ހއ. ވަށަފަރުގައި ފެނާއި ނަރުދަމާ ނިޒާމު ގާއިމު ކުރުމެގެ މަސައްކަތް ރަސްމީކޮށް އިފްތިތާހު ކޮށްފިއެވެ.

ވަށަފަރުގައި ހޮނިހިރު ދުވަހު ބޭއްވި މި ރަސްމިއްޔާތުގައި މި މަސައްކަތް ރަސްމީކޮށް އިފްތިތާހު ކޮށްދެއްވީ އެމްޑަބްލިއު އެސްސީގެ މެނޭޖިން ޑިރެކްޓަރ ހަސަން ޝާހާއި ކެލާ ދާއިރާގެ މެމްބަރު އިބްރާހިމް ޝަރީފާއި ހއ. އަތޮޅު ކައުންސިލުގެ ރައީސް މޫސާ ޝަފީގުގެ އިތުރުން ވަށަފަރު ކައުންސިލުގެ ރައީސް އަހުމަދު މުއީންއެވެ. މި ރަސްމިއްޔާތުގައި އެމްޑަބްލިއުއެސްސީގެ ގިނަ އަދަދެއްގެ އިސް ބޭފުޅުން ވަނީ ބައިވެރިވެވަޑައިގެންފައެވެ.

ފެނާއި ނަރުދަމާ އެޅުމުގެ މަސައްކަތަށް ބޭނުންވާ ހޮޅިއާއި އެހެނިހެން ތަކެތި އެރަށަށް ގެންގޮސްފައި ވާއިރު، ފެން ޕްލާންޓް ބެހެއްޓުމަށް އިމާރާތްކުރާ ފެސިލިޓީ ބިލްޑިންގެ މަސައްކަތުގެ 29 އިންސައްތަ ނިމިފައިވާ ކަމަށް އެމްޑަބްލިއުއެސްސީން މައުލޫމާތުދެއެވެ.

ވަށަފަރުގައި ފެނުގެ ނިޒާމު ގާއިމުކުރުގެ މަސައްކަތުގެ ދަށުން 7.5 ކިލޯމީޓަރުގެ ފެން ހޮޅީގެ މައި ނެޓްވޯކެއް އަޅަން ހަމަޖެހިފައިވެއެވެ. އަދި އާރުއޯ ފެސިލިޓީ ބިލްޑިން އިމާރާތް ކުރުމާއި ފެން އުފެއްދުމަށްޓަކައި ދެ އާރުއޯ ޕްލާންޓް ބެހެއްޓުމުގެ އިތުރުން، ފެން ރައްކާ ކުރުމަށްޓަކައި ތިން ތާނގި ބެހެއްޓުމަށް ވަނީ ހަމަޖެހިފައެވެ. ހަމައެހެންމެ ގޭގޭގައި ފެންމީޓަރު ބަހައްޓައި، ފެނުގެ ކަނެކްޝަން ގުޅައި ދިނުންވެސް މި މަޝްރޫއުގެ ތެރޭގައި ހިމެނެއެވެ.

މި މަޝްރޫއުގައި ހިމެނޭ ނަރުދަމާގެ މަސައްކަތުގެ ތެރޭގައި 2.7 ކިލޯ މީޓަރުގެ ޕަންޕިން ލައިން އެޅުމާ، ހަތަރު ޕަންޕިން ސްޓޭޝަނާ އެއް ސީ އައުޓް ފްލޯ ގާއިމު ކުރުމުގެ މަސައްކަތް ހިމެނެއެވެ. އަދި ގޭގޭގައި ޖަންކްޝަން ބަހައްޓައި، ނަރުދަމާ ކަނެކްޝަން ގުޅައިދިނުންވެސް މި މަޝްރޫއުގެ ތެރޭގައި ހިމެނެއެވެ.

އޭގެ އިތުރުން މި މަޝްރޫއުގެ ދަށުން ފެނާއި ނަރުދަމާ ނިޒާމު ހިންގާ ބެލެހެއްޓުމަށް ބޭނުންވާ ޖަނަރޭޓަރު ސެޓާއި ވެހިކަލާއި ފެން ތަހުލީލު ކުރުމަށް ބޭނުންވާ ސަމާނު ފޯރުކޮށްދިނުމަށް ވަނީ ހަމަޖެހިފަ އެވެ.