ރ ފުއްގިރި ހިޔާނާތުގެ މައްސަލައިގައި ދައުވާ އުފުލާފައިވާ ކުރީގެ ރައީސް އަބްދުﷲ ޔާމީނުގެ ޕާސްޕޯޓު ހިފެހެއްޓުމުގެ އަމުރެއް ނެރެދެވެން ނެތްކަމަށް ކްރިމިނަލް ކޯޓުން ނިންމައިފިއެވެ.
އެމްއެމްޕީއާރުސީން ރިސޯޓެއްގެ ގޮތުގައި ތަރައްގީކުރުމަށް ކުށްޔަށް ދޫކުރި ރ. ފުއްގިރީގެ މައްސަލައިގައި ރައީސް ޔާމީނުގެ މައްޗަށް އުފުލާފައިވަނީ މަނީ ލޯންޑަރިން ކުށުގެ ދައުވާއަކާއި ރިޝްވަތު ގަބޫލުކުރުމުގެ ކުށުގެ ދައުވާއެކެވެ.
ހޯމަ ދުވަހުގެއަޑުއެހުމަކީޔާމީނު ފުރުން މަނާ ކުރުމުގެ އަމުރަކަށް ދައުލަތުން އެދިފައިވުމާއި ގުޅިގެން ބާއްވާފައިވާ އަޑުއެހުމެކެވެ. މި އަޑުއެހުމުގައި ވާހަކަ ދައްކަވަމުން ދައުލަތުގެ ވަކީލާ ވިދާޅުވީ، މި މައްސަލައިގައި ޔާމީނުގެ މައްޗަށް ދައުވާ ކޮށްފައިވާ ކުށުގެ ބާވަތަށް ބަލާއިރު، ފުރުން މަނާ ކުރެވޭނެފަދަ ހާލަތެއް އޮތްކަމަށް ގަބޫލު ކުރައްވާ ކަމަށެވެ. އެގޮތުން ޔާމީނުގެ މައްޗަށް ތުހުމަތު ކުރެވޭ މިންވަރަށް ހެކި ލިބިފައިވާކަމަށް ދައުލަތުގެ ވަކީލާ ވިދާޅުވިއެވެ. ދައުވާ ފޯމާއެކު އެ ހެކިތައް ދައުލަތުން ވަނީ ހުށައަޅާފައެވެ.
ރާއްޖެ ދޫކޮށް ފުރައިގެން ދިއުމުގެ އިޙްތިމާލު އޮތްކަމަށް ބަޔާންކޮށް ދައުލަތުން ބުނީ، ފިލައިގެން ގޮސްދާނެކަން ނުވަތަ ނޫންކަން ފަނޑިޔާރު ވަޒަން ކުރެއްވުމަށް ކުށުގެ ބާވަތަށް ބެލޭއިރު، ކޮރަޕްޝަންގެ ކުށްތައްވެސް އޭގެ ތެރޭގައި ހިމެނޭ ކަމަށެވެ. އަދި އެމްއެމްޕީއާރްސީގެ މައްސަލައިގައި ކުށް ސާބިތުވެފައިވާ ކުރީގެ ނައިބްރައީސް އަހުމަދު އަދީބުވެސް ފިލައިގެން ދިއުމަށް މަސައްކަތް ކުރިކަން އޭގެ މިސާލެއްގެ ގޮތުން ދައުލަތުން ފާހަގަ ކުރިއެވެ.
އަދި ޔާމީނަކީ ފިލައިގެން ގޮސް އުޅުމުގެ މާލީ ތަނަވަސްކަން އޮތް މީހެއްކަން ބޭންކް ސްޓޭޓްމަންޓާއި، ޔާމީނުގެ މަޤާމުގެ ޙައިސިއްޔަތުން އޮންނާނެ "ކޮންޓެކްޓްސް" އިންވެސް ދޭހަވާ ކަމަށް ދައުލަތުގެ ވަކީލާ ވިދާޅުވިއެވެ. މި މައްސަލައިގެ އިތުރުންވެސް އިތުރު މައްސަލަ ޔާމީނުގެ މައްޗަށް ހިނގަމުންދާކަމަށް ވަކީލާ ވިދާޅުވިއެވެ.
ދައުލަތުގެ ވަކީލާ ވަނީ ޝަރީއަތް ނިމެންދެން ޔާމީނުގެ ޕާސްޕޯޓު ހިފަހައްޓައިދިނުމަށް އެދިވަޑައިގެންފައެވެ.
އެކަމާ ގުޅޭގޮތުން ވާހަކަ ދައްކަވަމުން ޔާމީނު ވިދާޅުވީ، އެމަނިކުފާނު ފިއްލަވާނެ ކަމުގެ ހެކި ހުރިކަމަށް ފުލުހުންނާ ހަވާލާދީ ދައުލަތުން ބުނާއިރު، އެއީ ބޮޑެތި ތުހުމަތުތަކެއް ކަމަށާއި، އެ ހެކިތައް ބައްލަވަން ބޭނުންފުޅުވާ ކަމަށެވެ. ފުލުހުން ކޮށްފައި އެވަނީ ކޮށްގެން ނުވާނެ ކަހަލަ ތުހުމަތެއްކަމަށް ޔާމީނު ވިދާޅުވިއެވެ. ނަމަވެސް ދައުލަތުން ވަނީ، ޔާމީނު ފިލައިގެން ގޮސްދާނެކަމަށް ބަޔާންކޮށް ވަކި ހެއްކެއް ހުށައަޅާފައި ނުވި ނަމަވެސް، އެމަނިކުފާނު ފިއްލަވާނެ ފަދަ ސަބަބުތައް ހުރިނަމަ އެކަމަށް ފަނޑިޔާރަށް ރިއާޔަތް ކުރެވޭނެ ކަން ފާހަގަކުރައްވާފައެވެ.
ޔާމީނު ވަނީ އެމަނިކުފާނު މީގެ ކުރިން އަމަލު ކުރައްވާފައިވާ ގޮތަށް ރިއާޔަތް ކުރެއްވުމަށް އެދިވަޑައިގެންފައެވެ. އަދި ވޮޑަމުލާގެ މައްސަލައިގައި ކްރިމިނަލް ކޯޓުން ޙުކުމަކާއި ހަމައަށް ދިޔަ ދިގު މުއްދަތުގައިވެސް ފިއްލެވުމަށް އެއްވެސް މަސައްކަތެއް ކުރައްވައި، ފިއްލެވުމުގެ އިހުތިމާލެއް އޮތް ކަމެއް ފެނިފައިވޭތޯވެސް ޔާމީން ސުވާލު ކުރެއްވިއެވެ.
މި މައްސަލައާ ގުޅިގެން ބޭއްވި އަޑުއެހުން ހޯމަ ދުވަހުގެ ހަވީރުވެސް ކުރިއަށް ގެންގޮސްފައިވެއެވެ. މި އަޑުއެހުމުގައި ދިފާއީ ވަކީލު ވަނީ ދައުލަތުން ހުށައަޅާފައިވާ ފޯމުގައި ރާއްޖެ ދޫކޮށް ފިލައިގެން ދާނެ ކަމަށް ބެލެވޭ އެކަށީގެންވާ ސަބަބެއް ބަޔާންކޮށްފައިނުވާ ކަމަށެވެ. އަދި ޕީޖީގެ ފަރާތުން ކޯޓުތަކަށް މައްސަލަތައް ހުށައަޅާއިރު ތަބާވާން ޖެހޭނީ ޤާނޫނީ އަސާސްތަކަށް ކަން ފާހަގަކޮށް ވަކީލު ވިދާޅުވީ، ފޯމުގައިވާ މައުލޫމާތުތައް ރަނގަޅުތޯ ފަނޑިޔާރު ބައްލަވަން ޖެހިވަޑައިގަންނަވާނެ ކަމަށެވެ.
ދައުލަތުން ހިފަހައްޓަން އެދިފައިވާ ދެ ޕާސްޕޯޓަކީވެސް މުއްދަތު ހަމަވެފައިވާ ދެ ޕާސްޕޯޓުކަން ދިފާއީ ވަކީލު ފާހަގަ ކުރެއްވިއެވެ. ޕާސްޕޯޓު ހައްދަންވެސް ހުށައަޅާނީ ދައުލަތުގެ އިދާރާއަކަށް ކަމަށްވާއިރު، އެ މައުލޫމާތު ދައުލަތަށް އެނގިގެންދާނެކަމަށް ވަކީލު ވިދާޅުވިއެވެ.
ދިފާއުން ވަނީ ޕާސްޕޯޓު ހިފެހެއްޓުމަށް ދައުލަތުން އެދުނު އަމުރު ބާތިލު ކުރުމަށް އެދިފައެވެ.
ދެފަރާތުން ފާހަގަކުރި ކަންކަމާއި ގުޅޭގޮތުން ގާޒީ އަހުމަދު ޝަކީލުވެސް ވަނީ ބައެއް ކަންކަން ސާފު ކުރައްވާފައެވެ. އެގޮތުން ދެ ޕާސްޕޯޓުގެ މުއްދަތު ހަމަވެފައިވާކަން ދައުލަތަށް ފާހަގަވެފައިވޭތޯ ސުވާލު ކުރުމުން ދައުލަތުން ބުނީ އެކަން ފާހަގަވެފައިވާ ކަމަށާއި، ނަމަވެސް ޕާސްޕޯޓަކީ ކޮންމެ ވަގުތެއްގައިވެސް ރިނިއު ކުރެވޭނެ އެއްޗެއް ކަމަށެވެ. އާންމު އުސޫލުން ޕާސްޕޯޓު އައު ކުރާއިރު ޖަހާނީ އައު ނަންބަރެއްކަން ފާހަގަކޮށް ދައުލަތުން ބުނީ، މުއްދަތު ހަމަވެފައިވާ ޕާސްޕޯޓު ހިފައިގެން ނުފުރޭނެ ކަމަށެވެ. އަދި އާންމު އުސޫލުން ދައުވާލިބޭ ފަރާތްތަކުގެ އަމަލުތައް ދައުލަތުން ބަލަމުން ނުދާނެތީ، ޕާސްޕޯޓު އައު ކުރަން އިމިގްރޭޝަނަށް ހުށައެޅުމުން ވަގުތުން ޕީޖީ އޮފީހަށް އެ މައުލޫމާތު ނުލިބިދާނެކަންވެސް ވަކީލާ ފާހަގަ ކުރެއްވިއެވެ.
އެހެންނަމަވެސް، އަމުރު ނެރޭ ޙާލަތުގައި އިމިގްރޭޝަނަށް ޕާސްޕޯޓު އައު ކުރަން ހުށައަޅާ ހިސާބުން ދައުލަތަށް އެ ނޮޓިފިކޭޝަން ލިބިގެންދާނެކަމަށް ދައުލަތުގެ ވަކީލާ ވިދާޅުވިއެވެ.
މި ބާވަތުގެ މައްސަލަތަކުގައި މައްސަލައިގެ ކުޑަބޮޑު މިނަށް ބަލައި، ޕާސްޕޯޓު ހިފެހެއްޓުމަށް މީގެ ކުރިންވެސް އެދިފައިވާނެކަން ވަކީލާ ފާހަގަ ކުރެއްވިއެވެ.
މައްސަލައާއި ގުޅިގެން ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ޝަކީލު ވަނީ ޕާސްޕޯޓު ހިފެހެއްޓުމަށް އަމުރު ނެރެވޭނެ ޙާލަތްތަކާއި އެ އަމުރުގައި ފުރިހަމަވާން ޖެހޭ ކަންކަން ބަޔާން ކުރައްވާފައެވެ. އެގޮތުން ގާޒީ ވިދާޅުވީ، މި މައްސަލައިގައި ޔާމީނުގެ މައްޗަށް އުފުލާފައިވާ ދައުވާތަކާއި ގުޅިގެން މަދަނީ މިންގަނޑުން ބަލާއިރު ޕާސްޕޯޓު ހިފެހެއްޓޭ މިންވަރަށް ހެކި ލިބިފައިވާ ކަމަށެވެ. އަދި ކުށުގެ ތުހުމަތު ކުރެވޭ މީހާ ރާއްޖެ ދޫކޮށް ދިއުމުގެ އިހުތިމާލަށް ބަލާއިރު، އެމީހަކު ކުރި ކުށުގެ ބާވަތާއި، ކުރިންވެސް ފިލައިގެން އުޅޭ މީހެއްތޯ ބެލުމާއި، އެމީހަކީ ފިލައިގެން ބޭރުގައި އުޅުމުގެ މާލީ ތަނަވަސްކަން ހުރި މީހެއްކަން ފަދަ ކަންކަމަށް ބަލާއިރު، މި މައްސަލައިގައި ރާއްޖެ ދޫކޮށް ފިލައިގެން ގޮސްދާނެކަމަށް ބަލައި ދައުލަތުން ވަނީ ސަބަބުތަކެއް ހުށައަޅާފައެވެ. އަދި އެމަނިކުފާނު ފިލައިގެން ގޮސްފިނަމަ، ދައުވާ ކުރިއަށް ގެންދިއުމަށް ދަތިވާނެކަން ބަޔާން ކުރިނަމަވެސް، ފިލައިގެންދާން އުޅޭކަން އެނގޭ އެއްވެސް ހެއްކެއް އަދި ސަބަބެއް ނެތްއިރު، ހިފެހެއްޓުމަށް ހުށައަޅާފައިވާ ޕާސްޕޯޓަކީވެސް މުއްދަތު ހަމަވެފައިވާ ޕާސްޕޯޓެއްކަން ފަނޑިޔާރު ފާހަގަ ކުރެއްވިއެވެ.
އޭގެ އިތުރުން، ޔާމީނުގެ ދައުވާތައް ހިންގުމަށް ރާއްޖޭގައި މަޑުކުރަން ޖެހޭތީ ޔާމީން ފުރުން މަނާ ކުރުމުގެ ސަބަބެއް އޮތްކަން ޤަބޫލު ކުރެވުނު ނަމަވެސް، ވުޖޫދުގައި ނެތް އެއްޗެއް ހިފަހައްޓާނީ ކިހިނެއްތޯ ފަނޑިޔާރު ވަނީ ސުވާލު އުފައްދަވާފައެވެ. ފަނޑިޔާރު ވަނީ އެފަދަ އަމުރެއް ނެރެދެވެން ނެތްކަމަށް ކަނޑައަޅުއްވާފައެވެ. ނަމަވެސް ބޭރަށް ފުރަން އުޅޭކަމުގެ އެއްވެސް ހެއްކެއް ލިބިއްޖަނަމަ، އެފަދައިން އެދުމުގެ ފުރުސަތު އޮތްކަން ފާހަގަ ކުރެއްވިއެވެ.
