ފްލެޓް ހަވާލު ކުރުން ލަސްވަނީ އިތުރަށް ބަލަންޖެހޭ ކަންކަން ހުރުމުން – މޭޔަރ ނިޒާރު
ހިތަދޫގައި ހުރި ފްލެޓްތަކުގެ ތެރެއިން މިހާރު ދޫނުކުރެވިހުރީ 28 ފްލެޓް
އައްޑޫގައި އަޅާފައިވާ ފްލެޓްތައް
ސަރުކާރުގެ ގެދޮރުވެރި ކުރުމުގެ ޕްރޮގްރާމްގެ ދަށުން އައްޑޫސިޓީ ހިތަދޫގައި ޢިމާރާތްކޮށްފައިވާ ފްލެޓްތަކުގެ ތެރެއިން މިހާތަނަށް ހަވާލު ނުވެހުރި 28 ފްލެޓް ހަވާލު ކުރުން ލަސްވަނީ އިތުރަށް ބަލަންޖެހޭ ކަންކަން ހުރުމުން ކަމަށް އައްޑޫސިޓީގެ މޭޔަރ ޢަލީ ނިޒާރު ވިދާޅުވެއްޖެއެވެ.
ނޫސްވެރިންނަށް މަޢުލޫމާތު ދެއްވުމަށް އިއްޔެ ބޭއްވި ބައްދަލުވުމުގައި ނިޒާރު ވިދާޅުވީ 28 ފްލެޓަށް 565 މީހުން ކުރިމަތިލާފައިވާ ކަމަށާއި އޭގެތެރެއިން މަރަދޫއާއި މަރަދޫފޭދޫއަށް ޚާއްސަ 6 ފްލެޓާއި ފޭދޫއަށް ޚާއްސަ 6 ފްލެޓްގެ އިވެލުއޭޝަން ނިމުމަކާ ހިސާބަށްގޮސް ޕޮއިންޓް ލިބުނުގޮތް އިޢުލާން ކުރުމަށް ތައްޔާރުވަމުން އަންނަ ކަމަށެވެ. ހިތަދޫގެ މީހުންނަށް ޚާއްސަ 16 ފްލެޓްގެ ވެސް އިވެލުއޭޝަން މަސައްކަތް ފަށާފައިވާކަމަށް މޭޔަރ ވިދާޅުވިއެވެ.
ފްލެޓްތައް ޙަވާލު ކުރުމަށް ކުރަންޖެހޭ ހުރިހާ މަސައްކަތެއް ކުރީގެ ކައުންސިލްގެ ދައުރު ހަމަވިއިރު ނިމިފައިވީނަމަވެސް ޢާއްމުންގެ ގިނަ ޝަކުވާތަކެއް ހުރުމުން އަލުން ފޯމް އިވެލުއޭޓު ކުރަން ފެށީ އާކައުންސިލް މަގާމާއި ޙަވާލު ވުމަށްފަހުއެވެ. އެހެންނަމަވެސް ގިނަ ބަޔަކު އެދުނުގޮތަށް ގޭގެއަށް ޒިޔާރަތް ކޮށްގެން ޙާލަތު ދެނެގަނެވޭނެފަދަ މާޙައުލެއް ކޮވިޑްގެ ދަނޑިވަޅުގައި ލިބިފައިނެތްކަން މޭޔަރ ފާހަގަ ކުރެއްވިއެވެ.
ނިޒާރު ވިދާޅުވީ އައްޑޫސިޓީގައި ގެދޮރުނެތް އެތައް ބަޔަކު ތިބިއިރު މިފަރާތްތަކަށް ދޫކުރުމަށް އެންމެ 28 ފްލެޓް ލިބިފައިވުމަކީ އެންމެ ބޮޑު ގޮންޖެހުން ކަމަށާއި ރައްޔިތުންގެ ބޯހިޔާވަހިކަމަށް އަވަސް ޙައްލެއް ލިބޭނެ ގޮތަކާމެދު ސަރުކާރާއެކު މަޝްވަރާ ކުރައްވާކަމަށެވެ.
މިކަން ކުރެވެން އޮތީ އައްޑޫސިޓީގެ ލޭންޑް ޔޫޒް ޕްލޭންގެ މަސައްކަތް ނިމިގެން ކަމަށްވާއިރު އާކައުންސިލްގެ މިދައުރަށް 5 މަސްވީއިރުވެސް މިމަސައްކަތް ވަނީ އަދި ނުނިމިއެވެ. އައްޑޫގެ ލޭންޑް ޔޫޒް ޕްލޭން ހެދުމަށް ޙަވާލުކޮށްފައިވަނީ ރިޔާން ޕްރައިވެޓް ލިމިޓެޑާއެވެ.
އައްޑޫ ސިޓީ ހިތަދޫގައި ޢިމާރާތްކޮށްފައިވާ ފްލެޓްތަކުގެ ތެރެއިން ކެޓަގަރީ “ޑީ” ގައި ހިމެނޭ 32 ފްލެޓުވެސް މިދިޔަ އަހަރުގެ ތެރޭ ދޫކުރެވުނެވެ. އެ ފްލެޓްތަކަށް އެދި ޖުމްލަ 835 ފަރާތަކުން ފޯމު ހުށަހެޅިއިރު، އޭގެތެރެއިން ފްލެޓު ލިބުމަށް ޝަރުތު ހަމަވާ 732 ފަރާތެއް ހިމެނުނެވެ. އޭގެ ތެރެއިން 48 ޕޮއިންޓަށްވުރެ މަތިން މާކުސް ލިބިގެން ގުރުއަތު ނެގުމަކާ ނުލައި 19 ފަރާތަކަށް ވަނީ ފްލެޓު ލިބިފައެވެ. އަދި 48 ޕޮއިންޓު ލިބިގެން މާކްސްގެ ގޮތުން އެއްވަރުވި 19 ފަރާތެއްގެ މެދުގައި ނެގި ގުރުއަތުން ބާކީހުރި 13 ފްލެޓް ވަނީ ދޫކޮށްފައެވެ.
ސަރުކާރުގެ “ގެދޮރުވެރިކުރުން” ޕްރޮގްރާމްގެ ދަށުން އައްޑޫ ސިޓީ ހިތަދޫގައި ޢިމާރާތްކޮށްފައިވާ 264 ފްލެޓުގެ ތެރެއިން މިހާތަނަށް 234 ފްލެޓުވަނީ ހަވާލުކޮށްނިމިފައެވެ. ބާކީ ހުރި 30 ފްލެޓްގެ ތެރެއިން 2 ފްލެޓް ޚާއްސަކޮށްފައިވަނީ ގުދުރަތީ ކާރިސާތަކުގައި ގެއްލުންވާ ފަރާތްތައް ބޭތިއްބުމަށެވެ.
