ކޮވިޑުގެ މަރުގެ އަދަދުތައް އިތުރުވެ، ތާރީޚުގެ ތެރެއަށް!

ރާއްޖޭގެ ކޮވިޑުގެ ހާލަތަށް ބަލާއިރު މިހާރު ފެންނަ ކޭސްތަކުގެ އަދަދު ދުވަހެއް ދުވަހަކަށް މި އަންނަނީ އިތުރުވަމުންނެވެ. އަތޮޅު ތެރޭގެ ރަށްރަށުން ފެނުނު ކޭސްތަކުގެ އަދަދު ވެސް މިއަންނަނީ އިތުރުވަމުންނެވެ. މިއާއެކު މި ބަލީގައި ނިޔާވި މީހުންގެ އަދަދުވެސް މިވަނީ އިތުރުވެފައެވެ.

ކޮވިޑުގައި ނިޔާވި މީހުންގެ އަދަދު އިތުރުވެ، މިވަނީ ތާރީޚުގެ ތެރެއަށް ވަދެފައެވެ. އެގޮތުން ރާއްޖެއިން މިހާތަނަށް 91،993 މީހުންނަށް ކޮވިޑު ޖެހިފައިވާއިރު، މި ވައިރަސް ޖެހިގެން ނިޔާވެފައިވަނީ 253 މީހުންނެވެ. ރާއްޖެއިން ކޮވިޑް ޖެހިގެން ނިޔާވި މީހުންގެ ތެރޭގައި ގިނައީ ދިވެހިންނެވެ. އަދި ބަލީގައި ބޮޑުވަރުވެ ނިޔާވި ގިނަ މީހުންނަކީ ދާއިމީ ބޮޑެތި ބަލިތަކަށް ފަރުވާ ހޯދަމުންދިޔަ މީހުންނެވެ.

ތާރީޚުގެ ތެރެއަށް ޖެހިލާނަމަ، ކޮވިޑުގެ ފަދަ އެތައް ބަލިމަޑުކަމެއް ދުނިޔެއަށް ވަނީ ކުރިމަތިވެފައެވެ. މިފަދަ ބައެއް ބަލިތައް ރާއްޖޭގައިވެސް ވަނީ ފެތުރިފައެވެ. ރާއްޖޭގައި މިހާތަނަށް އެންމެ ނުރައްކާތެރި ބަލިމަޑުކަމެއްގެ ގޮތުގައި ފެތުރިފައިވަނީ 70ގެ އަހަރުތަކުގައި ފެތުރިގެންދިޔަ ކޮލެރާއާއި ސިގެއްލާއާއެވެ.

އެގޮތުން 1978ގައި ދުނިޔޭގައި ކޮރެލާ އެންމެ ހަލުވިކަމާއެކު ފެތުރިގެންދިޔަ ދުވަސްވަރު، ރާއްޖޭން 11303 މީހެއްގެ ގައިން އެ ބަލި ފެނިފައިވެއެވެ. އަދި އޭގެ ތެރެއިން 252 މީހަކު ނިޔާވިއެވެ. އޭރު ރާއްޖޭގެ އާބާދީ އަކީ 148،780 މީހުންނެވެ.

ދެން އެންމެ ހަލުވިކަމާއެކު ރާއްޖޭގައި ފެތުރިގެންދިޔަ އަނެއް ބައްޔަކީ ސިގެއްލާއެވެ. 1982 ވަނަ އަހަރު ރާއްޖޭން 13752 މީހަކަށް ސިގެއްލާ ޖެހުނުއިރު، 197 މީހަކު ވަނީ މި ބަލީގައި ނިޔާވެފައެވެ. އޭރު ރާއްޖޭގެ އާބާދީ އަކީ 169،851 މީހުންނެވެ.

ސިގެއްލާ ޖެހިގެން 197 މީހުން ނިޔާވެފައިވާއިރު ކޮލެރާ ޖެހިގެން ނިޔާވީ 252 މީހުންނެވެ. އޭރުގެ ސިއްހީ ހާލަތަށް ބަލާއިރު އެހާ ކުރިއަރާފައިވާ ޒަމާނަކަށް ނުވުމުން މާގިނަ ވަސީލަތްތަކެއް ފަރުވާ ދިނުމުގައި ނެތެވެ. މިކަމުގެ ސަބަބުންވެސް މީހުންނަށް ފަރުވާ ދިނުމުގައި ދަތިތަކާ ކުރިމަތިވެގެން ދިޔައެވެ.

ސިއްހީ ފަރުވާތައް ފޯރުކޮށްދިނުމުގައި އެންމެ ޒަމާނީ މެޝިންތައް ބޭނުންކުރާ މިފަދަ ޒަމާނެއްގައި ކޮވިޑް ޖެހިގެން ނިޔާވި މީހުންގެ އަދަދު މިވަނީ 1978 ވަނަ އަހަރަށް ވުރެން ވެސް އިތުރުވެފައެވެ.

މިވައިރަސް ޖެހިގެން އެއްފަހަރާ ގިނަ މީހުން ނިޔާނުވި ނަމަވެސް، ވިސްނަންވީ ކަމަކީ އަދަދުތައް އިތުރުވަމުންދާކަމެވެ. ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެންމެހާ ރައްޔިތުން ވެސް އަޅަން ޖެހޭ ކަމެވެ. އަދިވެސް ވައިރަސްގެ ނުރައްކާ އޮތްކަން ހަނދާނުގައި ބަހައްޓައިގެން، ކަމާގުޅޭ މާހިރުން ދޭ އިރުޝާދުތަކަށް ތަބާވުން މުހިންމު ކަމެވެ.