ރައްޔިތުންގެ މަޖިލީހުން ވަޒީރެއްގެ އިތުބާރު ނެތްކަމަށް ނަގާ ވޯޓެއްގައި އެކަން ފާސްވެއްޖެ ނަމަ އެ ވަޒީރަކު ވަކިވީ ކަމަށް ޤާނޫންއަސާސީގައި ލިޔުނީ ވަރަށް ބޮޑަށް ރައްޔިތުންގެ ޚާއްޞަ މަޖިލީހުގައި މަޝްވަރާ ކުރެވިފައި ކަމަށް ރައްޔިތުންގެ މަޖިލީހުގެ މަޖިލީހުގެ މާލޭގެ ކުރީގެ މެންބަރު އަދި ރައްޔިތުންގެ ޚާއްޞަ މަޖިލީހުގެ މެންބަރު މުހައްމަދު ޝިހާބް ވިދާޅުވެއްޖެއެވެ.
މިހާރު އަމަލް ކުރަމުންދާ ޤާނޫން އަސާސީ އެކުލަވާލިއިރު ރައްޔިތުންގެ ޚާއްޞަ މަޖިލީހުގައިވެސް އުޅުއްވި އަދި މަޝްހޫރު 17 އަހަރުން ހެދި ޤާނޫން އަސާސީ ހެދިއިރު އެމަޖިލީހުގައިވެސް އިންނެވި މުހައްމަދު ޝިހާބު މިހެން ވިދާޅުވީ ރާއްޖެ ޓީވީން އާދީއްތަ ދުވަހުގެ ރޭ ގެނެސްދިން ފަލަ ސުރުޚީ ޕްރޮގްރާމްގައި ވާހަކަ ދައްކަވަމުންނެވެ.
ޝިހާބް ވިދާޅުވީ ރައްޔިތުންގެ މަޖިލީހަަކީ ޤާނޫން ހެދުމުގެ ބާރު ޤާނޫން އަސާސީން ހަވާލުކޮށްފައިވާ ތަން ކަމަށާއި އަދި މިހާރު ހެދިފައިވާ ޤާނޫން އަސާސީގެ ދަށުން ޤާނޫން އަސާސީއަށްވެސް ބަދަލު ގެނެވޭނެ ތަނެއް ކަމުގައި ކަނޑައަޅާފައިވަނީ އެމަޖިލިސް ކަމަށެވެ.
ސުޕްރީމް ކޯޓުން ދާދިފަހުން ކުރި ހުކުމަށް އިޝާރާތް ކުރައްވާ ޝިހާބު ވިދާޅުވީ އެހުކުމާމެދު ވަރަށް ގިނަ ބަޔަކު ކަންބޮޑުވާ ކަމަށާއި މަޖީލީހުން ކުރެވޭނެ ކަންކަމަކީ ވަރަށް ސާފުކޮށް ލިޔެފައިވާ ކަންކަން ކަމަށެވެ. އެގޮތުން ވަޒީރެއްގެ އިތުބާރު ނެތްކަމުގެ ވޯޓެއް ނަގާނަމަ އެ މަޖިލިހަށް ހުށަހެޅި އެމަޖިލީހުން ފާސްވެއްޖެނަމަ އެވަޒީރަކު ވަކިވީކަމަށް ލިޔެފައިވާނޭ ކަމަށެވެ.
ޝިހާބް ވިދާޅުވީ އެގޮތައް ނިންމާފައި އެވަނީ އެހެން މަރުހަލާއަކަށް އެކަން ގޮސްފާނެތީ ކަމަށާއި އެހާހިސާބުން އެވަޒީރަކު ވަކިވީ ކަމަށެވެ.
"ވަރަށް ގިނަ އިސްލާހްތައްވެސް ހުށަހެޅުނު އެމާއްދާ ލިޔުނުއިރު. އެހެންނަމަވެސް މިހާރު އޮތްގޮތައް އެއޮތީ އެގޮތައް ފާސްވެގެން" ޝިހާބް ވިދާޅުވިއެވެ.
ޝިހާބް ވިދާޅުވީ އެމާއްދާ ލިޔުނުއިރު މާބޮޑު ޚިޔާލު ތަފާތުވުމެއްވެސް ނާންނަ ކަމަށާއި ޚިޔާލު ތަފާތުވެ ގޮތެއް ނިންމަން އުނދަގޫވި ކަންކަމުގައި އެނޫން ގޮތައް ޢަމަލް ކުރައްވާފައިވާނޭ ކަމަށެވެ. މިސާލެއްގެ ގޮތުގައި ރާއްޖޭގައި އޮންނަން ފެންނަ ނިޒާމެއްގެ ވާހަކަ ނަންގަވަމުން ޝިހާބް ވިދާޅުވީ އެމާއްދާ ލިޔުމުގެ ކުރިން ރައްޔިތުންގެ ވޯޓަކަށް ގޮސްފައިވާނޭ ކަމަށެވެ. އެހެންކަމުން ޤާނޫން އަސާސީން މަޖިލީހަށް ލިބިދީފައިވާ ބާރުތަކަކީވެސް ވަރަށް ބޮޑަށް ބެލުމަށްފަހު ދީފައިވާ ބާރުތަކެއްކަމަށް ޝިހާބް ވިދާޅުވިއެވެ.
