ކޮވިޑް ޖެހިގެން ރާއްޖޭގައި ނިޔާވި މީހުންގެ އަދަދު 252ށް އަރައިފި
ނިޔާވީ އުމުރުން 93 އަހަރުގެ ދިވެހި ފިރިހެނެއް
ގއ. ވިލިނގިލީ ކޮވިޑް ފެސިލިޓީއަށް ބަލި މީހަކު ގެންދަނީ
ކޮވިޑު ބަލީގައި ރާއްޖޭގައި މަރުވި މީހުންގެ އަދަދު 252ށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ނ. އަތޮޅު ހޮސްޕިޓަލިގައި ފަރުވާދެމުންދިޔަ މީހަކު ހޮނިހިރު ދުވަހު ނިޔާވެފައިވާ ކަމަށެވެ. އެއީ އުމުރުން 93 އަހަރުގެ ދިވެހި ފިރިހެނެއް ކަމަށް ވަނީ ބުނެފައެވެ.
ހެލްތު ޕްރޮޓެކްޝަން އެޖެންސީ(އެޗްޕީއޭ)ން އާންމު ކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު ޕޮޒިޓިވްވި ފާއިތުވި 24 ގަޑިއިރު 100 މީހުން ވަނީ ބައްޔަށް ފޮޒިޓިވްވެފައެވެ. އެ 100 މީހުންގެ ތެރެއިން މާލެ ސަރަހައްދުން ޕޮޒިޓިވްވެފައިވަނީ 19 މީހުންނެވެ. އަތޮޅުތަކުން 71 މީހުން ޕޮޒިޓިވްވިއިރު ހިނގަމުންދާ ރިސޯޓްތަކުން 10 މީހުން ޕޮޒިޓިވް ވެފައިވެއެވެ.
މިއާއެކު ރާއްޖެއިން ކޮވިޑް-19ށް ޕޮޒިޓިވްވި މީހުންގެ އަދަދު ވަނީ 91،993ށް އަރާފައެވެ. މީގެތެރެއިން 90،003 މީހުން ވަނީ ބަލިން ރަނގަޅުވެފައެވެ. މިވަގުތު އެކްޓިވް ކޭހުގެ ގޮތުގައި 1726 ކޭހެއް އަންނަނީ ގުނަމުންނެވެ. މީގެތެރެއިން 17 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.
