ރެނާޓޯއަށް ލިވަޕޫލުން އަދިވެސް ޝައުގުވެރިވޭ

މި ފަހަރުގެ ޔޫރޯ ފުޓްބޯޅަ މުބާރާތުގައި ވިދާލި ޕޯޗުގަލުގެ މިޑްފީލްޑަރު ރެނާޓޯ ސަންޗޭސް ހޯދުމަށް ލިވަޕޫލުން އަދިވެސް މަސައްކުރަމުން އަންނަ ކަމަށް ރިޕޯޓުތައް ބުނެފިއެވެ.

މީގެ ފަސް އަހަރު ކުރިން ޕޯޗުގަލުން ޔޫރޯ ކާމިޔާބުކުރިއިރު ވިދާލި ރެނާޓޯ ވަނީ މި ފަހަރުގެ ޔޫރޯގައިވެސް މޮޅު ކުޅުމެއް ދައްކާއެވެ. އެއާއެކު ފްރާންސްގެ ލިލްއަށް ކުޅެމުން އަންނަ އުމުރުން 24 އަހަރުގެ ރެނާޓޯ ހޯދަން ޔޫރަޕުގެ ބޮޑެތި ކުލަބުތަކުން އަންނަނީ ފާރަލަމުންނެވެ.

ރިޕޯޓުތައް ބުނާ ގޮތުން މިދިޔަ ހޫނު މޫސުމުގެ ޓްރާންސްފާގައިވެސް ލިވަޕޫލުން ވަނީ ރެނާޓޯ ގަންނަން މަސައްކަތްކޮށްފައެވެ. އެކަމަކު އެ ފަހަރު އެކަން ކާމިޔާބުވެފައި ނުވާއިރު، ކުރިއަށް އޮތް ޖެނުއަރީ މަހުގެ ޓްރާންސްފާގައިވެސް ރެނާޓޯ ގަތުމަށް ލިވަޕޫލުން މަސައްކަތްކުރާނެ ކަމަށް ޕޯޗުގަލުގެ މީޑިއާތަކުން ވަނީ ރިޕޯޓުކޮށްފައެވެ.

ބެންފީކާ ޓީމުން ފާހަގަވި ރެނާޓޯ 2016 ވަނަ އަހަރުގެ ޔޫރޯއަށްފަހު ބަދަލުވީ ޖަރުމަނުގެ ޗެމްޕިއަން ބަޔާން މިއުނިކަށެވެ. އެ ޓީމުގައި ރެނާޓޯ ތިން ސީޒަން ހޭދަކުރިއިރު، އޭނާ ވަނީ ބަޔާނުގެ ލޯނު އެއްބަސްވުމެއްގެ ދަށުން އިނގިރޭސި ޕްރިމިއާ ލީގުގެ ސްވަންސީ ސިޓީއަށް ކުޅެފައެވެ. އެއަށްފަހު ރެނާޓޯ ލިލްއަށް ބަދަލުވީ 2019 ވަނަ އަހަރު 21 މިލިޔަން ޕައުންޑަށެވެ. އޭނާ އަކީ ލިލްގެ ތާރީޚުގައި އެ ޓީމަށް ސޮއިކުރި އެންމެ އަގުބޮޑު ކުޅުންތެރިޔާއެވެ. އެ ފަހަރު ރެނާޓޯ ވަނީ ލިލްއާއެކު ހަތަރު އަހަރުގެ އެއްބަސްވުމެއް ހަދާފައެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ހޫނު މޫސުމުގައެވެ.

ރިޕޯޓުތައް ބުނާ ގޮތުން ލިލްއިން ރެނާޓޯ ވިއްކާނަމަ، އެ ޓީމުން އޭނާއަށް ކަނޑައަޅާފައިވާ އަގަކީ 34 މިލިޔަން ޕައުންޑެވެ. އަދި ލިވަޕޫލުގެ އިތުރުން ބާސެލޯނާ، އޭސީ މިލާން، ނިއުކާސަލް ޔުނައިޓެޑް އަދި މެންޗެސްޓާ ސިޓީންވެސް ރެނާޓޯއަށް ޝައުގުވެރިވާ ކަމަށްވެސް ރިޕޯޓުތައް ބުނެއެވެ.

ލިލްގައި މިހާތަނަށް ރެނާޓޯ ތިން ސީޒަން ހޭދަކޮށްފައިވާއިރު، މިދިޔަ ސީޒަނުގައި ލިލްއިން ފްރެންޗް ލީގު ކާމިޔާބުކުރިއިރު ރެނާޓޯ ވަނީ އެ ޓީމުގައި މޮޅު ކުޅުމެއް ދައްކާފައެވެ. އަދި އޭނާ ވަނީ ލިލްއަށް މިހާތަނަށް ކުޅެދުން 70 މެޗުގައި ހަ ލަނޑު ޖަހާފައެވެ.