓެޑަށް އެކަން ވަނީ އަންގާފައި
ނޫމަރާ ތޮށި މައްޗަށް އުރުުނު ބާޖު
ށ ނޫމަރާ ފަރަށް އެރި ބާޖުގެ ވެރިފަރާތް 61 މިލިއަން ރުފިޔާއިން ޖޫރިމަނާ ކޮށްފިއެވެ.
އެކަމާ ގުޅޭގޮތުން އީޕީއޭއިން ބުނީ، 6 އޮކްޓޫބަރު 2019 ގައި ށ. ނޫމަރާގެ ފަރަށް "މެރިން ޕަވަރ 2317" ނަމަކަށް ކިޔާ ބާޖު އެރުމާއި ގުޅިގެން އެ ފަރުގެ މާހައުލަށް ލިބުނު ގެއްލުންތަކަށް ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން ހެދިފައިވާ ޤަވާޢިދުގެ ދަށުން ފަސްދޮޅަސް އެއްމިލިއަން ހަލައްކަ އަށްޑިހަ އެއްހާސް ތިންސަތޭކަ ސޯޅަ ރުފިޔާއިން އެ ބާޖުގެ ވެރިފަރާތް ޖޫރިމަނާ ކޮށްފައިވާ ކަމަށެވެ.
އީޕީއޭއިން ވަނީ އެ އެޖެންސީއަށް 30 ދުވަހުގެ ތެރޭގައި ޖޫރިމަނާގެ ފައިސާ ދެއްކުމަށް އެ ބާޖުގެ ދިވެހިރާއްޖޭގެ އެޖެންޓު، ރޮސޮފް ޕްރައިވެޓް ލިމިޓެޑަށް 07 ޑިސެމްބަރު 2021 ގައި އަންގާފައެވެ.
އީޕީއޭއިން ބުނީ، ބާޖު ފުންކޮށް، އެ ބޯޓުގެ ބައިތައް އެ ސަރަޙައްދުން ނަގައި ނިމުމުން ތިމާވެށްޓަށް ލިބުނު ގެއްލުންތައް ބެލުމަށް އީޕީއޭއިން އެ ސަރަޙައްދު ބަލައި ސަރވޭ ކޮށްފައިވާ ކަމަށެވެ. އަދި 1632 އަކަމީޓަރުގެ އެ ސަރަޙައްދަކީ ސީދާ ގޮތެއްގައި ބާޖު ފަރަށް އެރުމުގެ ސަބަބުން ލިބިފައިވާ ގެއްލުމެއްގެ ގޮތުގައި ވަނީ ކަނޑައަޅާފައެވެ. އެ ބާޖު ފުންކޮށް، އެ ސަރަޙައްދަށް ފެތިފައި އޮތް ބޯޓުގެ ބައިތައް އެ ސަރަޙައްދުން ނަގައި އެ މަސައްކަތްކޮށް ނިމިފައިވަނީ 16 ނޮވެންބަރު 2021 ގައެވެ.
ދާދި ފަހުން ކ. ރަސްފަރީ ހުޅަނގު ފަރާތަށް އެރި ބޯޓުވެސް ވަނީ ޖޫރިމަނާކޮށްފައެވެ. އެ ބޯޓުންވެސް މިހާރު ވަނީ ޖޫރިމަނާ ދައްކާފައެވެ. އެގޮތުން ބޯޓު އެރި ފަރަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން، 1995އިން ފެށިގެން ހިމާޔަތްކޮށްފައިވާ ފަރެކެވެ.
