ފެންބިލުގެ މައުލޫމާތު ދިނުމަށް ހިޔާ ފްލެޓުގައި ހެލްޕް ޑެސްކެއް ގާއިމުކޮށްފި
ހެލްޕް ޑެސްކުގެ ޚިދުމަތް ލިބޭނީ ނޮވެމްބަރ 30ން ޑިސެމްބަރ ހަތަރެއްގެ ނިޔަލަށް
ހިޔާ ފްލެޓުގައި ގާއިމުކުރި އެމްޑަބްލިޔުއެސްސީގެ ހެލްޕު ޑެސްކު
ހިޔާ ފުލެޓްތަކުގެ ފެން ބިލާ ގުޅޭ ގޮތުން ކަސްޓަމަރުންނަށް މައުލޫމާތު ދިނުމަށްޓަކައި ހިޔާ ފުލެޓުގައި އެމްޑަބްލިޔުއެސްސީން ހެލްޕް ޑެސްކެއް ގާއިމްކޮށްފިއެވެ.
ހެލްޕް ޑެސްކް މެދުވެރިކޮށް ކަސްޓަމަރުން ފެން ބިލާ ބެހޭގޮތުން އޮޅުންފިލުވަން ބޭނުންވާ މައުލޫމާތު ސާފު ކުރުމާއި، ފުލެޓުތަކުގެ ފެން މީޓަރު ރަޖިސްޓަރ ކުރުމުގެ އިތުރުން އެމްޑަބްލިޔުއެސްސީގެ ލީނިޔަންސީ ޕޮލިސީ މެދުވެރިކޮށް މަސް މަހަށް ބަހާލައިގެން ފައިސާ ދެއްކޭ ސްކީމަށްވެސް އެދެވޭނެއެވެ.
ހިޔާ ފްލެޓުގެ ޓަވަރ 13ގައި ގާއިމުކުރެވިފައިވާ މި ހެލްޕް ޑެސްކުގެ ޚިދުމަތް ލިބެން ހުންނާނީ ނޮވެމްބަރ 30ން ޑިސެމްބަރ ހަތަރުވަނަ ދުވަހުގެ ނިޔަލަށެވެ. އަދި ހުކުރު ދުވަސް ފިޔަވާ ކޮންމެ ދުވަހެއްގެ 13:00ން 17:00ށް ހެލްޕް ޑެސްކުގެ ޚިދުމަތް ލިބެން ހުންނާނެ ކަމަށް އެމްޑަބްލިއޔުއެސްސީން މައުލޫމާތުދެއެވެ.
ހިޔާ ފުލެޓުތަކުގައި ދިރިއުޅޭ ފަރާތްތަކަށް ލުއިފަސޭހަ ކަމާއެކު ފެން މީޓަރު ރަޖިސްޓަރީ ކުރުމުގެ ފުރުސަތު ދިނުމާއި، އެފަރާތްތަކަށް ވީހާވެސް ގާތުން ފެން ބިލާ ގުޅޭ މުހިންމު މައުލޫމާތު ފޯރުކޮށް ދިނުމަކީ ހެލްޕް ޑެސްކުގެ މައިގަނޑު މަގްސަދު ކަމަށް އެކުންފުނިން ބުނެއެވެ.
ހިޔާ ފުލެޓްގެ ފެން މީޓަރު ރަޖިސްޓްރީ ކުރުމަށް ވެރިފަރާތުގެ އައިޑީ ކާޑާއި ހިޔާ ފުލެޓް އެގްރީމަންޓްގެ ސަފްހާ 29 ގެނައުމުން ފެން މީޓަރު ރަޖިސްޓްރީ ކޮށްދެވޭނެއެވެ. އަދި ކަސްޓަމަރުން މަސް މަހަށް ބަހާލައިގެން ފެން ބިލަށް ފައިސާ ދެއްކުމަށް އެދޭނަމަ ހެލްޕް ޑެސްކް މެދުވެރިކޮށް އެމްޑަބްލިޔުއެސްސީގެ ލީނިއަންސީ ޕޮލިސީއަށް އެދުމުގެ ފުރުސަތު އޮންނާނެއެވެ. މީގެ އިތުރުން އެޕާޓްމަންޓްތަކުގައި ފެން ލީކެއް އުޅޭކަން ދެނެގަންނާނެ ގޮތްތަކާއި، ފެން ލީކެއް އުޅޭކަން ފާހަގަ ކުރެވޭނަމަ ދެން ކަންތައް ކުރަންވީ ގޮތުގެ މައުލޫމާތު ކަސްޓަމަރުންނަށް ދެވޭނެއެވެ.
